3 —Runapa churin,

Israel castakunapa ancianonkunamanyá ñoqa Señor Diospa nisqayta kaynata niy:

“¿Qamkunaqa tapuwanaykichikpaqchu hamuchkankichik?

Ñoqa Señor Diosqa vidayrayku juraspam nikichik qamkunamanqa manaña contestanayta.”

4 Yaw runapa churin,

qamyá sentenciay paykunataqa.

Paykunamanqa abuelonkupa millakuypaq kaqkuna rurasqankutayá reqsichiy.

5 Paykunamanqa ñoqa Señor Diospa nisqaytayá niytaq kaynata:

“Israel castakunata akllakusqay punchawqa kikiypunim juraspa reqsiykachikurqani.

Jacob castakunawan Egipto nacionpiña reqsiykachikuspaymi jurarqanitaq kaynata:

Ñoqaqa kani yupaychasqaykichik Tayta Diosmi,

nispa.

6 Chay jurasqay punchawmi prometekurqani paykunataqa Egipto nacionmanta horqonaypaq hinaspa akllapusqay allpaman paykunata pusanaypaq.

Chay allpaqariki tukuy imakunapapas kanan allpam,

chayqariki llapallan allpakunamantapas aswan allin kaqmi.

7 Chaymantam paykunataqa llapallankuta kamachirqani millakuypaq taytacha-mamachakunata wischunankupaq chaynataq Egipto nacionpi taytacha-mamachakunawanpas mana millakuypaq hina kanankupaq.

Ñoqaqariki kani yupaychasqaykichik Tayta Diosmi.”

8 —Paykunam ichaqa manaña kasuwaspanku manañataq munarqakuchu uyariwaytapas,

manam munarqakuchu millakuypaq taytacha-mamachakuna wischuytapas chaynataq Egipto nacionpa taytacha-mamachakuna saqeytapas.

Chaymi ñoqaqa piensarqani Egipto nacionpi piñakuyniy tukunankama castigaruyta.

9 Ichaqa maymi yachasqanku nacionkunapa chawpinpim imam ruranayta rurarqani sutiy mana penqaypi kananpaq.

Chay nacionkunapa chawpinpim ñoqaqa ancha reqsisqa karqani Israelpa castankunata Egipto nacionmanta horqospay.

10 Paykunataqa Egipto nacionmanta horqospaymá chunniqman pusarqani.

11 Chaypim paykunaman decretoykunata qospay yachachirqanitaq leyniykunatapas.

Chayman hina pipas ruraspanqa allintam kawsanqa.

12 Paykunataqa kamachirqanitaqmi samana punchawniykunapipas samanankupaq,

chayqariki huk señalmi karqa ñoqapaq chaynataq paykunapaqpas chaynapi paykunaqa ñoqallapaqña sapaqchasqa kasqankuta yachanankupaq.

13 Ichaqa paykunaqa chunniqpim mana kasuwarqakuchu hinaspam manataq kawsarqakuchu decretoykunaman hinaqa.

Allinta kawsanankupaq leyniykuna qosqaytapas wischupakurqakum,

samanankupaq qosqay punchawkunatapas manapunim cumplirqakuchu.

Chaymi rabiallawanña castigaruyta piensarqani chay chunniqpi tukurunaypaq.

14 Ichaqa imam ruranaytam rurarqani sutiy chay nacionkunapi mana penqaypi kananpaq.

Ñoqaqariki chay nacionkunapa qawasqantam Israel castataqa Egipto nacionmanta horqomurqani.

15 —Paykunamanqa chunniqpiña kachkaptinkum jurarqanitaq qosqay allpamanqa manaña yaykuchinaypaq.

Chay allpaqariki tukuy imakunapapas kanan allpam,

chayqariki llapallan allpakunamantapas aswan allin kaqmi.

16 Paykunaqa leyniykuna qosqaytapas wischupakurqakum hinaspam manataq decretoykunaman hinachu kawsarqaku,

samanankupaq qosqay punchawkunapipas manam samarqakuchu.

Paykunaqa taytacha-mamacha sonqoyoqllam kawsachkarqaku.

17 Ichaqa chaywanpas paykunata llakipayarikuspam mana wañurachirqanichu,

manataqmi chunniqpipas puchukarachirqanichu.

