Diospa espadanmanta
21
Tayta Diosmi rimapayawaspan niwarqataq kaynata:
2 —Runapa churin,
qamqa Jerusalen llaqta lawman qawarispayá rimay santuarionkunapa contranpi,
Israel allpapa contranpiyá ñoqamanta willakuy.
3 Paykunamanyá ñoqa Tayta Diospa nisqayta kaynata niy:
“Ñoqaqa qampa contraykipim kachkani,
chayraykum ñoqaqa vainanmanta espadayta horqoykuspay wañurachisaq allin ruraq runakunata chaynataq mana allin ruraq runakunatapas.
4 Arí,
ñoqaqa llapallaykichikpa contraykichikpim vainanmanta espadayta horqochkani,
qamkunamantam wañurachisaq allin ruraqtapas hinaspa mana allin ruraqtapas,
surlawmanta qallaykuspam norte lawpi tukusaq.
5 Chaynapim llapallan runakuna yachanqaku ñoqa Tayta Diosqa espadayta vainanmanta horqorusqayta.
Manam ñoqaqa vainanmanqa kutiykachisaqchu.”
6 —Chaynaqa runapa churin,
qamyá sonqoykipas mana musyakuq kanankama aminaykikama waqapakuy llapa runakunapa qayllanpi.
7 Sichum:
“¿Imanasqataq kaynatañaqa waqachkanki?”
nispa pipas tapusuptikiqa qamyá kaynata niy:
“Ñoqaqa waqachkani imam noticia uyarisqaymantam.
Chay chayaramuptinmi llapa runakuna hukmanyarunqaku,
manañam ima rurakuytapas atinqakuñachu,
muspaypi hinam rikurirunqaku,
manchakuymantam moqonkupas katkatatanqa.
Ñam chayaykamuchkanña,
chaynapunim kanqa.
Ñoqa Señor Diosmi nini chaynata.”
8 Tayta Diosmi rimapayawaspan niwarqataq kaynata:
9 —Chaynaqa runapa churin,
ñoqa Señorpa nisqaytayá kaynata niy:
“Espadaqa ñawchiyachisqañam kachkan.
Espadaqa llipipipichkaqñam kachkan.
10 Ñawchiyachisqaqa kachkan wañuchinanpaqmi.
Llipipipichkanqa llipyay hina chipityananpaqmi.
Churilláy,
qamqa maqanapaq tawnatam despreciarqanki.
Churilláy,
qamqa imapas corregina kaqtam despreciarqanki.
11 Espadataqa qoykun chipityachinanpaqmi.
Espadataqa qoykun hapinanpaqmi.
Espadaqa ñawchiyachisqañam kachkan
runa wañuchiqman qoykunanpaq.
Espadaqa llipipipichisqañam kachkan
runa wañuchiqman qoykunanpaq.
12 Chaynaqa runapa churin,
waqayñayá.
Chaynaqa runapa churin,
qaparkachayá.
Chay espadaqa kachkan Israel runaykunapa contranpim.
Chay espadaqa kachkan Israel kamachikuqkunapa contranpim.
Chay Israelpa kamachiqninkunaqa
espadawan wañuchisqa kanankupaqmi
entregasqa kanqaku.
Chay Israel runaykunapas
espadawan wañuchisqa kanankupaqmi
entregasqa kanqaku.
Chaynaqa runapa churin,
pitukuyá.
Chaynaqa runapa churin,
waqakuyá.
13 “Chaynaqa ñoqaqariki runaykunatam huk pruebaman churachkani.
Mana wanakuyta munaptinkuqa tukuy kaykunam paykunaman chayaramunqa.
Ñoqa Señor Diosmi nini chaynata.
14 “Chaynaqa runapa churin,
qamyá ñoqamanta willakuy.
Qamqa makikiwanyá taqllakuy.
Chay espadaqa iskay kimsa kutikamam chayamunqa.
Runakunata wañuchinanpaqmi chay espadaqa chayamunqa.
Tukuy hinastinmanta wañuchinanpaqmi chay espadaqa kanqa.
15 Espadaqa hamunqa paykuna hukmanyarunankupaqmi.
Espadaqa hamunqa achkallaña runakuna wañunanpaqmi.
Paykunapaqa llapallan zaguaninkunapim
churaruni manchakuypaq espadataqa.
Chipipipinanpaqmi churaruni chay espadataqa.
Wañuchinaypaqmi waqaycharuni chay espadataqa.
16 Alleq lawman muyurispapas qamqa lliwtayá kuchuruy.
Ichoq lawman kutirispapas qamqa lliwtayá kuchuruy.
17 Ñoqapas taqllakuspayraqmi qawasaq chay pasakusqanta.
Piñakuyniy tukunankamam qawasaq chay pasakusqanta.
