Pipas huchallikuqqa wañunqapunim.
18
Tayta Diosmi rimapayawaspan niwarqataq kaynata:
2 —Israelpa castan runakunam sapa kutilla kay rimakuyta rimankichik:
“Tayta-mamakunam puchqo uvasta mikururqa.
Chaymi churi-wawankupa kirun sallirurqa” nispa.
¿Imanasqataq chaynataqa rimankichik?
3 Ñoqa Señor Diosmi vidayrayku juraspay nikichik:
Kay rimakuytaqa Israel nacionpiqa manañam haykapipas rimankichikchu.
4 Llapallan runakunaqa ñoqapamiki.
Taytanpas churinpas ñoqapamiki.
Pipas huchallikuqqa wañunqamiki.
5 Allin ruraq runa kaspanqa
allin arregloman hinach allichanman.
6 Orqokunapa hawan capillakunapiqa manam mikunmanchu.
Israel nacionpi taytacha-mamachakunapiqa manam confiakunmanchu.
Runamasinpa warminwanqa manam kakunmanchu.
Killanwan kaq warmiwanqa manam kakunmanchu.
7 Payqa manam pitapas ñakarichinmanchu.
Payqa debekuqninpa prendantapas manam hapikuykunmanchu.
Payqa manam pitapas suwakunmanchu.
Payqa yarqaymanta kaqmanpas mikuykachinmanmi.
Payqa mana pachayoqtapas pachaykachinmanmi.
8 Payqa qollqentapas prestanman
manam mirayninpaqraqchu.
Payqa qollqen kutichipusqapas chaskinman
manam ancha mirayniyoqtachu.
Payqa karunchakunmanmi
mana allin ruraykunamantapas.
Payqa cheqapman hinam
arreglaykunman runakunapa quejantapas.
9 Chayna runa decretoykunaman hina kawsaspanqa
hinaspa leyniykunaman hina ruraspanqa
allinta rurasqanraykum kawsanqapuni.
Ñoqa Señor Diosmi chaynata nini.
10 Ichaqa sichum churin salteaq rikurirunman,
ichaqa sichum churin runakunata
wañuchiq rikurirunman,
taytanpa mana rurasqan huchata rurarunman.
11 Chay churinqariki orqokunapa hawan capillakunapim mikukuq.
Payqariki runamasinpa warminkunawanmi kakuq.
12 Payqariki wakchatawan mana imayoqtam ñakarichiq.
Payqariki runamasintapas sapa kutillam suwakuq.
Manataqmi kutichipuqchu debekuqninpa prendantapas.
Payqariki confiakuqmi taytacha-mamachakunapipas.
Payqariki ruraqmi millakuypaq mana allinkunatapas.
13 Payqa mirayllanpaqmi pimanpas
qollqenta prestaykuq.
Payqa qollqen kutichipusqapas
ancha mirayniyoqtam chaskikuykuq.
¿Chayna runaqa kawsanqaraqchu?
Arí,
payqa manam kawsanqañachu.
Payqa millakuypaq kaqkuna rurasqanmantam wañunqapuni.
Payqa chayna culpayoq kasqanmantam wañunqapuni.
14 Ichaqa chay mana allin runapapas kanmantaq huk churin.
Chaynapiriki chay churiqa qawanman taytanpa tukuy huchallikusqankunata ichaqa manataq chay taytan hinachu ruranman.
15 Hinaspaqa orqokunapa hawan capillakunapiqa
manam mikunmanchu.
Israel nacionpi taytacha-mamachakunapiqa
manam confiakunmanchu.
Runamasinpa warminwanqa manam kakunmanchu.
16 Payqa manam pitapas ñakarichinmanchu.
Payqa debekuqninpa prendantapas manam hapikuykunmanchu.
Payqa manam pitapas suwakunmanchu.
Payqa yarqaymanta kaqmanpas mikuykachinmanmi.
Payqa mana pachayoqtapas pachaykachinmanmi.
17 Payqa yanapaykunmanmi wakchakunatapas.
Payqa manam mirayninpaqraqchu
prestanman qollqentapas.
Payqa manam ancha mirayniyoqtachu
chaskinman qollqen kutichipusqapas.
Leyniykunaman hina ruraspanqa,
decretoykunaman hina kawsaspanqa
manam wañunqachu taytanpa huchanmantaqa.
Payqa cheqaptapunim kawsakunqa.
