Temploman Diospa kanchariynin huntaykusqanmanta
43
Chaymantam chay runaqa pusaykuwarqa intipa qespimunan lawpi zaguan punku wasiman.
2 Hinaptinmi rikururqani Israelpa Diosninpa kanchariynin intipa qespimunan lawmanta hamuchkaqta.
Uyarirqanim lloqllapa qaparisqanta hina.
Kay pachañataqmi sumaqllataña achkirirqa kanchayninwan.
3 Revelacionpi chay rikusqayqa karqa Jerusalen llaqtata Tayta Dios tuñichinanpaq hamuspan qawachiwasqan hinaraqmi,
kay qawasqayqa rikchakurqa Quebar Mayupa patanpi qawasqayman hinaraqmi.
Chaymi ñoqañataq qonqoranpa pampaman kumuykurqani.
4 Chaynaqa Tayta Diospa kanchariyninmá chay temploman yaykumurqa intipa qespimunan lawpi zaguan punkunta.
5 Espiritunñataqmi hoqariruwaspan aparuwarqa templopa uku kaq pationman hinaptinmi chay templomanqa huntaykurqa Tayta Diospa kanchariynin.
6 Chay runam sayaykurqa ñoqapa waqtaypi hinaptinmi uyarirqani templomanta Tayta Dios rimapayawasqanta.
7 Payqa kaynatamá niwarqa:
—Runapa churin,
kay sitioqariki tiyanaypa kananmi hinaspapas chakiykuna samariykachina sitiom,
kaypim ñoqaqa wiñaypaq yachasaq Israelpa mirayninkunapa chawpinpi.
Israelpa castankunaqa manañam penqaymanqa churanqakuñachu chuya sutiytaqa,
paykunapas nitaq reyninkupas manañam huchapakuq warmi hinaqa taytacha-mamachakunata adoranqakuñachu,
chuya sutiytaqa manañam penqaymanqa churanqakuñachu reyninkupa ayankunata alto moqo capillakunapi churaspankuqa.
8 Paykunaqa ñoqapa pilarniyoq punkuypa hichpallanpim hatarirachirqaku pilarniyoq punkunkutapas hinaptinmi ñoqapa lawmanta paykunapa lawmanqa qawakurqa huk perqallaña,
chaynapim paykunaqa chay millakuypaq rurasqankuwan ñoqapa chuya sutiyta penqayman churarqaku.
Chayraykum ñoqapas paykunapa contranpi piñakuspay wañurachirqani.
9 Kunanqa wischuchunkuñayá taytacha-mamachankuta,
chaywanmiki paykunaqa huchapakuq warmi hina huchallikunku,
wischuchunkutaqyá reyninkupa wañusqa ayankutapas,
chayraqmi ñoqaqa yachasaq paykunapa chawpinpi.
10 Chaynaqa runapa churin,
qamyá willay Israel castakunaman kay templopa imaynam kasqanmanta,
willaytaqyá planokunamantapas hinaspa sayayninkunamantapas chaynapi mana allin rurasqankumanta penqakunankupaq.
11 Sichum penqarikunqaku tukuy mana allin rurasqankumanta hinaptinqa qamyá willay imayna formayoqmi chay temploqa kasqanmanta.
Willaytaqyá maypim tukuy imankunapas tarikusqanmanta chaynataq maylawpim yaykuna punku hinaspa lloqsina punkupas tarikusqanmanta,
qamqa willankimá imayna formayoqmi chay temploqa kasqanmanta hinaspa cumplinanku decretokunamantapas.
Qamqa yachachinkitaqmá imayna formayoq kasqanmanta chaynataq chaypi tukuy ima yachachikuynintapas,
paykuna qawachkaptinyá qellqay imayna formayoq kasqanmanta chaynapi chayman hina ruranankupaq,
qellqaytaqyá llapallan chaypi kaq decretokunatapas cumplinankupaq.
12 Chay templomanta yachachikuyqa kaynamá:
moqopa hawanpi tarikuq templopa kasqanqa lliw mururiqnintinmi kanqa Diosllapaqña sapaqchasqa.
