Ezequielmi willakun preso pusasqa kanankumanta
12
Tayta Diosmi huktawan rimapayawaspan kaynata niwarqa:
2 —Runapa churin,
qamqariki yachachkanki mana kasukuq castakuna ukupim,
paykunaqa ñawiyoq kaspapas manam rikukunkuchu,
paykunaqa rinriyoq kaspapas manam uyarikunkuchu,
paykunaqariki kanku mana kasukuqkunapa castankunam.
3 Chaynaqa runapa churin,
allichakuyá imaykikunatapas preso pusasqa hina lloqsinaykipaq,
chaytaqa ruranki punchawpi paykuna qawasuchkaptikim.
Chaynaqa wasikimanta lloqsispayá huklawman pasakuy,
ichapas chaynapi kay runakunaqa musyakunmanku mana kasukuqkunapa castan kasqankuta.
4 Chaynaqa preso pusasqa hina rinaykipaqyá punchawpi lliw qawasuchkaptiki imaykikunatapas horqoy hinaspayá tardeykuqta lliw qawasuchkaptiki lloqsiy preso pusasqa lloqsichkaq hina.
5 Qamqa lliw qawasuchkaptikim wasikipa perqanta uchkuruspa imaykikunatapas chayninta apanki.
6 Chaynapim tutaykamuchkaqtaña imaykikunatapas sawakuykuspa lloqsinki lliw qawasuchkaptiki,
ichaqa uyaykitaqa tapakurunkim muyuriqnikipi kaqkunata ama qawanaykipaq.
Israel castakunapaq huk señal kanaykipaqmi churaruyki qamtaqa —nispa.
7 Chaynatamá ñoqaqa rurarqani Tayta Diospa kamachiwasqanman hina,
preso pusasqa hinam punchawpi imaykunatapas horqorurqani,
tardeykuqtañataqmi wasiypa perqanpi huk uchkuta rurarurqani hinaspam tutaykamuchkaqtaña lliw qawawachkaptinku imaykunatapas sawakuykuspay pasakurqani.
8 Paqarinnintin achikyaytañataqmi Tayta Dios niwarqa:
9 —Runapa churin,
manachum “¿Imatataq rurachkanki?”
nispallapas tapusurqanki mana kasukuq Israelpa castankunaqa.
10 Chaynaqa paykunatayá kaynata niy:
“Kay encargoyqa Jerusalen llaqtapi kamachikuqpaqmi chaynataq chaypi tarikuq Israelpa llapallan castankunapaqmi” nispa.
11 Paykunatayá niy:
“Ñoqam qamkunapaq kani huk señal hina,
kay rurasqaypi hinam Jerusalen llaqtapi kaqkunapas rurasqa kanqa.
Paykunaqariki kanqaku llaqtankumanta preso pusasqam.
12 Paykunapa chawpinpi kaq kamachikuqpas imankunatapas sawarikuspam tutaykuqta lloqsinqa perqapi rurasqanku uchkunta,
payqa muyuriqninpi kaqkunata mana qawananpaqmi uyanta tapakurunqa.
13 Ñoqañataqmi paypa hawanman mallata otaq toqllata wischuchkaq hina payta aswanraq hapirusaq hinaspam pusachisaq Caldea runakunapa yachanan Babilonia nacionman,
chaymanqa mana qawakuqña chayaruspam chaypi wañukunqa.
14 Paypa muyuriqninpi kaq llapallan yanapaqninkunatapas chaynataq llapallan tropankunatapas tukuy hinastinmanmi cheqerachisaq hinaspam espadayta horqoykuspay paykunata qatikachasaq.
15 Nacionkunaman cheqerachispa tukuy hinastinman wischuruptiyñam yachanqaku Tayta Dios kasqayta.
16 Ichaqa asllatapas puchuykachisaqmi guerramanta,
yarqaymanta hinaspa peste onqoymanta,
chaynapi maylaw nacionkunamanña rispapas millakuypaq rurasqankumanta willakunankupaq.
Chaynapim paykunaqa yachanqaku Tayta Dios kasqayta.”
Huktawanmi willakun castigomanta
17 Tayta Diosmi huktawan rimapayawaspan kaynata niwarqa:
18 —Qamqa runapa churin,
katkatatastinyá mikuytapas mikuy,
manchakuymanta hukmanyastintaqyá yakutapas tomay.
19 Hinaspayá nacionpi runakunata niy kaynata:
“Jerusalen llaqtapi yachaqkunatawan muyuriqninpi yachaqkunatam Tayta Dios nin kaynata:
‘Daño ruray kasqanraykum mikuynikichiktapas mikunkichik manchakuyllawanña,
pasaypaq hukmanyasqam yakuykichiktapas tomankichik,
chaypi yachaqkuna daño rurasqankuraykum nacionnikichikqa karunqa mana imayoq purmasqaña.
20 Runakunapa yachasqan llaqtakunaqa tuñichisqam kanqa,
nacionnikichikpas purmachisqam karunqa hinaptinmi qamkunaqa yachankichik Tayta Dios kasqayta.’ ”
21 Tayta Diosmi huktawan rimapayawaspan kaynata niwarqa:
22 —Runapa churin ¿imaninantaq Israel nacionpi:
“Punchawkuna pasaptinpas Diosmanta willakuqpa revelacionninpi rikusqanqa manam cumplikunchu” nispa nisqankuqa?
23 Chaynaqa ñoqa Señor Diospa kayna nisqaytayá niy:
“Israel nacionpiqa manaña masta rimanaykichikpaqmi chinkarachisaq chay rimakuynikichikta.
Ñam hichpamuchkanña chay punchawkunaqa.
Ñam chayamuchkanña revelacion qawachisqaypa cumplikuyninqa.
24 Israel castakuna ukupiqa manañam kanqañachu:
‘Diosmi revelaykuwan’ nispa llullakuqkunapas,
manañataqmi kanqachu adivinaq tukuspa hatunchakuy munaq runakunapas.
25 Kikiypunim ñoqa Tayta Diosqa rimarisaq imam rimanayta,
manaña unaspam chay rimasqaytaqa cumplisaq.
Mana kasukuqkunapa castankuna,
kawsasqaykichik punchawkunam ñoqaqa rimasaq hinaspam cumplisaqtaq.
Chaynatam ñoqa Señor Dios nini.”
26 Tayta Diosmi huktawan rimapayawaspan kaynata niwarqa: