Taytacha-mamacha adoraqkunaqa castigasqa kanankumanta
14
Israel castakunapa wakin ancianonkuna hamuspam ñawpaqniypi tiyaykurqaku.
2 Hinaptinmi Tayta Dios kaynata niwarqa:
3 —Runapa churin,
kay runakunaqa sonqonkutam kichaykun taytacha-mamachakunaña munaychakunanpaq,
paykunaqa urmarunankupaqmi taytacha-mamachankuta ñawpaqninkuman sayaykachinku.
¿Chaychum ñoqaqa tapuwanankutaraq dejayman?
4 Chaynaqa ñoqa Señor Diospa kayna nisqaytayá paykunaman niy:
“Israel castakunamanta pipas taytacha-mamachankuman sonqon kichaykuqqa hinaspa urmarunanpaq ñawpaqninman chay taytacha-mamacha sayaykachiqqa willakuqniyman tapukuq hamuptinpas paykunatam chay achka-achka taytacha-mamachankuman hina contestasaq” nispa.
5 —Chaytaqa rurasaq Israel castakunapa sonqonta preso hapichkaq hina hapinaypaqmi,
paykunaqariki llapallankum chay taytacha-mamachankurayku ñoqamanta karunchakurunku.
6 Chaynaqa ñoqa Señor Diospa kayna nisqaytayá Israel castakunaman niy:
“Qamkunaqa taytacha-mamachaykichikkunata hinaspa millakuypaq kaqkunata qepanchakuspayá ñoqaman kutirikamuychik.
7 Israelpa castankunamanta otaq qamkunawan yachaq forasterokunamanta pipas ñoqamanta karunchakaruspanqa hinaspa sonqonta taytacha-mamachakunaman kichaykuspanqa chaynataq urmarunanpaq ñawpaqninman chay taytacha-mamachakunata sayaykachispanqa willakuqniyman tapukunanpaq hamuptinpas ñoqa Tayta Diospunim contestasaq.
8 Wakinpaqpas ejemplo hina kananpaqmi ñoqaqa paypa contranpi sayariruspay chinkarachisaq,
runakunapa rimakunantam ñoqaqa rurarusaq,
chinkarachisaqtaqmi runaykunapa chawpinmantapas.
Chayraqmi yachankichik Tayta Dios kasqayta.
9 “Sichum ñoqamanta willakuq piwanpas convencerachikuspa yanqata rimaptinqa ñoqam paytaqa pantarachini,
paytaqa ñoqam castigasaq,
chinkarachisaqtaqmi Israel runaykunapa chawpinmantapas.
10 Paykunaqa iskayninkumá castigasqa kanqaku chay mana allin rurasqankumanta,
ñoqamanta yanqa willakuqtapas chaynataq tapuqnintapas castigasaqpunim.
11 Chaynapim manaña karunchakuwanqakuchu nitaqmi mana kasuwasqankuwanqa millakuypaq hinañachu kanqaku.
Chaynapim paykunaqa kanqaku ñoqapa runaykunaña,
ñoqañataqmi kasaq paykunapa Diosnin.
Chaynatam nini ñoqa Señor Dios.”
Jerusalen llaqta castigo merecesqanmanta
12 Tayta Diosmi rimapayawaspan niwarqataq kaynata:
13 —Runapa churin,
sichum traicionawananpaq huk kaqnin nacionpi runakuna huchallikuptinqa paykunatam castigarusaq,
lliw mikunankutapas chinkarachisaqmi,
paykunamanqa yarqayta kachaykuspaymi runakunatapas hinaspa animalkunatapas wañurachisaq.
14 Sichum chay nacionpi yachanmanku Noey,
Daniel hinaspa Job hinaspaqa chay kimsallankuch allin rurasqankurayku salvakunmanku.
Chaynatam nini ñoqa Señor Dios.
15 —Sichum runa mikuq purun animalkunata chay nacionman kachaykuptiy chaypi wawa-churinkuta tukurunman chaynapi chay nacion purmaruptin chay animalkunata manchakuspan manaña chayninta pipas puriptinqa
16 Ñoqa Señor Diosmi kikiyrayku jurani:
Chay kimsa runakuna chay nacionpi yachaspanqa manach churinku salvaytapas atinmankuchu,
aswanqa kikillankuch salvakurunmanku hinaptinchá chay nacionqa purmarunman.
17 —Sichum chay nacionman guerrata kachaykuspay runakunatawan animalkunata wañuchinanpaq kamachispayqa,
18 ñoqa Señor Diosmi kikiyrayku jurani:
Chay kimsa runakuna chay nacionpi yachaspanqa manach churinku salvaytapas atinmankuchu aswanqa kikillankuch salvakurunmanku.
19 —Sichum chay nacionman peste onqoyta kachaykuyman chaynapi piñakuyniywan runakunatawan animalkunata tukurunanpaq hinaptinqa
20 ñoqa Señor Diosmi kikiyrayku jurani:
Noey,
Daniel hinaspa Job chay nacionpi yachaspankuqa manach churinku salvaytapas atinmankuchu aswanqa allin rurasqankuraykuch kikillanku salvakurunmanku.
21 —Chaynaqa ñoqa Señor Diosmi nini kaynata:
Aswanraqmi kanqa Jerusalen llaqtaman runakunatawan uywa animalkunata wañuchinaypaq tawantin manchakuypaq castigokunata apachimuptiyqa.
Chaykunaqariki guerrakunapiwan yarqaymi hinaspa runa mikuq purun animalkunapiwan peste onqoymi.
22 Chaywanpas wakinpa qaripas-warmipas churinkunam puchuruspa hawaman lloqsichisqa kanqaku,
paykunaqa qamkunaman hamuptinmi imaynam kawsasqankuta hinaspa imakunam rurasqankuta qawankichik hinaptinmi Jerusalen llaqta castigasqaymantawan tukuy mana allin apamusqaymanta chayraq sonqoykichikpas tiyaykunqa.
23 Qamkunaqa qawankichikmá imaynam kawsasqankuta hinaspa imakunam rurasqankuta,
chaynapim yachankichik Jerusalen llaqtataqa mana yanqapunichu castigasqayta.
Ñoqa Señor Diosmi nini chaynata.