Templopa hichpanpi wasikunamanta
42
Chaymantam chay runaqa pusawarqa norte lawpi kaq hawa patioman hinaspam yaykuchiwarqa callejonpa chimpanpi kaq cuartokunaman,
chayqariki kasqa templopa qepanpi kaq wasipa chimpanpim otaq norte lawpim.
2 Chay norte lawman qawaq wasipa largonqa kasqa pichqa chunka iskayniyoq metro partenmi,
anchonñataqmi kasqa iskay chunka soqtayoq metro tumpa maschan.
3 Chay wasipa huklawninqa qawasqa uku kaq patiomanmi,
chaypa anchonqariki kasqa chunka metro partenmi,
chay wasipa huklawninqa qawasqa hawa lawpi loza pampayoq patiomanmi,
chay wasiqa kasqa kimsantin seqepi chimpa-chimpa balconniyoqmi.
4 Cuartokunapa chimpanpiqa kasqataqmi huk taksa callejonchapas,
chaypa anchonqa kasqa pichqa metro tumpa maschanmi,
uku lawman qawaq largonñataqmi kasqa pichqa chunka iskayniyoq metro parten,
chay callejonpa punkunkunaqa lloqsisqa norte lawmanmi.
5 Iskaynin altoskunapi cuartokunaqa aswan taksallam kasqa pampapi kaq cuartokunamantaqa,
sapa altospi wasikunam taksayarqa balconkunapas taksayasqanman hina.
6 Chay wasipi cuartokunaqa kimsa seqellam kasqa ichaqa patiopi kaq cuartokunapa pilarninkuna hinaqa manam chaykunapaqa kasqachu,
chayna mana pilarniyoq kasqanraykum sapa altospi cuartokunaqa seqasqanman hina taksayarqa pampapi kaq cuartokunamantaqa chaynataq punta kaq altospi cuartokunamantapas.
7-8 Hawa kaq patioman qawaq cuartokunam kasqa iskay chunka soqtayoq metro parten largoyoq,
chay cuartokunapa chimpanpiñataqmi risqa hawa kaq patioman qawaq perqa,
chaypa largonqa kasqa chunka soqtayoq metro partenmi,
chaynaqa chay taksa callejonchapa lliw sayayninqa kasqa pichqa chunka iskayniyoq metro partenmi.
9 Kay pampapi cuartokunaman yaykunapaqqa kasqa punkukunam hawa patiomanta otaq intipa qespimunan lawmanta.
10 Chaymanqariki yaykuna kasqa hawa patio perqapa anchontam.
Surlawpi kaq callejonpa chimpanpipas kasqataqmi cuartokuna,
chay cuartokunaqariki kasqa templopa qepanpi kaq wasipa waqtanpim.
11 Chay cuartokunaqa kasqa kaqkamallam chaynataq chay sayaykamallam,
norte lawpi kaq cuartokunaman rikchakuqmi kasqa chay seqella cuartokunaqa,
kasqataqmi yaykunapaq hinaspa lloqsinapaq punkunkunapas,
chaykunapa chimpanpipas kasqataqmi huk taksa callejoncha.
12 Surlawpi kaq cuartokunaman chayanapaqñataqmi kasqa huk punku,
chay punkupim qallarisqa chay taksa callejoncha,
chay callejonqariki risqa chay perqapa rinan intipa qespimunan lawmanmi.
13 Chay runam niwarqataq:
—Callejonpa chimpanpi kaq norte lawpi cuartokunapas hinaspa surlawpi cuartokunapas kachkan Diospaq sapaqchasqam.
Chaypiqa Tayta Diosman asuykuq sacerdotekunam mikunku Tayta Diosllapaqña sapaqchasqa kaqkunata,
chaypitaqmi churanku Diosllapaqña sapaqchasqanku ofrendakunatapas,
chay ofrendakunaqariki kawsaykunamanta ofrendakunam chaynataq hucharayku hinaspa culparayku ofrendakunam,
chaynaqa chay churananku lugarqariki Diosllapaqña sapaqchasqam.
14 Sacerdotekuna santuarioman yaykuspankuqa manam lloqsinmankuchu hawa patiomanqa.
Lloqsispaqa-lloqsinqaku servinankupaq hinakusqanku pachankuta horqokuspankuñam hinaspa chaypi saqeykuspankuñam,
chay pachakunaqariki Diosllapaqña sapaqchasqa kaqkunam.
Runakunapa kasqanman lloqsinankupaqqa pachakunqaku huk pachawanñam.
Templopa canchonnin tupusqanmanta
15 Templopa kasqanpi tukuy imakunatapas tupuyta tukuruspanñataqmi chay runaqa pusawarqa intipa qespimunan lawpi zaguan punkunta hinaspam hawa lawpa muyuriqninta tupurqa.
16 Payqa chay tupuna kaspinta hapiykuspanmi tupurqa intipa qespimunan lawpi kaq muyuriqninta hinaptinmi chaypa sayayninqa kasqa iskay pachak soqta chunkan iskayniyoq metron.
17 Chaymantam payqa chay tupuna kaspinwan tupurqataq norte lawpi kaq muyuriqnintapas hinaptinmi chay sayayninqa kasqa iskay pachak soqta chunkan iskayniyoq metron.
18 Chaymantam payqa chay tupuna kaspinwan tupurqataq surlawtapas hinaptinmi chaypa sayayninqa kasqa iskay pachak soqta chunkan iskayniyoq metron.
19 Intipa seqaykunan lawmanpas muyuykuspanmi tupurqataq chay tupuna kaspinwan hinaptinmi chaypapas sayayninqa kasqa iskay pachak soqta chunkan iskayniyoq metron.
20 Tupurqaqa templopa canchonninpa tawantin waqtantam.
Chay canchonpa muyuriqninpiñataqmi kasqa huk muralla,
chay canchonpa largonqa kasqa iskay pachak soqta chunkan iskayniyoq metronmi,
anchonpas kasqa hina chayna sayayniyoqllataqmi.
Chay muyuriq murallaqariki kasqa Diosllapaqña sapaqchasqa kaqkunamanta imakunatapas rakinanpaqmi.