Israel runakunaqa mana valeq uvas plantawan tupachisqa kasqanmanta
15
Tayta Diosmi rimapayawaspan niwarqataq kaynata:
2 Runapa churin
¿uvas plantapa kullunchu masta valenman
wakin sachakunapa kullunmantapas?
¿Uvas plantapa kallmanchu masta valenman
monte sachakunapa kallmankunamantapas?
3 ¡Uvas kullumantaqa manam ruranmankuchu
ima obrallatapas!
¡Uvas kullumantaqa manam ruranmankuchu
warkukuna estacallatapas!
4 Chay uvas kulluqa kañanapaqmi
ninaman wischusqa.
Chay uvas kullupaqa iskaynin puntanmi
kañakurunqa.
Hinaptinmi chaykunapa chawpinqa
carbonyarunqa.
¿Hinaptinqa yaqachum imallapaqpas
servikunqa?
5 Enterollanraq kachkaspan
mana imapaqpas servikuchkaspanqa
¿mana valeqñachu karunman
kañakuspa carbonyaruspanqa?
6 Chayraykum ñoqa Señor Dios nini kaynata:
Imaynam purun sachatawan kuskata
ninaman wischunku uvas sachapa kulluntapas,
chaynatapunim rurasaq Jerusalenpi yachaqkunatapas.
7 Paykunapa contranpim sayarisaq ñoqaqa.
Ninapa rupayninmantaña ayqeruptinkupas
huk ninam paykunataqa kañarunqa.
Chaynaqa castigasaqmá paykunataqa,
chaynapim yachankichik Tayta Dios kasqaytaqa.
8 Chaynaqa purmachisaqmi kay nacionnikichikta.
Traicionawasqaykichikmantam purmachisaq kay nacionta.
Ñoqa Señor Diosmi nini chaynata.