Uvas plantamantawan ankamanta
17
Tayta Diosmi rimapayawaspan niwarqataq kaynata:
2 —Runapa churin,
qamyá Israel castakunaman rimariy huk rikchanachiyta.
3 Ñoqa Señor Diospa nisqaytayá niy kaynata:
Huk hatu-hatun ankam Libano Orqoman chayaramurqa.
Raprasapa hinaspa puranpas puntasapallañam chayaramurqa.
Imaymana rikchaq purayoqmi cedropa puntanman hapipakururqa.
4 Chay sachapa uma puntachantam kaptarurqa.
Hinaspam negociantekunapa nacionninman aparurqa.
Negociantekunapa kanan llaqtamanmi churaykurqa.
5 Allpamantapas hoqariykurqataqmi muhukunata.
Hinaspam allpasapallaña chakrapi tarpuykurqa.
Achka yakupa patanpim tarpurqa allinneqta.
Wayaw tarpuchkaq hinam chaytaqa churarqa.
6 Chay muhu wiñaruspanmi kaynaman-waknaman
sumaqllataña chutarikurqa.
Sayayninqa taksalla kaptinpas
kallmankunam anka lawman qawarqa.
Sapinkunañataqmi aswan-aswanraq ukuman yaykurqa.
Chay muhu wiñaruspanmi uvas planta rikurirurqa.
Sumaqllataña iklliriruspanmi kallmasapallaña karurqa.
7 Ichaqa kachkasqataqmi huk hatu-hatun ankapas.
Raprasapallaña hinaspa purasapallañam chayqa kasqapas.
Hinaptinmi chay uvas plantaqa chay
ankaman sapinkunata haywarirqa.
Maymi kasqanmantam payqa kallmachankunata
parqoykunankupaq haywarirqa.
8 Ichaqa payqa allin allpapi tarpusqam kachkarqa.
Ichaqa payqa achka yakupa patanpim tarpusqa kachkarqa
chaynapi sumaqllataña ikllirispan achkallaña rurunanpaq
chaynapi sumaqllaña uvas sacha rikurirunanpaq.
9 Chaynaqa ñoqa Señor Diospa nisqaytayá niy kaynata:
Chay uvas plantaqa manam allinñachu kanqa.
Chay uvas plantaqa sapinmanta pilasqam kanqa.
Rurunkunapas kanqa wichichisqataqmi.
Chayraq ikllimuq rapinkunapas chakirunqataqmi.
Manapas kallpallawanmi sapinmanta chutasqa kanqa.
Manapas achka runallawanmi sapinmanta chutasqa kanqa.
10 Huktawan plantasqa kaspapas manañam allinyanqachu.
Inti qespimunan lawmanta wayramuptinqa ¿kawsanqaraqchu?
Chakirusqanraykum maypim tarpuykusqankupiqa kanqañachu.
11 Tayta Diosmi rimapayawaspan niwarqataq kaynata:
12 —Chay mana kasukuq runakunapa castankunatayá tapuy kaynata:
“¿Manachum entiendenkichik kay rikchanachiypa imam ninantaqa?”
nispa.
Chaynaqa paykunamanyá willay:
“Babilonia nacionpa reynin Jerusalen llaqtaman hamuruspanmi chaypi kaq reytawan chaypi kamachikuqkunata presocharurqa hinaspam paypa kasqan Babilonia nacionman pusarachirqa.
13 Hapirurqataqmi reypa miraynintapas hinaspam payta jurachispan contratota rurarqa.
Chaymantam chay nacionpi ancha reqsisqa runakunata pusachirqa.
14 Chaynataqa rurarqa Israel nacion mana kallpayoq taksallaña kananpaqmi hinaspa mana hoqarikunankupaqmi chaynapi contratonta cumplisqallanwanña allin takyananpaq.
15 Ichaqa chay contrato rurasqan kamachikuqmi Babilonia nacionpa reyninta mana kasukurqachu.
Arí,
payqariki Egipto nacionmanmi runankunata kacharqa caballokunata hinaspa achkallaña tropakunata mañamunankupaq.
¿Yaqachum qamkunaqa creenkichik payqa allin lloqsirunanta?
¿Yaqachum qamkunaqa creenkichik chayna ruraqqa kawsachkaqraq ayqerunanta?
¿Yaqachum qamkunaqa creenkichik contrato rurasqan mana cumpliq runaqa ayqerunanta?
16 Ñoqa Señor Diosmi vidayrayku jurani:
Babilonia lawpim chay churaqnin reypa kasqanpi payqa wañunqa.
Payqariki despreciarqam chay juramento rurasqanta,
manataqmi cumplirqachu chay reywan contrato rurasqantapas.
17 Babilonia nacionpa reyninmi Jerusalen llaqtata atacaspan murallapa qepanpi allpakunata montonanqa,
llaqtatapas huk murallawanmi muyurunqa achkallaña runakunata wañuchinanpaq.
Ichaqa Rey Faraonqa manam yanapanqachu achka-achka tropankunawanpas nitaq achka-achka soldadonkunawanpas.
18 Chay Jerusalen llaqtapi gobiernaqqariki juramentota despreciaspanmi contrato rurasqantapas mana kasukurqachu.
Payqariki prometekuchkaspan mana allinkunataraq rurasqanraykum mana ayqenqachu.
19 “Chayraykum ñoqa Señor Dios vidayrayku juraspay kaynata nini:
‘Payqa juramento rurawasqantam despreciarqa.
Payqa contrato rurasqaykutam pakirurqa.
Castigasaqpunim chay rurasqanmantaqa.
20 Chaynaqa hapinay mallaytam payman wischuykusaq.
Chaynaqa toqllaywanmi paytaqa hapirusaq.
Chaynapim Babilonia nacionman pusachisaq paytaqa.
Chaypiñam traicionawasqanmanta sentenciasaq paytaqa.
21 Llapallan ayqekuqkunaqa guerrapim wañunqaku.
Llapallan tropankunapas espadawanmi wañunqaku.
Tukuy hinastinmanmi cheqechinqaku puchuqkunata.
Hinaptinmi yachankichik ñoqa Tayta Dios rimasqayta.’ ”
22 “Kaynatam nini ñoqa Señor Dios:
Ñoqapas chay cedro sachapa uma puntachanta
kaptaruspam plantarusaq.
Chay ikllimuq uma puntachanta kaptaruspaymi
alto-alto orqopi plantarusaq.
23 Arí,
chaytaqariki Israel nacionpa
hatun orqonpim plantarusaq.
Hinaptinmi kallmankunatapas mastarispan rurunqa.
Chaynapimá payqa suma-sumaq cedro sachaña rikurirunqa.
Ukunpipas tukuy rikchaq alton pawaqkunam yachanqaku.
24 Chaynapim purunpi llapallan sachakunapas yachanqa
ñoqaqa Tayta Dios kasqayta.
Hatun sachakunata pampaman wischuspam
hatunchasaq chay taksa kaqta.
Verdellaña sachata chakirachispaymi
ikllichisaq chay chakisqa kaqta.
Ñoqa Tayta Diosqa cumplinipunim rimasqayta.”