5
Runapa churin,
hapiyá chukcha rutuqpa navajan kaqlla huk ñawchi espadata hinaspayá chukchaykita ruturuspa barbaykitapas siksiruy.
Hinaspayá balanzata hapispayki chay chukchaykita kimsaman rakiy.
2 Chay llaqta atacayta tukuruspaykiñataqmi chay huknin rakisqayki chukchaykita kañanki llaqtapa chawpinpi.
Chaymantañataqyá chay huknin rakisqayki chukchaykita kuchuparuy chay llaqtapa muyuriqninpi.
Chay huknin rakisqayki chukchaykitañataqmi wayrawan aparachinki.
Ñoqam espadata horqoykuspay paykunata qatikachasaq.
3 Chaynataqyá asllapas rutusqa chukchaykita hapiykuspa pachaykipa puntanman wataruy.
4 Chay aslla chukchamantapas iskay kimsatayá ninaman wischuykuy kañakunanpaq.
Chaymantam nina lloqsinqa lliw Israel castakunapa contranpi.
5 —Ñoqa Señor Diosmi nini kaynata:
Chayqariki Jerusalen llaqtam.
Chay llaqtataqariki ñoqam churarqani llapa nacionkunapa chawpinpi hinaspa muyuriqnin allpakunapa chawpinpi.
6 Chaypi kaq runakunaqa mana allinta ruraspam leyniykunatawan decretoykunata mana kasukunkuchu.
Paykunaqa llapa nacionkunamantapas chaynataq muyuriqninpi kaq runakunamantapas aswan mana allinraqmi rikurirunku.
Paykunaqa leyniykunata qepanchakuruspam manataq kawsankupas decretoykunaman hinachu.
7 —Chayraykum ñoqa Señor Dios nini:
Qamkunaqa kankichik muyuriqnikichikpi nacionkunamantapas pasaypaq mana kasukuqmi.
Qamkunaqa manam decretoykunaman hinachu kawsarqankichik,
manataqmi leyniykunaman hinataqchu rurarqankichikpas.
Manataqmi nacionkunapa chawpinpi kachkaspapas leyniykunaman hinataqchu rurarqankichik.
8 Chayraykum ñoqa Señor Dios nini kaynata:
Ñoqapas qamkunapa contraykichikpim sayarirusaq.
Ñoqaqa wakin nacionkunapa qayllanpim sentenciaspay castigasqayki.
9 Chaynataqa rurasaq mana haykapipas rurasqayta hinam,
manataqmi chaynataqa huktawanqa rurasaqchu.
¡Mayna millakuypaqmi chay rurasqaykichikkunaqa!
10 Chayraykum qamkuna ukupiqa mama-taytakunapas wawa-churinkuta mikunqaku,
wawa-churinkunañataqmi mama-taytankuta mikunqaku.
Ñoqam qamkunataqa castigasqaykichik hinaspam puchuqkunatañataq wayrapa kanan tukuy hinastinman cheqerachisaq.
11 Kikiyraykum ñoqa Señor Dios jurani:
Qamkunam santuarioyta rurarqankichik cheqnisqay pasaypaq millakuypaq kaqkunawan,
chayraykum ñoqapas qamkunamantaqa kuyapayakuyniyta suchurichisaq.
Manañam llakipayasqaykichikñachu aswanqa castigasqaykichikpunim.
12 Qamkunamanta kimsaman rakisqamanta hukninmi wañunqa peste onqoywan,
wakinñataqmi yarqaypa tukusqan kanqa.
Huknin rakisqa parteñataqmi espadawan wañuchisqa kanqa llaqtapa muyuriqninpi.
Chay puchuq rakisqa runakunatañataqmi wayrapa kanan tukuy hinastinman cheqerachisaq.
Ñoqaqa espadayta horqoykuspaymi paykunata qatikachasaq.
13 Chaynapim ñoqapa piñakuyniyqa cumplikurunqa,
chaynataqmi qamkunapa contraykichikpi piñakusqaypas tanirunqa.
Chayraqmi ñoqaqa saksasqa hina kasaq.
Chaynapim qamkunaqa yachankichik ñoqa Tayta Diosqa sientikuruspay hinaspa qamkunapa contraykichikpi piñakuyniyta tukuruspay kayna rimasqayta.
14 Jerusalen llaqta,
qamtaqa purmarachiptiymi kanki monto-monton rumikunallaña,
muyuriqniki nacionkunapa chawpinpim penqayta rurarusqayki chaynapi ñawpaqniki pasaqkunapas qawanankupaq.
15 Ñoqa Tayta Diosmi nini kaynata:
Qam llaqtaqa kanki penqaypaqmi,
burlakunapaqmi,
correginapaqmi hinaspa muyuriqnikipi nacionkunapa mancharikunanmi.
Qampa contraykipi qaqchaspay,
piñakuywan hinaspa rabiawan sentenciasqayta cumpliptiymi chaynaqa kanki.
16 Wañuchinaypaq mana allin flechaykunata flechachkaq hinam qampa hawaykiman kachaykamusaq.
Arí,
qamkunapa hawaykichikmanmi yarqaytawan muchuykunata kachaykamusaq,
lliw mikuykunatam ñoqaqa chinkarachisaq.
17 Apachimusaqmá qamkunaman yarqayta chaynataq runa mikuq purun animalkunatapas chaymi qamkunaqa mana wawa-churiyoq kankichik.
Qamkuna ukupi runakunam wañunqa peste onqoywan,
runa wañuchiqkunapa makinpi hinaspa apamusqay guerrawan.
Chaynatam nini ñoqa Tayta Dios.