2 —Runapa churin,

qamyá sentenciay paykunataqa.

Runa wañuchiqkunapa yachanan llaqtatayá qamqa sentenciay.

Millakuypaq kaqkuna rurasqankumantayá paykunataqa reqsichiy.

3 Chaynaqa ñoqa Señor Diospa nisqaytayá niy kaynata:

“Runakunapa yawarnin chaqchuna llaqta,

qampa castigasqa kanayki punchawqa ñam chayamuchkanña.

Qampi yachaqkunaqa taytacha-mamachakunatam rurakurunku millakuypaq hinaña kanankupaq.

4 Chaynaqa chay llaqtapi yachaqkunaqa yawar chaqchusqankumantam culpayoq kachkanku,

millakuypaqtaqmi kachkanku taytacha-mamachakuna rurasqankuwanpas,

chaypi yachaqkunamanqa hichpamuchkanñamá castigasqa kananku punchawqa.

Arí,

chayamuchkanñamiki wataykikunapa tukupayninqa.

Chaynaqa chay runakunapa yachanan llaqta,

ñoqam insultachisqayki huklaw nacionniyoq runakunawan,

tukuy hinastinpi yachaq runakunawanmi ñoqaqa asipayachisqayki.

5 Millakuypaq sutiyoq llaqta,

hichpaykipi kaqkunam qanmantaqa asikunqaku.

Llumpay chaqwakunapa kanan llaqta,

karupi kaqkunam qanmanta asikunqaku.

6 Chay llaqtapi yachaq Israel casta kamachikuqkunaqa atiyniyoq kasqankuraykum runa wañuchiyllapi purinku.

7 Chay llaqtapi yachaqkunaqa mama-taytankutapas despreciankum,

paykunaqa forastero runakunamantapas qechurunkutaqmi imallankutapas.

Mana mama-taytayoqtapas chaynataq viudakunatapas ñakarichinkum paykunaqa.

8 Paykunaqa manamya respetankuchu santuarioykunatapas chaynataq samanankupaq qosqay punchawkunatapas.

9 Jerusalen llaqtapiqa manataqmá faltanchu runa wañuchisqa kananpaq cuento qepikunapas,

chaypi yachaqkunaqa orqokunamanmi rinku taytacha-mamachankuta adoraspa chaypi mikunankupaq.

Paykunaqa chay llaqtapa chawpinpipas hukwan-hukwanmi kakunku.

10 Chay llaqtapiqa taytankupa warminwanraqmi huchapakunku,

killanpi kachkaq warmikunatapas obligaspam paykunawan kakunku.

11 Chay llaqtapiqa runamasinpa warminwanpas huk kaqninmi millakuypaq kaqkunata rurakun,

hukñataqmi llumchuynintapas huchallichintaq,

wakinqa kakuntaqmi taytanmanta panillanwanpas.

12 Chay llaqtayoq wakin runakunaqa qollqetapas chaskikuykunmi runa wañuchinankupaq,

paykunaqa qollqetapas prestanku mirayllanpaqmi,

paykunaqa daño ruraywan runata ñakarichispam imallankutapas qechurunku.

Arí,

chay llaqtapi yachaqkunaqariki ñoqataqa qonqaruwankum.

Ñoqa Señor Diosmi chaynata nini.

13 “Jerusalen llaqta,

ñoqaqa makiywanmi sikurusqayki qampi yachaqkuna runamasinkupa imallankutapas qechurusqanmanta chaynataq runakunatapas wañuchiq kasqankumanta.

14 Chaynaqa cuentata mañaptiyqa amayá piensaychu qari-qariraq ñawpaqniypi sayaytaqa.

Ñoqa Tayta Diosqa kay rimasqaytaqa cumplisaqpunim.

15 Chaynaqa Jerusalen llaqta,

qampi yachaqkunataqa huklaw nacionkunamanmi cheqerachisaq,

ñoqaqa imapas wayrachichkaq hinam huklaw allpakunaman cheqerachisaq,

chaynapimá millakuypaq kaqkuna rurasqankutapas tukurachisaq.

16 Qampi yachaq runakunaqa nacionkunapa ñawpaqninpim kikillankumanta penqaypi kanqaku hinaspam chayraq yachanqaku Tayta Dios kasqayta.”

