Israel nacionpi kamachikuqkunamanta aya taki
19
—Ezequiel,
qamqa Israel nacionpi kamachikuqkunamantayá rikchanachispa kay aya takita takiy:
2 “Qampa mamaykiqa karqa mayna sumaq china leonmi.
Payqa karqa malta leonkunapa chawpinpi waqtapakuqmi.
Payqa karqa wawankunapas chaypi allin uywaqmi.
3 Huknin uñachantam wiñarachirqa.
Malta leon kanankamam wiñarachirqa.
Paytaqa yachachirqataqmi animalkuna hapiytapas.
Paytaqa yachachirqataqmi runakuna mikuytapas.
4 Paymantaqa nacionkunapi yachaqkunam uyarirurqaku.
Hinaspam paytaqa huk trampawan hapirurqaku.
Chaymantam ganchokunawan Egipto nacionman pusarqaku.
5 Chaymi maman leonñataq unayña suyaruspan
otaq chay munasqanqa mana cumplikusqanta qawaykuspan
wiñachirqa huknin leonchataña yanapaspan.
6 Payqa malta leonña rikuriruspam
llapa leonkunapa chawpinpi ichikacharqa.
Animaltapas hapiyta yacharuspam
runakunatapas mikuparurqa.
7 Payqa runakunapa palacionkunatapas
lliwmi tuñirachirqa.
Payqa runakunapa llaqtantapas
lliwmi purmarachirqa.
Payqa allpapi yachaqkunatapas
qaparispanmi mancharichirqa.
8 Hinaptinmi paypa contranpi
llapa nacionkuna hatarirurqa.
Muyuriqninpi llapa runakunapas
paypa contranpim hatarimurqa.
Chaymi payman mallata wischuykuspanku,
chaymi paypaq uchkuta ruraruspanku
9 jaulapi ganchokunawan wichqarurqaku.
Hinaspam Babilonia nacionpi reyman aparqaku.
Chaymi paytaqa carcelman pusaykurqaku.
Israel orqokunapi manaña qaparinanpaqmi wichqarurqaku.”
10 “Qanman rikchakuq mamaykiqa uvas planta hinam karqa.
Yakukunapa hichpallanpi plantaykusqa hinam payqa karqa.
Payqa achka yakuyoq kasqanraykum
rurusapallaña karqa.
Payqa achka yakuyoq kasqanraykum
kallmasapallaña karqa.
11 Mana pakiy atinakunam kallmankunapas karqa.
Gobiernaqpa tawnankunapiraqmi chayqa servikurqa.
Paypa kallmankunaqa hatu-hatuntam wiñarurqa.
Puyukunaman haypanankamaraqmi wiñarurqa.
Machullay-machu kasqanraykum paytaqa qawarqaku.
Kallmasapallaña kasqanraykum paytaqa qawarqaku.
12 Ichaqa piñakuywanmi paytaqa sapinmanta horqorurqaku.
Pampamanmi piñakuywan paytaqa wischuykurqaku.
Intipa qespimunanmanta hamuq rupaq wayram chakirachirqa.
Chaynataqmi rurunkunapas kikillanmanta wichirurqa.
Mana pakiy atina kallmankunapas chakirurqam.
Mana pakiy atina kallmankunapas ruparurqam.
13 Kunanqa payqariki chunniqpiñam
plantaykusqa kallachkan.
Mana yakuyoq chaki allpapiñam
plantaykusqa kallachkan.
14 Kikinpa kallmanmantapas ninaraqmi lloqsirurqa.
Hinaspamya paypa rurullantapas kañarurqa.
Chay sachapiqa manamya allin kallmaqa kanñachu.
Gobiernaqkunapa tawnanpaqpas chaypiqa
manamya imapas kanñachu.”
Chayqariki aya takim,
chaynaqa aya takipaqmá servikunqa.