2 —Runapa churin,

Israel nacionpi runakunatam ñoqa Señor Dios nini kaynata:

“Tukupaymi chayamuchkanña,

kay allpapa tawan lawninpa tukupayninmi chayamuchkanña.

3 Tukupaymi qamkunapa hawaykichikmanqa hamuchkanña.

Qamkunapa contraykichikpim piñakuyniyta kachaykamusaq.

Imayna kawsasqaykichikmantam cuentata mañasqaykichik hinaspam pagapusqaykichik millakuypaq kaqkuna rurasqaykichikmanta.

4 Manam llakipayakuywanñachu qamkunataqa qawasqaykichik,

castigasqaykichikpunim qamkunataqa.

Mana allin kawsasqaykichikmantawan millakuypaq kaqkuna rurasqaykichikmantam ñoqaqa pagapusqaykichik.

Chaynapim qamkunaqa yachankichik Tayta Dios kasqayta.

5 “Ñoqa Señor Diosmi nini kaynata:

Mana allinllam hamuchkan,

pasaypaq mana allinllam hamuchkan.

6 ¡Tukupaymi hamuchkan!

¡Tukupaymi hamuchkan!

Qampa contraykipim hatariramun,

waqaya hamuchkan.

7 Chay nacionpi yachaqkunapa pasaypaq purmachisqa kanaykichikmi chayamuchkanña,

ñam chayamuchkanña,

ñam hichpamuchkanña chaqwanakuna punchawqa,

manañam orqokunapipas kusikuyqa kanqachu.

8 Ñoqaqa piñakuyniytam qamkunapi cumplichisaq.

Imayna kawsasqaykichikmantam cuentata mañasqaykichik hinaspam millakuypaq kaqkuna rurasqaykichikmantapas pagapusqaykichik.

9 Manam llakipayakuywanñachu qawasqaykichik,

castigasqaykichikpunim qamkunataqa.

Mana allin kawsasqaykichikmantam hinaspa millakuypaq kaqkuna rurasqaykichikmantam ñoqaqa pagapusqaykichik.

Chaynapim yachankichik castigaqnikichik Tayta Dios kasqayta.

10 “Kayqayá chay punchawqa,

kayqayá chayamuchkanña chay punchawqa.

Purmachisqa kanaykichikmi ikllicharichkanña,

estacamanta iklliriqpas umparichkanñam,

runapa orgulloso kayninmi waytarichkanña.

11 Daño rurasqaykichikmi rikurirachin huk varata chaywan mana allinkunata ruranaykichikpaq ichaqa qori-qollqenkuwanqa hinaspa qaparkachasqankuwanqa manam imatapas horqokunqakuchu.

Paykunapiqa manam imapas sumaq kaqqa kanchu.

12 Tiempom chayaramunña,

punchawkunam hichparamunña.

Imapas rantiq runaqa amayá kusikuchunchu,

imapas rantikuq runaqa amayá llakikuchunchu.

Ñoqaqa piñakuywanmi castigasaq Israel llapallan runakunata.

13 Imapas rantikuq runaqa kawsanankamaqa manañam kutichikunqachu imapas rantikusqantaqa.

Chaynam piñakuywan castiganaypaq willakusqaypas cumplikunqapuni llapallan runakunapi.

Mana allin ruraq runakunaqa manapunim vidan librayta atinqakuñachu.

14 “Guerrapaq cornetillata tocaptinkupas,

llapallanku alistakuptinkupas manam pipas lloqsinqachu peleaqqa,

ñoqaqa piñakuywanmi castigasaq Israel llapallan runakunata.

15 Hawapiqa guerrallam kachkan,

ukupiñataqmi kachkan peste onqoywan yarqaylla.

Hawa chakrakunapi kaqkunaqa guerrawanmi wañunqaku,

llaqta ukupi kaqkunañataqmi yarqaymanta wañunqaku,

paykunataqa peste onqoymi tukurunqa.

16 Wakinqa orqokunaman ayqekuspankupas qechwapi palomakuna hinam llapallanku hikikyanqaku mana allin rurasqankumanta.

17 Llapallankupam brazollankupas warkurayanqa,

manchakuymantam moqollankupas katkatatanqa.

18 Paykunaqa llakimantam luto pachawan churakunqaku,

paykunaqa manchakuymantam katkatatanqaku,

uyankupas penqakuymanta pukayasqam chukchankutapas kachiy-kachiyta rutukunqaku.

19 Paykunaqa qollqenkutapas callemanmi wischunqaku,

wanu wischuchkaq hinam qorinkutapas wischunqaku.

Tayta Diospa piñakusqan punchawpiqa manam qori-qollqenkupas librayta atinqachu.

Paykunaqa manam saksanqakuchu manataqmi wiksankupas huntanqachu.

Qorinkum paykunataqa mana allinman urmaykachirqa.

20 Suma-sumaq alhajankuwanmi paykunaqa hatun tukuqllaña rikurirunku,

chaykunawantaqmi paykunaqa rurakurunku millakuypaq hinaspa cheqnisqay taytacha-mamachakunatapas.

Chayraykum paykunapa chay alhajantaqa wanuman hina tikrarusaq.

21 Ichaqa chay alhajankutaqa forastero runakunawanmi suwarachisaq,

chaykunataqa kay pachapi mana allin ruraq runakunawanmi qechurachisaq,

chaynapim chaykunataqa millakuypaqtaña rurarunqaku.

22 Kay naciontaqa qepanchakuruptiymi kuyayllapaq temploytapas millakuypaqtaña rurarunqaku,

salteaq runakuna chayman yaykuspanmi millakuypaqtaña rurarunqaku.”

23 —Qamqa huk cadenatayá ruray.

Chay nacionpiqariki wañuchinakuspa llumpay yawar chaqchuywan daño ruranakuyllañam kachkan.

24 Huklaw nacionkunamantam pusamusaq mana allin runakunata hinaptinmi paykunaqa llaqtapi wasikunata dueñochakuykunqa.

Atiyniyoq runakunatam humillarachisaqña,

santuarionkupas paykunapaqqa millakuypaq rurasqañam rikurirunqa.

25 Manchakuymantam paykunaqa lapapapanqaku,

hawka kawsakuyta maskaspapas manam tarinqakuchu.

26 Paykunaqa manaña tukuytam llakipa hapisqan kanqaku,

manaña tukuytataqmi mana allin noticiatapas uyarinqaku.

Yanqapaqmi Diosmanta willakuqtapas maskanqaku chaynapi imallatapas Diospa qawachisqanmanta willakunanpaq,

sacerdotekunapas manam kanqañachu ñoqa Diospa yachachisqaymanta yachachinanpaq.

Ancianokunapas manañam kanqachu allin consejokunata qonankupaq.

27 Reypas lutokuchkaq hinam aynanananqa,

kamachikuqpas pasaypaqtam hukmanyarunqa,

nacionpi yachaq runakunapa makinpas katkatatanqam.

Paykunataqa imaynam kawsasqankuman hinam castigasaq,

imaynam sentencia rurasqankuman hinataqmi ñoqapas sentenciasaq.

Chayraqmi paykunaqa yachanqaku Tayta Dios kasqayta.