Altarmanta
13 —Altarpa sayayninkunaqa templota tupusqanku tupuwan tupuptinkum kayna karqa:
Altarpa muyuriqninpiqa kasqam huk yarqa parte metro masnin ukuyoq,
anchonñataqmi kasqa hina metro masnintaq,
chaypa muyuriqnin patakninñataqmi kasqa huk cuarta maschayoq.
Altarpa tiyananñataqmi kayna karqa:
14 Pampamanta qallariq punta kaq patakpa patankamam kasqa huk metro tumpa masnin sayayniyoq,
chay patanpa anchonñataqmi kasqa parte metro masnin.
Chay altarpa iskay kaq patakninpa sayayninñataqmi kasqa iskay metro masnin,
chaypa patanpa anchonñataqmi kasqa parte metro masnin.
15 Altarpi ninapa kanan patakpa alturanñataqmi kasqa iskay metro tumpa masnin,
chaypa tawan esquinankunapiñataqmi kasqa toropa waqran hina tawa adornokuna.
16 Chay altarpa hawanpi ninapa kananqa kasqa tawantinmi igualla waqtayoq,
sapakama waqtanpa sayayninmi kasqa soqta metro masnin.
17 Chay altarpa iskay kaq patakninpas kasqa tawantinmi igualla waqtayoq,
sapakama waqtanpa sayayninmi kasqa yaqa qanchis metro parten.
Chaypa patanñataqmi kasqa huk cuarta maschan patakniyoq.
Chay altarman seqaq gradasñataqmi qawasqa intipa qespimunan lawman.
18 Chaymantam niwarqa:
—Runapa churin,
ñoqa Señor Diosmi kaynata niki:
Altar ruranankupaq tiempo chayamuptinqa kay decretokunatamá cumplinqaku.
Altarpa hawanpim huk animalta lliwtapuni kañapuwanqaku hinaspataqmi chay altartaqa yawarwanpas challanqakutaq.
19 Hucharayku huk malta torota wañuchispa ñoqaman ofrecewanankupaqmi qonki Sadocpa mirayninmanta Leviy casta sacerdotekunaman,
paykunallam serviwanankupaqqa asuykuwananpaq hina kachkanku.
Chaynatam ñoqa Señor Dios nini.
20 Chaymantam asneq yawarninta hapiykuspa chay yawarwan llusinki chay waqra hina tawantin adornokunata,
llusinkitaqmi iskay kaq patakpa tawantin esquinankunatapas hinaspa chaypa patanpi muyuriqninkunatapas,
chaynapimá chay altartaqa chuyanchanki runakunapa ima huchanmantapas.
21 Chay hucharayku ofrecewasqanku malta torotaqa apanqaku santuariomanta hawanmanmi hinaspam kañanqaku maymi kañanankupi.
22 Paqarinnintin punchawñataqmi hucharayku ñoqaman ofrecewanqaku sano allin chivatota hinaptinmi sacerdotekunañataq chay altarta chuyanchanqaku imaynam chay malta torowan rurasqankuta hina.
23 Hucharayku chuyanchayta tukuruspañataqmi ofrecewanki allin sano malta torotawan huk carnerota.
24 Chay animalkunatamá ñoqa Tayta Diosman ofrecewanki,
sacerdotekunañataqmi kachiwan kachichaykuspanku lliwta ñoqapaq kañapuwanqaku.
25 Qanchis punchawnintinmi hucharayku sapa punchaw wañuchinki huk chivatota,
malta torota chaynataq carnerotapas,
chaykunaqa kanqa allin sanokamam.
26 Qanchis punchawpunimá sacerdotekuna chay altartaqa runakunapa huchanmanta chuyanchanqaku hinaspam ñoqallapaqña sapaqchanqaku.
27 Chay qanchisnintin punchawkuna tukuruptinñataqmi pusaq punchawmanta ñawpaqmanqa sacerdotekunapas qallaykunqakuña lliw kañananku animalkuna ofrecewayta,
ofrecewanqakutaqmi ñoqawan allinlla kasqankumanta ofrendakunatapas,
chayraqmi agradowanqa chaskisqaykichik.
Chaynatam nini ñoqa Señor Dios.