Millakuypaq kaqkunata Ezequiel qawasqanmanta
8
Soqta kaq watapa soqta kaq killanpim hinaspa chay killapa pichqa kaq punchawninpim ñoqaqa wasiypi tiyachkarqani Juda castamanta kaq ancianokunapiwan kuska.
Hinaptinmi qonqaymanta Señor Dios hapiykuwarqa.
2 Chaymi rikururqani runa kaqllaman rikchakuqta,
paypa weqawninman rikchakuqmanta uraymanñataqmi rikurqani nina kaqllata,
chay weqawmanta hanaymanñataqmi rikurqani llipipipichkaq metalta hina.
3 Chay runaman rikchakuqmi makita hina haywarispa huk aptay chukchaymanta hapiruwarqa hinaptinmi Diospa Espiritun hoqariruwarqa altoneqman hinaspam Diospa chay revelasqanpi chayarachiwarqa Jerusalen llaqtaman,
chaymantam churaykuwarqa templopa norte law zaguanninpi,
chayqa kachkan uku kaq patioman yaykunapim,
chaypitaqmi kachkarqa huk mamacha,
chayraykum Tayta Diosqa piñasqa hinaspa sientikusqa kachkarqa.
4 Chaypimá kachkasqa Israel runakunapa Diosninpa kanchariynin.
Quebar Mayupa patan pampapi Diospa revelawasqan hinaraqmi chay kanchariyqa kachkasqa.
5 Chaymantam Diosqa kaynata niwarqa:
—Runapa churin,
qamqa norte lawmanyá qawariy —nispa.
Chaymi norte lawman qawarirqani hinaptinmi chay norte lawpi otaq altarman yaykunapa hichpanpi rikururqani chay mamachata,
chayraykum Diosqa sientikusqa kachkarqa.
6 Chaymantam niwarqataq:
—Runapa churin ¿qawachkankichum waknaña millakuypaq kaqkunata Israelpa castankuna rurasqanta?
Chaykunata ruraspankum santuarioymanta karunchakurunku.
Huktawanraqmi qamqa aswan hatun millakuypaq kaqkunataraq qawanki —nispa.
7 Chaymantañataqmi payqa pusaruwarqa patio yaykunaman hinaptinmi chay perqapi rikurqani huk uchkuta
8 chaymi niwarqataq:
—Runapa churin,
chay uchkuta aspispayá aswanraq hatunyarachiy —nispa.
—Yaykuspayá qaway millakuyllapaqña chaypi rurasqankuta —nispa.
10 Chayman yaykuykuspaymi muyuriqnin perqakunapi rikurqani dibujasqa qasqonpa puriq animalkunata,
millakuypaq hatun animalkunata chaynataq Israel castakunapa llapallan taytacha-mamachankutapas.
11 Chaykunapa ñawpaqninpiñataqmi kachkasqa Israel castamanta qanchis chunka ancianokuna,
paykunapa chawpinpiñataqmi sayachkasqataq Safanpa churin Jaazaniaspas,
paykunaqa sapakamam incienso qontichinayoq kachkasqaku hinaptinmi miskillaña asnarichkaq chaykunaqa altoman qosnirirqa.
12 Diosqa niwarqataqmi:
—Runapa churin ¿qawachkankichum Israel castakunapa ancianonkuna pakasqallapi imam rurasqankuta?
Chaykunataqa sapakamam rurachkanku taytacha-mamachankupa capillanpi.
Paykunam piensanku kikinkutaqa ñoqa Tayta Diosqa mana qawasqayta chaynataq nacionninkumantapas karunchakurusqayta —nispa.
13 Payqa niwarqataqmi:
—Chaykunamantapas aswan hatun millakuypaq rurasqankutaraqmi qamqa huktawan qawanki —nispa.
14 Chaymantam pusawarqa Tayta Diospa templon yaykunaman otaq norte lawpi kaq zaguanman.
Chaypim warmikuna tiyachkasqaku Tamuz sutiyoq taytachata waqapayaspanku.
15 Chaymi chay pusawaqniy niwarqataq:
—¿Qawachkankichum runapa churin?
Chaykunamantapas aswan hatun millakuypaq kaqkunataraqmi qamqa huktawan qawanki —nispa.
16 Chaymantam payqa pusaykuwarqa Tayta Diospa templon uku kaq pationman hinaptinmi santuarionman yaykunapi otaq altarmanta corredorman riqpa chawpinpi yaqa iskay chunka pichqayoq runakuna santuariota qepanchakururqaku,
paykunaqa intipa qespimunan lawman qonqorakuykuspam intita adorachkasqaku.
17 Chaymi Tayta Diosñataq niwarqa:
—Runapa churin ¿qawachkankichum kaykunata?
Judapa castankunataqa manam imapas qokunchu kay millakuypaq rurayninkuqa.
Paykunaqa kay naciontam daño rurayllawanña huntarachinku.
Paykunaqa huktawan-huktawanmi piñachiyllapi kawanku,
paykunaqa adoranankupaqmi kallmachatapas senqankumanraq churakunku.
18 Chaynaqa ñoqapas paykunamanmi piñakuyniyta kachaykusaq,
mana llakipayarispam paykunataqa castigasaqpuni,
qaparillawanña qayakuwaptinkupas manam paykunataqa qawarisaqchu.