18 Chaymi paykunapa churinkunataña chunniqpi kaynata nirqani:

“Qamkunaqa amayá mama-taytaykichikpa rurasqanman hinaqa kawsaychikchu,

amataqyá paykunapa leynillantaqa kasukuychikchu hinaspapas amataqyá paykunapa taytacha-mamachankuwanqa millakuypaq hinaqa rurakuychikchu.

19 Ñoqaqariki kani yupaychasqaykichik Tayta Diosmi,

chaynaqa decretoykunaman hina kawsaspayá leyniykunatapas kasukuychiktaq.

20 Chaynataqyá samanaykichikpaq qosqay punchawkunatapas sapaqchapuwaychiktaq,

chayqariki huk señalmi kanqa qamkunapaq chaynataq ñoqapaqpas,

chaynapim yachankichik yupaychasqaykichik Tayta Dios kasqayta.”

21 —Ichaqa chay churinkunapas manam ñoqataqa kasuwarqakuchu,

paykunaqa manam decretoykunaman hinachu kawsarqaku,

allinta kawsanankupaq qosqay leyniykunatapas manam kasukurqakuchu.

Paykunaqa manamá samanankupaq qosqay punchawpipas samarqakuchu hinaptinmi piensarurqani chay chunniqpi piñakuyniy tukunankama castigaruyta.

22 Ichaqa manam chaynatachu rurarqani,

ñoqaqariki imam ruranallaytam rurarqani chaynapi sutiyqa chay nacionkunapa qayllanpi mana penqaypi kananpaq.

Ñoqaqariki chay nacionkunapa qawasqantam Israel castataqa Egipto nacionmanta horqomurqani.

23 Paykunamanqa chunniqpiña kachkaptinkum jurarqanitaq kay pachapa tukuy nacionniman cheqerachinaypaq.

24 Paykunaqa leyniykunaman hina mana ruraspankum decretoykunatapas wischupakurqakutaq.

Samanankupaq qosqay punchawpipas manam samarqakuchu.

Paykunaqa mama-taytanku hinam taytacha-mamacha sonqoyoqlla kawsakuchkarqaku.

25 Chayraykum paykunataqa qoykurqani mana valeq decretokunamanña chaynataq kawsanankupaqpas mana valeq leykunamanña.

26 Dejaykurqanitaqmi millakuypaq hinaña kanankupaqpas chaynapi llapallan piwi churinkuta taytachakunamanña ofrecespa kañapunankupaq chaynapi anchallataña mancharikuspa Tayta Dios kasqayta yachanankupaq.

27 —Chaynaqa runapa churin,

Israelpa castankunatayá ñoqa Señor Diospa nisqayta kaynata niy:

“Qamkunapa abueloykichikkunapas insultawasparaqmi traicionawarqaku.

28 Paykunataqa juramentowan prometekusqay allpaman yaykuykachiptiymi qawarqaku llapallan alto moqokunata hinaspa llapallan rapisapa sachakunata.

Chaypi animalkunata kañaspankum piñachiwaqniy ofrendakunatapas churaqku,

miski asnaq ofrendakunatapas kañaspankum talliqkutaq vinotapas.

29 Chaymi paykunata tapurqani:

‘¿Imataq chay ripanyasqaykichik moqokunapi capillaqa?’

nispa.

Hinaptinmi paykunañataq suticharqa:

‘Bama’ nispa.

Chayna sutiyoqmi kachkan kay libro qellqasqa kasqakamapas.”

30 —Ñoqa Señor Diospa nisqaytayá Israel castakunaman niy kaynata:

“¿Imaynanpimá abueloykichikkuna hinaqa qamkunapas millakuypaq kaqta munachkankichik?

¿Imaynanpimá millakuypaq taytacha-mamachakunata adoraspaqa hukwan-hukwan kakuq warmi hinaqa kachkankichik?

31 Qamkunaqariki taytacha-mamachaykichikwanmi millakuypaq kaqkunata hinallaraq rurachkankichik,

piwi churikichiktapas taytachakunaman ofrecespam kañachkankichik.

Israel castakuna ¿chayna kachkaspachum tapuwaytaraq munachkankichik?

32 Ichaqa manam qamkunapa piensasqaykichikman hinachu kanqa.

Qamkunaqariki piensankichik:

‘Ñoqanchikqa wakin nacionkuna chaynataq wakin ayllukuna hinayá kakusunchik kullutawan rumita adorastin’ nispam.

