—Llaqta castigaqkunaqa chayamuchunkuñayá,

tuñichinankupaq herramientantinkamayá paykunaqa chayamuchunku —nispa.

2 Hinaptinmi soqta runakuna hamuchkasqa hatun kaq punkupa zaguanninta,

chayqa qawachkan norte lawmanmi.

Chay hamuqkunaqa sapakamam hamuchkasqa mazo aptarisqakama.

Paykunapa chawpintam hamuchkasqa linomanta pachayoq huk runa.

Chay runam weqawninpi watasqata apamuchkasqa huk tinterota qellqananpaq,

yaykuramuspam sayaykurqaku broncemanta altarpa waqtanpi.

3 Hinaptinmi Israelpa Diosninpa kanchariynin hoqarikururqa.

Chay kanchariyqa querubin sutiyoq angelkunapa kasqanmanta hoqarikuruspam templo yaykunaman chayarurqa hinaspam chaymanta Tayta Dios qayarqa linomanta pachayoq weqawninpi tintero waqaychaq runata.

4 Paytam nirqa:

—Jerusalen llaqtapa chawpinkunapiyá puririy hinaspayá llaqtapi millakuypaq kaqkunamanta llakillawanña waqaq runakunapa urkunpi churamuy huk señalta —nispa.

5 Wakintañataqmi ñoqa uyarichkaptiy kaynata nirqa:

—Paypa qepanta qatispayá qamkunapas llaqtapi wañuchimuychik,

amam llakipayakuywanñachu qawankichik paykunataqa,

paykunataqa castigankichikpunimá.

6 Ama chullapas puchunankamayá wañuchiychik machukunata,

mozokunata,

doncellakunata,

wawakunata hinaspa warmikunata,

chay urkunpi señalniyoq kaqkunataqa amam imanankichikchu.

Qamkunaqa qallaykunkichik santuarioymantamá —nispa.

Chaynapim paykunaqa wañuchirqaku templopa ñawpaqninpi kaq ancianokunamanta qallaykuspa.

7 Paykunatam nirqataq:

—Temploman rispaykichikyá millakuyllapaqtaña ruraramuychik,

pationkunatapas wañusqakunawanyá huntarachimuychik.

Chaynaqa lloqsiychikyá —nispa.

Chaynapim paykunaqa llaqtaman lloqsiruspanku runakuna wañuchiyta qallaykurqaku.

8 Paykunata wañuchinankukamañataqmi ñoqaqa sapallayña qeparurqani.

Qonqoranpa pampaman kumuykuspaymi qaparirqani:

—Señor Dioslláy ¿Israel castakunamanta asllaña puchuqpas tukurunaykipaqchum Jerusalen llaqtaman piñakuynikita kachaykamunki?

—nispa.

9 Hinaptinmi Señor Dios kaynata niwarqa:

—Israel castakunapa mana allin rurasqankuqa nana-nanaqmi rikurirun.

Kay nacionqa yawarpa pampaykusqanñam kachkan,

kay llaqtapas llumpay mana allin ruraykunapa intusqallanñam kachkan.

Paykunaqa piensanku ñoqa Tayta Diosqa nacionninkumanta karuncharusqaytam chaynataq paykunataqa manaña qawasqaytam.

10 Paykunataqa manaña llakipayaspaymi castigasaqpuni,

paykunamanqa imaynam kawsasqankuman hinam ñoqapas pagapusaq —nispa.

11 Hinaptinmi chay linomanta pachayoq weqawninpi tintero waqaychaq runa kutiramuspan nirqa:

—Kamachiwasqaykitaqa ñam ruraramuniña —nispa.