18 Paypa taytanqariki ñakarichikuq kasqanraykum,
wawqenpa kaqtapas suwakusqanraykum,
ayllunkuna ukupipas allin kaqkunata mana rurasqanraykum
mana allin rurasqanmanta wañunqa.
19 “Chaynaqa qamkunachá tapukuwaqchik:
‘¿Imanasqataq chay runapa churinqa mana apanchu taytanpa mana allin rurasqanpa castigontaqa?’
nispa.
Arí,
chay runapa churinqariki allin arregloman hinam imatapas allicharqa.
Payqariki chaynataqmi llapallan decretoykunatapas kasukurqa.
Chayraykum payqa cheqaptapuni kawsakunqa.”
20 Pipas huchallikuqllam wañunqaqa.
Taytanpa mana allin rurasqanmantaqa
churinqa manam castigasqachu kanqa.
Churinpa mana allin rurasqanmantaqa
taytanqa manam castigasqachu kanqa.
Allin ruraq runaqa allin rurasqanmantam pagasqa kanqa.
Mana allin ruraq runaqa
mana allin rurasqanmantam pagasqa kanqa.
Tayta Diosqa allin arreglolla ruraq kasqanmanta.
21 “Chayna mana allin ruraq runa huchallikusqanmanta wanakuspaqa chaynataq decretoykunatapas kasukuspan allin arregloman hina imatapas allichaspanqa,
cheqaptapunim kawsakuspan mana wañunqachu.
22 Mana kasukuspan mana allin rurasqanmantaqa manam yuyarisaqñachu,
payqa allin kaqtaña rurasqanraykum kawsakunqa.
23 Ñoqaqa manapunim munanichu mana allin ruraq runapa wañunantaqa,
aswanqariki munachkani mana allin rurasqanmanta wanakuspa kawsakunantam.”
24 “Ichaqa chay allin ruraq runa chayna rurasqanmanta karunchakuspan mana allinkunataña ruraptinqa otaq chay mana allin ruraq runapa millakuypaq kaqkuna rurasqanta ruraptinqa ¿yaqachum chay runaqa kawsanmanraq?
Ñoqaqariki manam yuyayllapas-yuyarisaqchu tukuy allinkuna rurasqanmantaqa,
payqariki wañunqa traicionawaspan huchallikusqanmantam.
25 Ichapas qamkuna niwankichikman:
‘Qamqa Señor,
manam imaynam ruranaman hinachu rurachkanki’ nispa.
Ichaqa Israelpa castankuna,
qamkunayá uyariychik:
Ñoqaqa imaynam ruranaman hinam rurachkani.
Qamkunam ichaqa mana imaynam ruranaman hinachu rurachkankichik.
26 Chay allin ruraq runa chayna rurasqanmanta karunchakuruspan mana allintaña ruraspanqa wañunqam.
Payqa wañunqamá mana allinkuna rurasqanrayku.
27 Ichaqa chay mana allin ruraq runa chayna rurasqanmanta wanakuspa allin arregloman hinaña imatapas allichaspanqa vidantam salvarunqa.
28 Mana kasukusqankunata qawariykuspan wanakuptinqa cheqaptapunim kawsakuspan manaña wañunqachu.”
29 “Israel castakuna,
ichapas niwankichikman:
‘Qamqa Señor,
manam imaynam ruranaman hinachu rurachkanki’ nispa.
Israel castakuna,
ñoqaqariki imaynam ruranaman hinam rurachkani,
qamkunam ichaqa mana imaynam ruranaman hinachu rurachkankichik.
30 Israel castakuna,
chayraykum ñoqaqa imaynam kawsasqaykichikman hina castigasqaykichik.
Chaynatam ñoqa Señor Dios nini.
Chaynaqa mana kasukuq kasqaykichikmanta wanakuspayá kutirikamuwaychik hinaptinqa chay rurasqaykichikkunaqa manam urmachisunkichikchu.
31 Chaynaqa qamkunamantayá qarqoychik chay mana kasukusqaykichikkunata,
qamkunaqa mosoq sonqoyoq hinaspa mosoq espirituyoqñayá kaychik.
Chaynaqa Israel castakuna ¿imanasqamá wañunkichikqa?
32 Arí,
ñoqaqa manamiki munanichu pipas wañunantaqa.
Chaynaqa ñoqaman kutirikamuspayá kawsakuychik.
Ñoqa Señor Diosmi nini chaynata.”