—Wak querubin sutiyoq angelkunapa ukunpi kaq ruedakunapa chawpinmanyá yaykuy hinaspayá paykunapa chawpinpi kaq nina sansata hapispayki maqchiy llaqtapa hawanman —nispa.

Chaymi chay runaqa qawachkaptiy yaykururqa.

3 Querubin sutiyoq angelkunañataqmi chay qari yaykunankama templopa surlawninpi sayachkarqaku,

ukulaw patiomanñataqmi puyu huntaykurqa.

4 Chaymi Tayta Diospa kanchariynin hoqarikururqa chay querubin sutiyoq angelkunapa hawanmanta hinaspam chayarurqa templo yaykunaman,

chaynapim chay puyuqa temploman huntariykurqa,

chay patiopas Tayta Diospa llipipipiq kanchariyninwanmi huntarirqa.

5 Chay querubin sutiyoq angelkunapa rapranpa rapapapasqanmi uyarikurqa hawa patiokamaraq,

chayqa uyarikurqa Tukuy Atiyniyoq Diospa rimasqanman hinam.

6 Chay linomanta pachayoq runata Tayta Dios kamachispanmi nirqa:

—Wak querubin sutiyoq angelkunapa ukunpi kaq ruedakunapa chawpinmantayá nina sansata horqoy —nispa.

Chaynapim chay runaqa yaykuruspan huk kaqnin ruedapa waqtanpi sayaykurqa.

7 Chay querubin sutiyoq angelkunapa hukninmi paykunapa chawpinpi kaq ninaman makinta haywariykurqa hinaspam nina sansata hoqariruspan qoykurqa chay linomanta pachayoq runapa makinman hinaptinmi payqa chaskiykuspan lloqsirqa.

8 Chay querubin sutiyoq angelkunapa rapran ukupimiki rikurirurqa runapa makin kaqlla.

9 Qawarispaymi querubin sutiyoq angelkunapa waqtanpi rikurqani tawa ruedata,

sapakamapa waqtanpim kachkasqa huk rueda,

chay ruedakunam llipipipichkarqa topacio alhaja rumi hina.

10 Chay tawantin ruedakunam karqa kaqkamalla,

rikchayninqa karqa iskay chakanakuq rueda hinam.

11 Mana muyurispam uyanku lawman derecholla riqku,

punta kaq ruedakunapa kasqanmanmi qepanpi kaq ruedakunapas qatiq mana muyurispa.

12 Paykunapaqa tukuy muyuriqnin cuerponkum,

wasantin,

makintin hinaspa raprantin chipipipiqllaña kachkasqa,

hina chaynataqmi kachkasqa tawantin ruedankunapas.

13 Ñoqa uyarichkaptiymi chay ruedata suticharqa “muyuq ruedawan.”

14 Chay querubin sutiyoq sapakama angelkunam karqa tawa uyayoq,

huknin uyanmi karqa querubin sutiyoq angelpa uyan kaqlla,

iskay kaq uyanñataqmi karqa runapa uyan kaqlla,

kimsa kaq uyanñataqmi karqa leonpa uyan kaqlla,

chay tawa kaq uyanñataqmi karqa ankapa uyan kaqlla.

15 Chay querubin sutiyoq angelkunaqa karqa Quebar Mayupa patanpi qawasqay kawsachkaq animalkunam.

Chaynapim chay querubin sutiyoq angelkunaqa hoqarikururqa.

16 Chay querubin sutiyoq angelkuna puriptinmi chay waqtankupi ruedakunapas puririqtaq,

pampamanta hoqarikunankupaq raprankuta hoqariptinkupas ruedakunaqa waqtankumantam mana karunchakurqachu.

17 Paykuna sayaykuptinpas sayaykuqtaqmi ruedakunapas,

paykuna hoqarikuptinpas hoqarikuqtaqmi ruedakunapas,

chaynaqa karqa chay kawsachkaq animalkunapi espiritupas chay ruedakunapi kasqanraykum.

18 Chaymantam Tayta Diospa kanchariyninqa templo yaykuna lawmanta hoqarikurqa hinaspam sayaykurqa chay querubin sutiyoq angelkunapa hawanpi.

19 Hinaptinmi chay querubin sutiyoq angelkunaqa raprankuta hoqariruspa qawachkaptiy pampamanta hoqarikurqaku,

paykuna pawarikuptinqa waqtankupi ruedakunapas paykunawanmi hoqarikurqa hinaspam sayaykurqaku Tayta Diospa templonman yaykuna zaguanpa hawanpi.

Chaynapimá Israelpa Diosninpa kanchariyninqa paykunapa hawanpi kachkarqa.

20 Chaykunaqa karqa Quebar Mayupa patanpi Israelpa Diosninpa ukunpi rikusqay kawsachkaq animalkunam,

chaymi ñoqaqa musyarurqani paykunaqa querubin sutiyoq angelkuna kasqanta.

21 Paykunaqa sapakamam karqaku tawa uyayoq chaynataq tawa raprayoq,

paykunapa raprankupa ukunpiñataqmi kachkasqa runapa makin kaqlla.

22 Uyankupas kasqa Quebar Mayupa patanpi rikusqay kaqllam,

paykunaqa derechollam ñawpaqman riqku.