3
Hinaptinmi niwarqa:
—Runapa churin,
qamqa kay tarisqaykitayá mikuy.
Kay wankusqa librota mikuruspayá Israelpa castankunata rimapayamuy —nispa.
—Runapa churin,
saksanaykikamayá mikuy kay qosqay wankusqa librota —nispa.
—Runapa churin,
chaynaqa Israelpa castankunamanyá willamuy kay imam nisqaykunata.
5 Manam ñoqaqa kachachkayki sasallaña rimayniyoq runakunamanchu nitaq rimasqankupas mana entiendena runakunamanchu aswanqa Israelpa castan runakunamanmi.
6 Manam kachachkaykiqa nana-nanaq runakunamanchu nitaq sasallaña rimayniyoq runakunamanchu nitaq rimasqankupas mana entiendena runakunamanchu.
Paykunamanña kachaptiypas paykunaqa kasusunkimanmi.
7 Israelpa castankunam ichaqa mana kasusunkichu,
chaynaqa kanqaku ñoqatapas mana kasuwasqankuraykum.
Israelpa llapallan castankunaqa kanku qara uya rumi sonqokunam.
8 Ñoqam qamtapas tikrarusqayki paykuna hina qara uyaman chaynataq urkuykipas mana hukmanyaqman.
9 Urkuykitaqa tikrarusaq nina rumiman hinañam.
Amam paykunataqa manchakunkichu,
amam hukmanyankichu paykunapa qayllanpiqa.
Paykunaqa mana kasukuqkunapa castankunam kanku —nispa.
10 Chay rimapayawaqniymi niwarqataq:
—Runapa churin,
qamqa uyariwaspaykiyá sonqoykipi waqaychay kay rimapayasqaykunata.
11 Preso pusasqa llaqtamasikikunaman rispayá watukamuy.
Paykunatam:
“Tayta Diosmi nin kaynata” nispa ninki.
Ninkimá uyarisuptiki otaq mana uyarisuptikipas.
12 Chaymantam hoqariruwarqa Diospa Espiritun.
Hinaptinmi ñoqapa qepaypi uyarirurqani nisyu-nisyu bullallawanña:
¡Yachasqan lugarmantayá alabasqa kachun kancharichkaq Tayta Diosqa!
—niqta.
13 Uyarirqanitaqmi sapakama pawachkaq animalkunapa rapranpas qaqonakuspan nisyu-nisyu bullallaña rurasqantapas chaynataq paykunapa waqtanpi ruedakunapa bullallaña rurasqantapas.
14 Chaynapimá ñoqataqa Diospa Espiritun hoqariruwaspan huklawman pusaruwarqa.
Chaymi ñoqaqa llakisqallaña hinaspa piñasqallaña pasakurqani.
Ichaqa Tayta Diosmi nisyuniqta hapiwarqa.
15 Chaynapim ñoqaqa chayarurqani Tel Abib sutiyoq llaqtaman.
Chayqa kachkan Quebar sutiyoq mayupa patanpim.
Chaypimá yacharqaku preso pusasqa kaq Israelpa castankuna.
Chaypim paykunawan qanchis punchaw yacharqani mana ima rurakuytapas atistin.
Ezequielqa llaqta cuidaq hina kasqanmanta
16 Chay qanchis punchaw pasaruptinmi Tayta Dios niwarqa kaynata:
17 —Runapa churin,
qamtam churaykuyki llaqta cuidaqta hina Israelpa castankunapaq.
Imapas qanman willasqaytam ñoqapa rantiypi paykunata qaqchanki.
18 Ñoqam mana allin ruraq runata niyman:
“Wañunkipunim” nispa.
Sichum chay mana allin ruraq runata mana rimapayankichu chay mana allin kawsasqanmanta chaynapi musyakuspan kawsananpaq hinaptinqa chay mana allin rurasqanmanta mana wanakusqanraykum wañurunqa.
Ichaqa chay wañurusqanmantam cuentata mañasqayki.
19 Ichaqa chay mana allin ruraq runata qaqchachkaptikipas mana wanakuptinqa nitaq mana allin kawsasqantapas saqeptinqa kikinpunim wañunqa mana allin rurasqanmanta,
qanmi ichaqa mana huchayoq kanki.
20 Allinkunata rurachkaspan allin ruraq runapas qepanchakuruwaspa mana allinta ruraptinqa ñoqam paypaq churarusaq huk trancata hina hinaptinmi payqa wañurunqa.
Mana qaqchasqaykiraykum payqa huchanpi wañurunqa.
Manam yuyarisqachu kanqa tukuy allin rurasqankunapas ichaqa paypa wañusqanmantam cuentata mañasqayki.
21 Ichaqa sichu allin ruraq runata qaqchanki mana huchallikunanpaq hinaptinqa kawsakunqam qaqchasqaykita kasukuspan,
chaynapim qamqa mana huchayoq kanki.
Ezequiel mana rimaq rikurirusqanmanta
22 Tayta Diosmi atiyninwan hapiykuwaspan chaypi niwarqa:
—Hatarispayki lloqsiy wak pampaman,
hinaptinmi chaypi rimapayasqayki —nispa.
23 Chaynapim ñoqaqa hatarispay chay pampaman rirqani.
Chaypim kachkasqa Tayta Diospa kanchariynin,
chay kanchariyqa kachkasqa Quebar Mayupa patanpi rikusqay hinam.
Chaymi qonqoranpa pampaman kumuykurqani.
24 Hinaptinmi Diospa Espiritun huntaykuwaspan sayarirachiwarqa.
Chaymantam rimapayawarqa kaynata:
—Rispaykiyá wasikipi wichqakaramuy.
25 Qamtaqa runapa churin,
waskawan hapirususpaykim chaqnarusunki,
chaynapim runakunapa chawpinpiqa manaña purinkiñachu.
26 Qalluykitapas paladarnikiman laqarachiptiymi mana rimaqña rikurirunki.
Paykunataqa mana kasukuqkunapa castan kaptinpas manañam qaqchayta atinkichu.
27 Ichaqa qanman rimapayaspayqa huktawanmi rimachisqayki hinaptinmi:
“Tayta Diosmi nin kaynata” nispa willanki.
Uyariy munaqqariki uyarinqam,
mana uyariy munaqchá ichaqa mana uyarinqachu.
Paykunaqariki mana kasukuqkunapa castanmi.