2 Chaypimá ñoqataqa Tayta Dios kaynata niwarqa:

—Kay punkutaqa amayá kichachunkuchu aswanqa wichqarayachunyá,

amam pipas yaykunqachu kay punkuntaqa.

Kay punkuntaqariki yaykurqani Israelpa yupaychasqan ñoqa Tayta Diosmi,

chaynaqa hina wichqasqamá kanqa.

3 Chaypiqa tiyaspaqa-tiyanqa kamachikuqllam ñoqapa qayllaypi mikunanpaq ichaqa yaykunqapas-lloqsinqapas zaguan corredor lawnillantam —nispa.

4 Chaymantam chay runaqa pusaykuwarqa norte lawpi zaguan punkunta templopa chimpanman,

chaynapim rikurqani templomanqa Tayta Diospa kanchariynin huntaykusqanta hinaptinmi ñoqañataq qonqoranpa pampaman kumuykurqani.

5 Chaymantam Tayta Dios niwarqa:

—Runapa churin,

qamqa allinta yuyaymanaspayá sumaqta qaway hinaspa uyariy templopa lliw decretonkunamantawan yachachikuyninkunamanta qanman nisqaykunata.

Yuyaymanaytaqyá pikunam templomanqa yaykunanmanta hinaspa santuariomanta lloqsinanmantapas.

6 —Kay mana kasukuq Israel castakunataqa qamyá rimapayay ñoqa Señor Diospa kayna nisqayta:

“Israel castakuna,

sayaychikñayá millakuypaq kaqkuna ruraymantaqa.

7 Qamkunaqa forastero runakunata santuarioyman pusaykuspam millakuypaqtaña temploytaqa rurarunkichik,

chay runakunaqariki ñoqapaq hinaqa manam señalasqachu kanku sonqonkupi nitaq cuerponkupipas.

Millakuypaq kaqkunatam rurachkankichik mikuyniytapas wirayoqta hinaspa yawarniyoqta ofrecewaspaykichik,

qamkunaqa contratoytapas manam kasukunkichikchu.

8 Qamkunaqariki manam kasukurqankichikchu ñoqallapaqña kaqkunamanta encargasqaykunatapas aswanqa huklaw runakunamanñam qoykurqankichik santuarioypi ruranakunataqa.

9 “Chayraykum ñoqa Señor Dios nini kaynata:

Ñoqapa santuarioymanqa manam yaykunqachu sonqonpi hinaspa cuerponpi mana señalasqa extranjero runaqa,

Israelpa mirayninkunawan yachaq forastero runapas manapunim yaykunqachu.

10 Leviypa castankunapas Israel castakunawanmi ñoqamanta karunchakururqaku hinaspam pasakurqaku taytacha-mamachakuna adoraqña,

chayraykumá paykunaqa mana allin rurasqankumanta castigasqa kanqaku.

11 Leviypa castankunaqa servikunqaku santuarioypim,

paykunaqa temploypa zaguan punkunkunapi cuidaqmi kanqaku,

ruranqakutaqmi temploypi wakin ruranakunatapas.

Paykunamá wañuchinqaku lliw kañapuwananku animalkunatapas hinaspa wakin ofrenda animalkunatapas,

paykunaqa listotaqmá kanqaku llapa runakunata servinankupaqpas.

12 Ichaqa chaywanpas paykunaqa Israel castakunata servispankum taytacha-mamachakunata adorachirqaku,

chaynapim paykunaqa Israelpa castankunata huchallichirqaku,

chayraykumá paykunaqa mana allin rurasqankumanta castigasqa kanqaku.

Ñoqa Señor Diosqa juraspaymi chaynata nini.

13 Paykunaqa asuykuwaqniy sacerdotekuna hinaqa manam ñoqamanqa serviwanankupaq asuykamuwanqakuchu,

manataqmi asuykunmankuchu ñoqallapaqña sapaqchasqa hinaspa chuyanchasqa kaqkunamanqa,

paykunaqa penqaypaq kaqkuna rurasqankumantam hinaspa millakuypaq kaqkuna rurasqankumantam castigasqapuni kanqaku.

14 Paykunataqa churasaq temploypi llamkaykuna ruranankupaqñam,

chaypim paykunaqa ruranqaku tukuy ima rurana kaqkunata.

15 “Leviypa castanmanta Sadocpa mirayninkunam santuarioypi servikurqaku Israel castakuna ñoqamanta karunchakuruptin,

paykunallam ñoqamanqa asuykuwanqaku serviwananpaq,

paykunallam ñoqamanqa ofrecewanqaku animalpa wirantawan yawarnintapas.

