EZEQUIELPA QELLQASQAN LIBRO
Diosta tiyananpi Ezequiel rikusqanmanta
1
1-3 Ñoqam kani Buzi sutiyoq runapa churin sacerdote Ezequiel.
Huk punchawmi kachkarqani Quebar sutiyoq mayupa patanpi.
Chay mayuqariki kachkan Babilonia nacionpim.
Chaypimá kachkarqani llaqtaykumanta preso pusasqa kaqkunapiwan.
Chaypi kachkaptiymi cielokuna kichakuykurqa hinaptinmi revelacionniypi Diosta rikurqani.
Chayqa pasakurqa kimsa chunka watapa tawa kaq killanpim hinaspa chay killapa pichqa kaq punchawninpim.
Llaqtanmanta Joaquim sutiyoq rey preso pusasqa kasqanmanta pichqa watanmanña richkaptinmi chayqa pasakurqa.
Chaypim Tayta Dios hapiykuwaspan atiyninta qowarqa.
4 Qawariptiymi llumpa-llumpay viento norte lawmanta hamukuchkasqa.
Huk hatun puyumantañataqmi lloqsimurqa llipyachkaq hina ninakuna.
Chaypa muyuriqninpiñataqmi antaqa hina llumpayllaña kanchay karqa.
Chay llipyachkaq hina ninakunapa chawpinpiñataqmi kachkarqa chipityachkaq bronceman rikchakuq kanchay.
5 Chaypa chawpinpiñataqmi kachkasqa runaman rikchakuq tawa kawsachkaq animalkuna.
6 Paykunaqa sapakamam karqa tawa uyayoq chaynataq tawa raprayoq.
7 Paykunapa piernanmi karqa derecholla,
chakinkuñataqmi karqa toropa chakin hina.
Chay chakinkunam chipipipirqa lluchkay-lluchkay rurasqa bronce hina.
8 Paykunaqa tawa uyayoq hinaspa tawa raprayoq kaspapas sapakamam tawan waqtankupi runapa makin hina makiyoq karqaku.
Chay makinkuqa karqa raprankupa urachanpim.
9 Hukninpa rapranmi tupanakuq hukninpa rapranman.
Purispankuqa mana kaynaman-waknaman muyurispam derecholla richkarqaku.
10 Sapakamapa tawantin uyankum kayna karqa:
Ñawpaq uyanmi karqa runapa uyanman rikchakuq,
alleq lawninpi uyanñataqmi karqa leonpa uyanman rikchakuq,
ichoq lawninpi uyanñataqmi karqa toropa uyanman rikchakuq,
qepan lawpi uyanñataqmi karqa ankapa uyanman rikchakuq.
11 Chaynamá karqa paykunapa uyankunaqa.
Raprankunañataqmi karqa altoman mastarisqa.
Chay iskay mastarisqa raprankunam tupanakurqa waqtanpi kaq hukninpa rapranwan.
Iskaynin puchuq raprankunawanñataqmi tapakurqa cuerponta.
12 Paykunaqa sapakamam mana kaynaman-waknaman muyurispa derecholla rirqaku maymanpas espiritupa pusasqanman.
13 Chay tawantin kawsachkaq animalkunapa rikchayninmi karqa rupachkaq sansa hina chaynataq lenguachkaq mechero hina.
Paykunapa chawpinpimá chay lenguachkaq nina kaynaman-waknaman purirqa.
Chay ninaqa karqa llumpay kancharichkaqmi.
Chay ninamantataqmi lloqsirqa achka llipyaykuna.
14 Chay kawsachkaq animalkunam llipyamuchkaq hina kaynaman-waknaman kallpakachaqku.
15 Kawsachkaq animalkunata qawachkaspam pampapi rikururqani huk ruedata.
Sapakamapa waqtanpim kasqa huk rueda.
16 Chay ruedakunapa rikchayninqa karqa llipipipichkaq alhaja rumimanta rurasqa hinam.
Chay tawantin ruedakunam karqa kaqkamalla.
Chaynataqmi chay ruedakunapa rikchayninqa karqa iskay chakanakuq rueda hina.
17 Mana muyurispam uyanku lawman derecholla riqku.
Atiqkum tawa lawninman puriyta.
18 Chay ruedapa aronkunam karqa mancharikuypaq hatu-hatunkuna.
Chaypa muyuriqninpim karqa llipityachkaq ñawikuna hina.
Chaynam karqa tawan ruedakunapi.
19 Kawsachkaq animalkuna puriptinmi chay ruedakunapas paykunawantaq rirqa.
Kawsachkaq animalkuna pampamanta hoqarikuptinpas paykunawantaqmi chay ruedakunapas hoqarikuq.
20 Paykunaqa maymanpas riqku espiritupa risqanmanmi.
Paykunawan kuskataqmi riq chay ruedakunapas,
chaynaqa karqa chay kawsachkaq animalkunapi hina ruedakunapipas espiritu kasqanraykum.
21 Kawsachkaq animalkuna puriptinqa puriqtaqmi ruedakunapas,
paykuna sayaptinqa sayaqtaqmi ruedakunapas,
pampamanta paykuna hoqarikuptinqa paykunawantaqmi ruedakunapas hoqarikuq,
chay kawsachkaq animalkunapi espirituqa kachkarqataqmi chay ruedakunapipas.
22 Paykunapa umankupa hawanpim mastarisqa karqa tapaykuq toldo hina.
Chayqa karqa mancharikuypaq kancharichkaq riti hinam.
23 Chay tapaykuq toldopa urachanpiñataqmi derecholla mastarikurqa chay kawsachkaq animalkunapa raprankuna.
Hukninpa rapranmi hukninpawan tupanasqa karqa.
Iskaynin puchuq raprankunawanñataqmi sapakama tapakurqa cuerponkuta.
24 Uyarirqanitaqmi puriptinku chay raprankunaqa llumpay bullallataña rurasqantapas.
Chay bulla rurasqankuqa karqa hatun mayupa qapariynin hinam otaq tukuy atiyniyoqpa qayakuynin hinam otaq nana-nanaq tropakunapa purisqan hinam.
Sayaykuptinkuqa chay raprankupas uraykuqmi.
25 Chayna sayaykuspa raprankuta uraykachiptinkum huk qapariy uyarikurqa chay tapaykuq toldopa hawanmanta.
26 Chay tapaykuq toldopa hawanpiñataqmi rikurqani huk tiyana kaqllata.
Chay tiyanapa hawanpim kachkarqa runa kaqlla.
27 Weqawman rikchakuqmanta hanaymanmi rikurqani ninawan intusqa llipityachkaq metalta hina.
Chay weqawman rikchakuqmanta uraymanñataqmi rikurqani hina kaqllata.
Chay qawasqay runa kaqllapa muyuriqninpiñataqmi rikurqani llipityachkaq kanchayta.
28 Chay muyuriqninpi kanchariyqa karqa paramuptin puyu ukumanta chirapa rikurimuchkaq hinam.
Chaynatamá Tayta Diospa kanchariyninqa ñoqaman rikuriykuwarqa.
Ezequielta Dios qayasqanmanta
Chayta rikuruspaymi qonqoranpa pampaman kumuykurqani.
Chaymantañataqmi uyarirqani huk kaqninpa kayna niwasqanta: