2 Chaynata rimapayawanankamam ñoqaman huntaykuwarqa Diospa Espiritun hinaspam sayarirachiwarqa chaymi uyarirqani rimapayawaqniyta.

3 Paymi kaynata niwarqa:

—Runapa churin,

qamtam kachasqayki Israelpa mirayninkunaman.

Paykunaqariki ñoqapa contraypim hoqarikurqaku.

Paykunapas chaynataq abuelonkupas kunan punchawkamam ñoqataqa mana kasuwankuñachu.

4 Ñoqaqariki kachachkayki qara uya rumi sonqo runakunamanmi.

Paykunatam ninki ñoqa Tayta Diospa imam nisqayta.

5 Qamqa ninkimá uyarisuptiki otaq mana uyarisuptikipas.

Paykunaqariki kanku mana kasukuqkunapa castankunam.

Ichaqa yachanqakum paykunapa chawpinpiqa ñoqamanta willakuq huk runa kasqanta.

6 Runapa churin,

amam qamqa manchakunkichu paykunataqa nitaq imam nisusqaykitapas.

Kichkakunapa muyuykusqan hinaña kaspapas otaq atoq-atoq urukunapa chawpichasqanña kaspapas amam manchakunkichu.

Amamá manchakunkichu imataña nisuptikipas,

amataqmá hukmanyankichu paykunapa qayllanpiqa.

Paykunaqariki kanku mana kasukuqkunapa castankunam.

7 Qamqa imam nisqaykunatam willankipuni uyariptinku otaq mana uyariptinkupas.

Paykunaqariki kanku mana kasukuqkunam.

8 Chaynaqa runapa churin,

allintayá uyariy kay nisqaykunata.

Amayá chay mana kasukuqkunapa castankuna hinaqa kaychu.

Simikita kicharispayá mikuy kay qosqayta —nispa.

9 Qawariptiymi huk maki haywamuwachkasqa huk wankusqa librota.

10 Qawachkaptiymi chay wankusqa libroqa mastarikuykurqa hinaptinmi chaypiqa ñawpaqninpipas chaynataq qepanpipas qellqasqa kasqa aya takikuna,

llakiwan hapichikuykuna hinaspa llaki waqaykuna.