Chaynatam nini ñoqa Señor Dios.

16 Paykunallam yaykunqaku santuarioymanpas hinaspam paykunallataq asuykunqaku ñoqapa mesaymanpas serviwanankupaq hinaspa servicioykunatapas cuidanankupaq.

17 Uku patiopa zaguanninta yaykuspankuqa pachakunqaku linomanta rurasqa pachawanmi.

Templopa uku kaq pationpi otaq templopi kaspankuqa amam hinakunqakuchu millwamanta rurasqa pachawanqa.

18 Paykunaqa umankupim apanqaku linomanta uma wankinata,

hinakunqakutaqmi linomanta calzoncillokunawanpas,

amam hinakunqakuchu sudachikuq pachawanqa.

19 Paykunaqa hawa patiopi runakunaman manaraq lloqsichkaspam horqokunqaku templopi servinankupaq hinakusqanku pachankuta hinaspam chay pachakunataqa saqenqaku maymi churana sapaqchasqa cuartopi.

Huk pachawanñam paykunaqa churakunqaku chaynapi ñoqallapaqña sapaqchasqa pachawanqa runakunata ama sapaqcharunankupaq.

20 “Amam chukchankutaqa kachiy-kachiytaqa rutukunqakuchu,

amataqmi hatu-hatun kanankamaqa wiñarachinqakuchu aswanqa tumpallatam rutukunqaku.

21 Mayqan sacerdotepas amam vinotaqa tomanqachu templopa uku kaq pationman yaykuspanqa.

22 Amataqmi payqa casarakunqachu huk viudawanqa nitaq qosanmanta rakikuq warmiwanpas,

casaraspaqa-casarakunqa Israel castamanta huk doncellallawanmi,

casarakunmantaqmi huk sacerdotepa viudanwanpas.

23 “Sacerdotekunaqa runaykunatam yachachinanku imam ñoqallapaqña sapaqchasqa kasqanta chaynataq imam millakuypaq kasqantapas,

yachachinqakuqariki imam mana chaskinapaq kaqkunamantawan imam limpio kaqkunamantam.

24 Quejakuna kaptinqa paykunam juezkuna kaspanku leyniykunaman hina allin arreglota ruranqaku,

paykunaqa kasukunqakumá llapallan yachachikuykunatapas chaynataq llapallan fiestaykunamanta decretoykunatapas,

samanqakutaqmá samana punchawniykunapipas.

25 “Amam paykunaqa asuykunqakuchu wañukuq runapa ayanmanqa chaynapi mana chaskinaypaq hina ama rikurirunankupaq,

asuykuspaqa-asuykunqaku tayta-maman wañukuptillanmi otaq churinpas otaq wawqenpas otaq soltera paninpas wañukuptillanmi.

26 Chayna mana chaskinaypaq hinaña huk sacerdote rikuriruspanqa chuyanchakuspam qanchis punchawtaraq suyanqa.

27 Huktawan chay sacerdote serviwananpaq templopa uku kaq pationman yaykuspanqa puntatam huchanrayku huk animalta wañuchispan ofrecewanqa.

Ñoqa Tayta Diosmi chaynata nini.

28 “Sacerdotekunapa herencianqa ñoqallam kasaq,

Israel nacionpiqa manam herencia allpataqa qonqakuchu,

ñoqallam kani paykunapa herencianqa.

29 Paykunaqa mikunqaku Israel castakunapa ofrecewasqanku kawsaykunatam,

mikunqakutaqmi hucharayku wañuchipuwasqanku animalpa aychantapas hinaspa culparayku wañuchipuwasqanku animalpa aychantapas.

Israel castakunapa ñoqallapaqña sapaqchasqan kaqkunapas sacerdotekunapaqmi kanqa.

30 Paykunaqa chaskinqakutaqmi kawsaykunapa punta kaq allinnin rurunkunatapas chaynataq kuyakuy ofrendakunatapas,

tantakunaykichikpaq masata ruraspapas allinnintaqa sacerdotekunamanmi qonkichik,

chaynapim ñoqaqa wasikichikpi kaqkunatawan bendecisqaykichik.

31 Sacerdotekunaqa amam mikunqakuchu kikillanmanta wañuruq alton pawaq animalpa aychantaqa nitaq huk animalpa aychantapas,

amataqmi mikunqakuchu purun animalpa llikiparusqan aychatapas.