—Runapa churin,

kay runakunam sonqonkupi tanteachkanku pasaypaq mana allinkunallata,

kay llaqtapiqa mana allinllatataqmi consejachkanku:

3 “Manapas unaypim ñoqanchikqa wasinchikta perqarusunchik.

Mankapi aychapas hawka kasqanman hinam kakusunchik” nispa.

4 Chaynaqa paykunapa contranpiyá willakuy runapa churin.

5 Tayta Diospa Espiritun huntaykuwaspanmi kaynata niwarqa:

—Ñoqa Tayta Diosmi nini:

“Israelpa castankuna,

chaynakunata rimaptikichikpas ñoqaqa yachanipunim imam chay tanteasqaykichiktaqa.

6 Qamkunaqa kay llaqtapim llumpayllataña runakunata wañurachinkichik,

qamkunaqa callen-callenmi runa wañusqawan huntarachinkichik.

7 Chayraykum ñoqa Señor Dios kaynata nini:

Jerusalen llaqtaqa kanqa huk manka hinam ichaqa chay ukunpi aychaqa manam qamkunachu kankichik,

chayqariki wañuchisqaykichik runakunapa ayanmi,

qamkunataqariki chay mankamantam horqorusqaykichik.

8 Ñoqa Señor Diosmi nini kaynata:

Qamkunaqariki guerratam manchakunkichik,

chaynaqa guerratam qamkunaman apamusqaykichik.

9 Qamkunataqa llaqtamantam qarqorusqaykichik hinaspam forastero runakunaman qoykusqaykichik,

chaynapim sentenciayta rurasaq.

10 Qamkunaqa guerrapim wañunkichik,

Israel nacionpa linderonpim ñoqaqa qamkunata castigasqaykichik,

chaynapim qamkunaqa yachankichik Tayta Dios kasqayta.

11 Llaqtaqa manam manka hinachu kanqa qamkunapaqqa,

manataqmi qamkunaqa chaypa ukunpi aycha hinachu kankichik,

ñoqam qamkunataqa castigasqaykichik Israel nacionpa linderonkunapi.

12 Chaynapim qamkunaqa reqsinkichik Tayta Dios kasqayta,

qamkunaqariki manam kawsarqankichik decretoykunaman hinachu,

manataqmi leyniykunatapas cumplirqankichikchu,

aswanqa rurarqankichikpas muyuriqnikichikpi nacionkunapa costumbreman hinam.”

13 Tayta Diospa rantinpi rimachkaptiymi Benaiaspa churin Pelatias qonqayta wañururqa,

ñoqañataqmi qonqoranpa pampaman kumuykurqani kaynata qaparispay:

—Ay,

Señor Dioslláy ¿Israel castakunamanta puchuqllatapas lliwtachum tukurunki?

—nispa.

14 Tayta Diosmi kaynata niwarqa:

15 —Runapa churin,

Jerusalen llaqtapi yachaq Israel casta llapallan runakunam qampa aylluykikunamanta rimachkanku kaynata:

“¡Paykunaqa Tayta Diosmanta karunchasqam kachkanku!

Ñoqanchikmanmi ichaqa qoykuwanchik kay nacionta dueñochakunanchikpaq” nispa.

16 Chaynaqa ñoqa Señor Diospa nisqaytayá paykunaman niy kaynata:

“Ñoqam qamkunataqa nacionkunaman karuncharachikichik hinaspam tukuy hinastinman cheqerachikichik,

chaywanpas chay cheqesqa kasqaykichik nacionkunapim santuarioykichik kasaq as tiempollapaq” nispa.

17 Niytaqyá ñoqa Señor Diospa kayna nisqayta:

“Ñoqam qamkunataqa chay nacionkunamanta kutichimusqaykichik,

cheqechisqay tukuy hinastinmanta huñunaykamuspaymi Israelpa allpankunata qosqaykichik.

18 Chay kutiqkuna llaqtankuman yaykuspankum chinkachinqaku llapallan cheqnisqay kaqkunata hinaspa llapallan millakuypaq kaqkunata.

19 Chaynapim ñoqaqa paykunaman qosaq mana iskayrayaq sonqotaña hinaspa mosoq espiritutaña.

Ñoqaqa rumi hina sonqonkuta aychankumanta qechuruspaymi llampu sonqotaña qoykusaq.

20 Chayraqmi paykunaqa decretoykunaman hina kawsanqaku,

chayraqmi paykunaqa leyniykunata kasukuspa cumplinqaku.

Paykunaqa kanqaku ñoqapa runaykunam,

ñoqañataqmi kasaq paykunapa Diosnin.

21 Ichaqa cheqnisqaykunaman hinaspa millakusqaykunaman hina kawsaq runataqa chayna kawsasqanmantam castigasaq.

Chaynatam nini ñoqa Señor Dios.”

22 Querubin sutiyoq angelkunam raprankuta hoqarirqaku,

paykunawantaqmi hoqarikurqa waqtankupi ruedakunapas,

paykunapa hawanpiñataqmi kachkasqa Israelpa Diosninpa kanchariynin.

23 Hinaptinmi chay Tayta Diospa kanchariyninqa llaqtapa chawpinmanta hoqarikuruspan sayaykurqa huk orqopa hawanpi,

chay orqoqariki kachkan intipa qespimunan lawman qawaq llaqtapa cantonpim.

24 Hinaptinmi Diospa Espiritunñataq hina chay revelawasqanpi hoqariruwaspan kutirichiwarqa Babilonia nacionman,

chaypim kachkarqaku preso pusasqa kaqkunamanta wakinkunapas.

Chaymantañam revelacionpi Diospa qawachiwasqanqa hoqarikuruspan chinkarurqa.

25 Hinaptinmi preso pusasqa chaypi kaqkunaman willarqani Tayta Diospa tukuy ima qawachiwasqanta.