2 —Runapa churin,

Israel nacionpa chawpinpi orqokunata qawarispayá contrankupi rimariy

3 kaynata:

“Israel nacionpi orqokuna,

moqokuna,

wayqokuna,

qechwakuna,

qamkunayá uyariychik Señor Diospa kayna nisusqaykichikta:

‘Qamkunamanmi apamuchkani guerrakunata.

Ñoqaqa moqokunapi capillaykikunatam chinkarachisaq.

4 Animalkuna wañuchinaykichik altarkunapas pasaypaq purmachisqam kanqa,

incienso kañana pilarkunapas pakipasqam kanqa.

Runakunapas wañunqakum chaypi kaq taytacha-mamachakunapa ñawpaqninpi.

5 Israelpa mirayninkuna,

wañusqa cuerpoykichiktam taytacha-mamachaykichikpa ñawpaqninman wischuykusaq,

tulluykichikkunatapas altarnikichikkunapa muyuriqninpim cheqerachisaq.

6 Maypiña yachaptikichikpas chay yachasqaykichik llaqtakunatam tuñirachisaq,

moqokunapi capillakunapas purmachisqam kanqa,

chaynapim altarnikichikkunapas purmaspa chunnirunqa.

Taytacha-mamachaykichikpas pakipasqañam tukurunqa,

incienso kañanaykichik pilarkunapas puchukarunqam.

7 Ñawpaqnikichikpi runakuna wañuqta qawaspam yachankichik ñoqaqa Tayta Dios kasqayta.

8 Chaywanpas ñoqaqa wakillaykichiktapas puchuykachisqaykichikmi.

Chaynapim qamkunaqa guerramanta ayqekuspa nacionkunapi cheqechisqa kankichik.

9 May nacionmanña preso pusasqa kaspankupas chay qamkunapa castaykichik ayqekuqkunam yuyarinqaku ñoqamanta.

Paykunaqa hukwan-hukwan tupakuruq warmi hinam karqaku,

chayrayku castigasqaytam paykunaqa yuyarinqaku.

Yuyarinqakutaqmi huchapakuqllaña warmi hina taytacha-mamachakuna qatisqankurayku castigasqaytapas.

Chaynapim paykunaqa kikinkumantapuni millakunqaku mana allinkuna hinaspa millakuypaq kaqkuna rurasqankumanta.

10 Chaynapim paykunaqa yachanqaku Tayta Dios kasqayta.

Paykunaman kay mana allinkunata apachinaypaq rimaspayqariki manam yanqallachu rimarqani.’ ”

11 Señor Diosqa niwarqataqmi kaynata:

—Pitukuspayá taqllakustin hinaspa haytakachastin niy “¡Ay,

imañataq kayqa!”

nispa.

Israelpa castankunaqa mana allin millakuypaq rurasqankuraykum guerrawan,

yarqaywan hinaspa peste onqoykunawan wañunqaku.

12 Karupi kaqkunaqa wañunqaku peste onqoywanmi,

hina llaqtankupi kaqkunañataqmi wañunqaku guerrawan,

paykunamanta puchuqkunañataqmi wañunqaku yarqaywan.

Chayraqmi ñoqapa piñakuyniyta paykunapi cumplichisaq.

13 Altarninkupa muyuriqninpi hinaspa taytacha-mamachankupa chawpinpim chay wañuqkunapa cuerponta qawanqaku.

Chaykunataqa qawanqaku lliw alto moqokunapim,

lliw orqokunapa puntankunapim,

llapa kallmasapa sachakunapa ukunpim chaynataq lliw llaqesapa encina sutiyoq sachapa ukunpim.

Chaykunapiqariki paykunam taytacha-mamachakunaman miski asnaq perfumekunata ofrecerqaku.

Chaykunata qawaspankum paykunaqa yachanqaku Tayta Dios kasqayta.

14 Ñoqaqa castiganaypaqmi paykunapa contranpi hatarisaq,

surlaw chunniqmanta qallaykuspam yachasqanku naciontaqa norte lawpi Ribla llaqtakama pasaypaqta purmarachisaq.