Ñoqa Tayta Diosmi nini chaynata.”
18 Tayta Diosmi rimapayawaspan niwarqataq kaynata:
19 —Runapa churin,
qamqa señalaytaqyá iskay ñanta chaynapi chayninta Babilonia nacionpa reynin espadantin pasananpaq,
chay iskayman pallqaq ñanqa huk nacionllamantam lloqsinan,
chay ñankunapa qallarinanpim churanki may llaqtamanpas rinapaq letrerota.
20 Qamqa señalankimá chay espadayoqpa maynin pasanan ñantapas.
Señalankiqa Amon miraykunapa Raba llaqtanman riq ñantawan Juda lawman riq ñantam,
chay ñanqa chayachkan murallasqa Jerusalen llaqtamanmi.
21 Babilonia nacionpa reyninqa chay pallqaq ñanpa qallariyninpi sayaykuspam suerteta qawanqa.
Flechankunatapas taspiparuspanmi suerteta qawanqa.
Taytacha-mamachankunatapas tapupayaspanmi animalkunapa kichpannintaraq qawapayanqa.
22 Chay reyqa alleq makinwanmi horqorunqa Jerusalen llaqtaman apuntaq flechata,
chaynapim punkukuna tuñichisqa kananpaq machu-machu takaq qerukunata alistachinqa.
Kamachinqataqmi chay llaqtapi runakunata wañuchinankupaqpas chaynataq guerrapi qaparinankupaqpas.
Kamachinqataqmi chay takaq qerukunawan zaguankunata tuñichinankupaqpas chaynataq murallapa qepanman allpakunata montonankupaqpas.
Kamachinqataqmi Jerusalen llaqtapa muyuriqninpi huk murallatapas hatarichinankupaq.
23 Jerusalen llaqtayoq runakunapaqqa juramentokuna rurasqankuraykum chay suerteasqankuqa rikchakun yanqa llullapaq,
chayqariki pasakunqa mana allin rurasqankumanta yuyarinankupaqmi chaynataq llaqtankuqa hukpa dueñochakusqanña kananpaqmi.
24 Chayraykum ñoqa Señor Dios kaynata nini:
Mana allinta ruraspa mana kasukusqaykichikmi sutilla kachkan,
sutillataqmi kachkan tukuy rurasqaykichikpi huchallikusqaykichikkunapas.
Chayraykum qamkunaqa presochasqa kankichik.
25 Israel nacionpi kamachikuq,
qamqariki kanki pasaypaq mana allinlla ruraq runam,
castigasqa kanayki punchawqa chayaramunñam.
26 Ñoqa Señor Diosmi nini kaynata:
Horqoy chay uma wankinaykita,
horqoytaq chay coronaykitapas,
tukuy imapas manam ñawpaq hinañachu kanqa,
pampapi kaqmi altoman churasqa kanqa,
altopi kaqñataqmi pampaman uraykachisqa kanqa.
27 Ñoqaqa tukurusaqmi,
pasaypaqtam tukurusaq,
chayqa manam huktawanqa kanqañachu kamachikunanpaq derechoyoq runapa hamunankama hinaptinmi paymanña qosaq.
Amon castakuna castigasqa kanankumanta
28 —Runapa churin,
ñoqa Señor Diospa nisqaytayá insultasuqnikichik Amonpa mirayninkunaman niy kaynata:
“Espadaqa wañuchinanpaqmi
vainanmanta horqosqaña kachkan.
Espadaqa tukurunanpaqmi
llipyay hina chipityachisqaña kachkan.
29 Paykunaqa revelacionta qawaspapas
yanqakunallatam willakunku.
Paykunaqa chaynataqmi llullallatataq
qanmantaqa adivinanku.
Wañunankupaq sentenciasqa
mana allin ruraqkunamanmi
chay espadaqa wichiykunqa.
Ñam chayamuchkanña
chay castigasqa kananku punchawqa.
30 “Amonpa mirayninkuna,
espadataqa
vainanmanyá kutiykachiychik.
Maypim unanchasqa kasqaykichikpim
ñoqaqa jusgasqaykichik.
Maypim nacesqaykichik allpapim
ñoqaqa juzgasqaykichik.
31 Qampa hawaykimanmi
piñakuyniyta kachaykamusaq.
Rupachkaq hina piñakuyniytam
hawaykiman pukuykamusaq.
Animal hina runakunapa makinmanmi
ñoqaqa qoykusqayki.
Daño ruraqlla runakunamanmi
ñoqaqa qoykusqayki.
32 Yanukuna yanta hinañam
karunki qamqa.
Yawarnikipas allpapi
chaqchusqam kanqa.
Pipapas mana yuyasqanñam
karunki qamqa.
Ñoqa Tayta Diosmá
nini chaynataqa.”