Jerusalen llaqta tropakunapa atacasqan kananmanta
4
—Chaynaqa runapa churin,
huk ladrillota hapiykuspaykiyá ñawpaqnikiman churay hinaspayá chaypa hawanpi Jerusalen llaqtata dibujay.
2 Chay llaqtapa muyuriqnintam wichqarunki.
Ama ayqenankupaq hinam murallarunki.
Chay llaqtapa murallanpa qepanpi allpatañataqmi huk hawaqllaman montonarunki.
Chay llaqtapa ñawpaqninpim sayarachinki llapa tropakunata.
Llaqtapa muyuriqnin muralla tuñichinapaqmi churarunki machu-machu takaq qerukunata.
3 Huk llaspa fierrota hapispayá murallata hina sayarachiy chaynapi qanmantawan llaqtamanta rakinanpaq.
Chaynapim qamqa rikchakunki llaqta atacachkaq runaman.
Chaynatamá qamqa llaqtata muyuchkaq hina wichqarunki.
Chay rurasqaykiqa kanqa huk rikchanachiymi Israel castakunapaq.
4 —Chaynataqmi qamqa waqtapanki ichoqniki lawllaman.
Chaynataqa ruranki Israel castakunapa mana allin rurasqankuna apachkaq hina kanaykipaqmi.
Hayka punchawpas chay lawman waqtapasqaykiman hinam Israel castakunapa mana allin rurasqankuta apanki.
5 Chaynataqa rurachisqayki kimsa pachak isqon chunkan punchawtapunim chaynapi Israel castakunapa mana allin rurasqanku apanaykipaq.
Chayna watakunamiki paykunaqa mana allinta rurarqaku.
6 Chayna punchawkunata cumpliruspaykiñataqmi waqtapaykunki alleqniki lawllamanña.
Chaynapim qamqa Juda castakunapa mana allin rurasqan apachkaq hina kanki tawa chunka punchawpuni.
Huk punchawtam qoyki huk watata hina.
7 Chay atacasqa Jerusalen llaqta lawman muyuriruspam brazoykita qempikuykunki hinaspam chay llaqtapa contranpi ñoqapa rantiypi rimanki.
8 Kunanmi ñoqa watarusqayki waskakunawan hinaptinmi mana muyuyta atinkichu kaylawman nitaq waklawmanpas.
Chaynam kanki atacasqayki punchaw tukunankama.
9 —Qamyá apamuy trigota,
cebadata,
habasta,
lentejata,
mijo hinaspa espelta sutiyoq kawsayta.
Chaykunata huk mankallapi taqruruspayá ruray tantakunata.
Chaytam mikunki chay kimsa pachak isqon chunkan punchawpuni ichoq lawman waqtapaspayki.
10 As-asllamanta mikuspam cuarto kilollata mikunki sapa punchaw.
11 Yakutapas tomankiqa medisqallatam.
Sapa punchawpaqmi kanqa parte litrolla.
Tomankiqa as-asllamantamá.
12 Mikunaykipaqmi cebadamanta tortilla hina tantata ruranki.
Chaytaqa kankanki runapa chakisqa ispayninwanmi.
Llapa runakuna qawachkaptinmi chaytaqa ruranki.
13 Tayta Diosmi nirqaraq kaynata:
—Israelpa miraynin runakunata huklaw nacionkunaman presota pusachiptiymi kayna qacha tantakunata mikunqaku —nispa.
14 Chaymi ñoqañataq nirqani:
—Señor Dioslláy,
ñoqaqa manam haykapipas kayna millakuypaq kaqkunataqa mikurqanichu.
Manam haykapipas kikillanmanta wañuq animalpa aychantaqa mikurqanichu,
manam haykapipas purun animalpa tisapasqan aychataqa mikurqanichu.
Millakuypaq aychakunaqa warma kasqaymantapas manam simiyman yaykurqachu —nispa.
15 Hinaptinmi payñataq niwarqa:
—Chaynaqa runapa chakisqa ispayninmantaqa animalpa karkanwanñayá tantakuy —nispa.
16 Payqa niwarqataqmi:
—Runapa churin,
ñoqam Jerusalen llaqtapi mikuykunata chinkarachisaq.
Paykunaqa tantatapas pesasqallatañam llakillawanña mikunqaku,
yakutapas hukmanyastinmi tomanqaku medisqallataña.
17 Chaynapim tantankupas hinaspa yakunkupas pisiptin hukmanyasqallaña qawanakunqaku.
Paykunaqa mana allin rurasqankuraykum ismuchkaq hina tukurunqaku.