2 —Runapa churin,

Israel nacionpi ñoqamanta willakuq tukuqkunapa contranpiyá qamqa willakuy,

sonqollankumanta horqoykuspa willakuqkunatayá rimapayay kaynata:

“Uyariychikyá Tayta Diospa rimasqanta.

3 Señor Diosmi nin kaynata:

¡Ay rumi sonqo willakuqkuna,

imaynaraq kankichik!

Qamkunaqariki mana revelasqa kachkaspam sonqollaykichikmanta arteykunkichik.

4 Israel castakuna,

raqaykunapi yachaq atoqkuna hinam qamkunaman willasuqnikichikkunaqa.

5 Llaqtata defiendeq runa hinaqa manam seqarqakuchu murallapa tuñisqanmanpas,

manataqmi paykunaqa chaykunatapas perqarqakuchu chaynapi Tayta Diospa castiganan punchawpi Israel castakunapa qayllanpi defiendenankupaq.

6 Paykunaqa revelacionpi qawaspankupas yanqakunallatam qawanku,

llullallatataqmi adivinankupas,

paykunam ninku:

‘Kaynatam Tayta Dios nin’ nispanku ichaqa ñoqa Tayta Diosqa manam paykunataqa kacharqanichu.

Paykunaqa chay rimasqanku cumplikunantapas suyankuraqmi.

7 ¡Revelacionpi qawasqankuqa yanqa kaqllam!

¡Adivinasqankupas hina llullallataqmi!

Paykunaqa ñoqamanta rimasqankupaqmi hapikunku.

Ichaqa manam imatapas nirqanichu.

8 Chayraykum ñoqa Señor Dios nini chay yanqa willakuqkunaman:

Qamkunaqa yanqakunata rimaspam revelacionpipas llullallatataq qawarqankichik,

chayraykum ñoqaqa contraykichikpi kachkani.

Ñoqa Señor Diosmi nini chaynata.

9 Chaynaqa ñoqamanta willakuq tukuspa revelacionpi yanqa qawaqkunapa contraykichikpim ñoqaqa hatarisaq,

chaynallatam rurasaq llullalla adivinaqkunawanpas.

Qamkunaqa runaykuna tanteanakunanpaq huñunakuptinkupas manam chaypichu kankichik.

Qamkunapaqa sutikichikpas manam qellqasqachu kanqa Israel castakunapa listanpiqa hinaspapas qamkunaqa manataqmá kutinkichikchu Israel castakunapa allpanmanqa,

chaynapim yachankichik Tayta Dios kasqayta.”

10 “Arí,

chay yanqa willakuqkunaqariki runaykunatam engañarusunkichik ‘Hawkallam kachkanchik’ nispa,

chaynataraqmi nisurqankichik mana hawkalla kachkaptikichikpas.

Paykunaqa rikchakunku kuyuchkaq perqata hawallan llusaykuq runamanmi.

11 Yaw Ezequiel,

chay perqapa hawallan llusaq runakunatayá niy kaynata:

‘Chay perqaqa wichiykamunqam,

nisyullay-nisyum para chayaramunqa,

runtu-parapas rumi hinam wichimunqa,

vientopas qaparillawanñam pukumunqa.

12 Hinaptinmi chay perqa tuñiykuptin runakunañataq tapukunqaku:

¿Imataq pasarun chay llusasqaykichik perqawanqa?’

nispa.

13 Chayraykum ñoqa Señor Dios kaynata nini:

Ñoqaqa piñakuspaymi pukumusaq qaparillawanña hamuq vientota,

rabiallawanñam nisyullay-nisyuta parachimusaq,

runtu-paratapas rumita hinañam wichichimusaq chaynapi tukuy imatapas piñakuywan tukurunaypaq.

14 Ñoqaqa tuñirachisaqmi chay hawallan llusasqaykichik perqataqa,

pampaman wikaparuptiymi cimientonpas rikurichkaqña karunqa.

Arí,

chay perqa wichiykuptinmá qamkunapas wañunkichik chay monton rumikunapa chawpinpi.

Chaynapim yachankichik Tayta Dios kasqayta.

15 Ñoqaqa piñakuywanmi chay perqata tuñirachisaq,

chaynallatataqmi rurasaq chay perqapa hawan llusaq runakunawanpas hinaspam nisqaykichik:

Manam perqapas nitaq hawan llusaqkunapas kanñachu,

nispa.

16 Israel nacionpi ñoqamanta willakuq tukuqkunam Jerusalen llaqtapi yachaqkunaman willakurqaku revelacionninkuman hinaqa llapallanku hawka kanankumanta,

ichaqa manam kanchu chay hawka kawsakuyqa.”

Chaynatamá nini ñoqa Tayta Dios.

17-18 —Chaynaqa runapa churin,

kunanñataqyá qawariy runaykuna ukupi ñoqamanta willakuq tukuq warmikunata.

Paykunaqariki sonqonkumanta horqoykuspallam rimanku,

chaynaqa ñoqa Señor Diospa kayna nisqaytayá paykunapa contranpi niy:

“Ay ¡imaynaraq kankichik chimpitakunata runakunapa maki llañunpaq siraqkuna!

Ay ¡imaynaraq kankichik taksapaqpas-hatunpaqpas qoysu sukupa ruraqkuna!

Chaykunataqa rurankichik runakunata engañanaykichikpaqmi.

¿Chaykunawan runaykunata engañaspaykichikchu kikikichik cuidakuyta munankichik?

19 Qamkunaqariki runaykuna ukupim huk aptay cebadallapaq hinaspa huk parten tantallapaq millakuypaqta hinaña ruraruwankichik,

qamkunaqariki mana wañunanpaq kaq runakunatam wañurachinkichik.

Llullalla uyariq runaykunatam qamkunaqa llullakuykunkichik.

20 Chayraykum Ñoqa Señor Dios kaynata nikichik:

Ñoqaqa runakunapa maki llañunpaq chimpitakuna rurasqaykichikpa contranpim kachkani,

chaywanmi qamkunaqa runakunata urpitukunata hina engañarunkichik.

Chay runakunataqa ñoqam makikichikmanta librasaq hinaspam urpituta kachaykuchkaq hina kachaykusaq.

21 Chay rurasqaykichik qoysu sukupakunatapas qechuruspaymi,

runaykunataqa makikichikmanta librarusaq,

paykunataqa librarusaq manaña masta makikichikpi preso kanankupaqmi,

chaynapim qamkunaqa yachankichik Tayta Dios kasqayta.

22 Ñoqa mana llakichichkaptiypas allin ruraqkunatam llullakuykuspa hukmanyarachinkichik,

mana allin ruraqkunatam ichaqa aswanraq kallpanchaykunkichik chaynapi mana allin kawsasqankumanta mana wanakunankupaq hinaspa mana kawsanankupaq.

23 Chayraykum revelacionpi yanqa kaqkuna qawasqaykichikpas manaña kanqachu hinaspapas qamkunaqa manañam adivinankichikchu,

chaynapim ñoqaqa runaykunata makikichikmanta librarusaq hinaptinmi yachankichik Tayta Dios kasqayta.”