33 Ñoqa Señor Diosmi vidayrayku jurani:

Ñoqaqa atiywan hinaspa hatun castigowanmi rabiallawanña qamkunapi munaychakusaq.

34 Ñoqaqa atiywan hinaspa hatun castigowanmi rabiallawanña horqomusqaykichik runakunapa chawpinmanta,

huñumusqaykichiktaqmi cheqechisqay nacionkunamantapas.

35 Nacionkunapa chunniqninman qamkunata pusaspaymi uyaykichikpipuni pleiteasqaykichik.

36 Imaynam Egipto nacionpa chunniqninpi abueloykichikkunawanpas pleitearqani,

chaynam qamkunawanpas pleiteasaq.

Chaynatam nini ñoqa Señor Dios.

37 Huk michiqpas ovejankunata yupachkaq hinam contratoyta cumplinaykichikpaq ñoqapas qamkunata yupasqaykichik.

38 Qamkunamantaqa rakisaqtaqmi mana kasuwaqniykunatapas chaynataq contraypi hoqarikuqkunatapas.

Paykunataqa forastero hina yachasqanku nacionkunamanta horqoruspaypas manam Israelpa allpanmanqa yaykuchisaqchu,

chaynapim yachankichik Tayta Dios kasqayta.

39 “Chaynaqa Israel casta runakuna,

ñoqa Señor Diosmi kaynata nikichik:

Sapakamayá pasakuychik chay taytacha-mamachaykichikkuna adoraq,

chaymantañam qamkunaqa kasuwankichik,

chay ofrendaykichikwanqa hinaspa taytacha-mamachakuna adorasqaykichikwanqa manañam chuya sutiytaqa penqayman churankichikchu.

40 Chayraqmi Israel llapallan castakunaqa sapaqchasqay orqopi otaq nacionpa hatun orqonpi adorawankichik.

Ñoqa Señor Diosmi chaynata nini.

Chaypimá ñoqapas chaskiykusqaykichik hinaspam mañasqaykichik ofrendakuna qowanaykichiktapas chaynataq punta kaq cosechakunamanta ofrecewanaykichiktapas,

mañasqaykichiktaqmi tukuy imaña sapaqchapuwanaykichiktapas.

41 Qamkunataqa runakunapa chawpinmantam horqomusqaykichik hinaspam cheqechisqay nacionkunamanta huñumuspay chaskiykusqaykichik miski asnaq ofrendata hina,

qamkuna ukupim llapallan nacionkuna qawachkaptin chuya kasqayta reqsichikusaq.

42 “Qamkunata Israel allpaman otaq juramentaspay abueloykichikkunaman qosqay allpaman yaykuykachiptiymi yachankichik Tayta Dios kasqayta.

43 Chayman yaykuykuspam yuyarinkichik imaynam mana allin kawsasqaykichikta chaynataq tukuy mana allin rurasqaykichiktapas hinaspam chay tukuy mana allin rurasqaykichikmanta pesakunkichik.

44 Israel castakuna,

qamkunawan imam ruranayta ruraspayqa,

manam rurasaq qamkunapa mana allin kawsasqaykichikman hinachu nitaq chay millakuypaq kaqkuna rurasqaykichikman hinachu,

aswanqa kuyapayakuq sutiyman hinam.

Chaynapim yachankichik Tayta Dios kasqayta.

Chaynatam nini ñoqa Señor Dios.”

45 Tayta Diosmi rimapayawaspan niwarqataq kaynata:

46 —Runapa churin,

qamqa surlawman qawarispayá rimariy.

Neguev lawpi montekunapa contranpiyá qamqa ñoqamanta willakuy.

47 Chaynaqa chay montekuna lawmanyá ñoqa Tayta Diospa nisqayta niy:

“Chaypi kaq sachakunata kañaykuptiymi ruparunqa verde sachakunatawan chakisqa sachakunata,

lenguasqanpas manaña amachay atina kaspanmi chaypi yachaq runakunapa uyallantapas lliw pusllurachinqa.

Chaynaqa kanqa surlawmanta norte lawkamam.

48 Chaynapim llapallan runakuna qawanqa ñoqa Tayta Dios chaytaqa kañaykusqayta,

chay ninaqa kanqa mana amachay atinam” nispa.

49 Hinaptinmi ñoqa Ezequielñataq nirqani:

—Señor Dioslláy,

runakunaqa hapiwanku rikchanachiykunalla rimaqpaqmi —nispa.