17 Tayta Diosmi rimapayawaspan niwarqataq kaynata:

18 —Runapa churin,

hornomanqariki chulluchinapaqmi hinana cobreta,

estañota,

fierrota,

titita hinaspa qollqeta,

chay metalkunapa puchuqnin qacha hinam Israel castakunaqa ñoqapaq rikurirun.

19 Chayraykum ñoqa Señor Dios nini kaynata:

“Llapallaykichik chay metalpa qachan hina kasqaykichikraykum Jerusalen llaqtapa chawpinman huñurusqaykichik.

20 Imaynam qollqetapas,

cobretapas,

fierrotapas,

tititapas hinaspa estañotapas hornopa chawpinman huñunku chaynapi pukutyachispa chulluchinankupaq,

chaynatam ñoqapas rabiallawanña piñakuspayqa qamkunata huñuruspa chullurachisqaykichik.

21 Arí,

ñoqaqa qamkunata huñuykuspam rabiallawanña piñakuyniyta hawaykichikman pukuykusaq hinaptinmi qamkunaqa chaypa chawpinpi chullurunkichik.

22 Chaynaqa hornopa chawpinpi qollqe chulluchisqa hinam qamkunapas llaqtapa chawpinpi chulluchisqa kankichik.

Chaynapim yachankichik kikiy Tayta Diospuni piñakuywan castigasqayta.”

23 Tayta Diosmi rimapayawaspan niwarqataq kaynata:

24 —Runapa churin,

qamqa Israel allpatayá niytaq kaynata:

“Qamqa kanki parapapas mana chayanan allpam,

chaynaqariki kachkanki castigasqayraykum.

25 Chaypi yachaq gobiernaqkunapas rimanakuruspam leonkuna hinaña rikurirunku,

paykunaqa qaparillawanñam runatapas hapiruspa mikurunku.

Paykunaqa qori-qollqetapas suwaruspam llaqtapiqa viudakunallataña saqerunku.

26 Chaypi sacerdotekunapas yachachikuyniykunatam qewiparunku,

paykunaqa santuarioykunatapas millakuypaqtañam rurarunku,

manam yachankuñachu mayqanmi ñoqapaq sapaqchasqa kasqantapas otaq millakuypaq kasqantapas,

manataqmi yachachinkuchu mayqenmi mikuna otaq mana mikuna kasqantapas,

manataqmi samankuchu samanankupaq qosqay punchawpipas.

Arí,

paykuna ukupiqa millakuypaq qawasqam kani.

27 Chay llaqtapi jefekunapas rikurirunku imapas hapisqanku tisaparuq atoqkuna hinañam,

paykunaqa listollañam kachkanku runakunata wañuchispa imallankupas qechurunankupaq.

28 Chay llaqtayoq ñoqamanta willakuqkunapas estucowan perqata blanqueachkaq hinaraqmi pakaykunku chay mana allin runakunapa rurasqanta,

revelacionpi qawaq tukuspam yanqakunallata willakunku,

adivinaq tukuspapas llullallatataqmi willakunku.

Paykunaqa:

‘Señor Diosmi nin kaynata’ nisparaqmi ninku,

ichaqa ñoqa Tayta Diosqa manam imatapas nirqanichu.

29 Kay nacionpi llapallan runakunaqa daño rurayllapi hinaspa suwakuyllapim kachkanku,

paykunaqa wakchakunatawan mana piyniyoqkuna ñakarichiyllapim kachkanku,

forastero runakunatapas daño ruraruyllata munaspankum mana munankuchu paykunawan allin arreglaykuytaqa.

30 Huk llaqtapa murallan perqaq runata maskachkaq hinam otaq huk murallapa raqranpi sayaq runata maskachkaq hinam huk runata maskarqani chay Jerusalen llaqta mana tuñichisqa kananpaq,

ichaqa chayna runataqa manam tarirqanichu.

31 Chayraykum ñoqaqa rabiallawanña hinaspa piñakuywan paykunataqa castigaspay tukurusaq,

imaynam mana allin kawsasqankutaqa kikillankumanmi kutiriykachisaq.

Ñoqa Señor Diosmi chaynata nini.”