2 —Runapa churin,

qamyá niy kaynata:

“Iskay warmikunam karqa huk mamapa wawallan.

3 Paykunaqa Egipto nacionpim sipasllaraq kaspanku chuchumika hina huchapakuyta qallaykurqaku,

chaypim paykunaqa ñuñunku mullkachikuyta qallaykurqaku.

Arí,

chaypimá paykunaqa doncella ñuñunkuta hapichikurqaku.

4 Chay mayorninpa sutinmi karqa Ahola,

chayqariki Samaria llaqtam,

sullkanpa sutinñataqmi karqa Aholiba,

chayqariki Jerusalen llaqtam paykunaqa karqa ñoqapa warmiykunam,

churiykunatam qaritapas-warmitapas wachakurqaku.

5 Aholam ñoqapa kachkaspanpas hukwan-hukwan kakuyta qallaykurqa,

Asiria nacion kuyaqnin tropakunata kuyakuruspam paykunawan pierdekururqa.

6 Chay tropakunaqa karqa moradonkama sumaqllaña pachasqam,

llapallankum karqa kamachikuqkuna hinaspa jefekuna,

paykunaqa allin qawapasllaña mozokuna kaspam sapakama caballokunapi sillakuqku.

7 Chaynapim chay Ahola sutiyoq warmiqa Asiria nacionniyoq llapallan allinnin runakunawan tupakururqa,

chay pierdekuqmasin runakunapa llapallan taytacha-mamachankunawanmi millakuypaq hinaña rikurirurqa.

8 Payqa Egipto nacionpi kaspanraqmi hukwan-hukwan kakuq rikurirurqa hinaspam kunanpas hina chaynallaraq kachkan.

Paywanqariki sipas kasqanmantapunim puñukuqku,

paypaqa ñuñunpas hapipayasqam karqa,

chay runakunamá hukwan-hukwan tupakuqllataña rurarurqaku.

9 Chayraykum ñoqapas Asiria nacionniyoq kuyaqninkunaman payta qoykuni.

10 Chaymi paykunapas chay warmitaqa qalallata rurarurqaku,

wawankunatapas qechuruspankum chay warmitaqa espadawan wañurachirqaku,

chaynataqa rurarqaku merecesqanman hinam.

Chaynapim chay warmiwan imam rurasqankuqa llapallan warmikunapa yachasqan karqa.

11 “Chay warmita imaynam castigasqayta ñañan Aholiba qawaykuspam aswan huchapakuytaraq qallaykurqa.

12 Chaynapimá Aholibapas Asiria nacionniyoq runakunawan huchapakuyta qallaykurqa.

Chay runakunaqa karqa kamachikuqkunam,

jefekunam,

suma-sumaqllaña pachasqa guerrapi peleaqkunam,

caballokunapi sillakuqkunam chaynataq allin qawapas mozokunam.

13 Qawarqanitaqmi chay warmipas imaynam huchaman wichiykusqanta.

Chaynapim paykunaqa iguallata kawsarqaku.

14 Ichaqa kay warmiqa aswan-aswan huchapakuqraqmi rikurirurqa.

Paymi perqakunapi rikururqa Babilonia nacionniyoq runakunapa pukankama dibujokunata.

15 Paypa qawasqanman hinaqa chay dibujokunaqa kasqa weqawninpas allin watasqakamam,

uma watankupas kasqa wayrapapas sumaqllaña rapapapachisqanmi.

Arí,

chay qawasqankunaqariki kasqa carretakunapi capitankunapa ayrin-ayriyoqmi.

16 Chaynapimá chay warmiqa paykunata qawaykuspan llumpayta munapayarqa,

chayraykum Babilonia nacionman willakuqkunata kacharqa.

17 Hinaptinmi Babilonia nacionniyoq runakunaqa hamuspanku paywan puñukurqaku,

chaynapim chay warmitaqa millakuypaqta rurarurqaku.

Warmipas chayna millakuypaq karuspanmi paykunataqa amirurqaña.

18 Chaynapimá chay Aholiba warmiqa llapa runapa yachasqanta hukwan-hukwan kakuqña rikurirurqa,

payqa qalalla kaytapas manañam penqakuqchu.

Chaymi ñañanta hina ñoqapas amirurqaniña.

19 Ichaqa payqa aswan-aswanraqmi hukwan-hukwan kakurqa,

Egipto nacionpi sipas kaynintapas yuyarispanmi chayna kakurqa.

20 Payqa llumpaytam munapayarqa Egipto nacionpi kuyaqninkunata.

Chay runakunapa qari kayninqa rikchakun asnokunapaman hinaraqmi,

paykunaqa sutuchinkupas caballokuna hinaraqmi.

21 “Yaw Aholiba,

qamqariki sipas kaynikipi huchapakuymanmi kutiriyta munachkanki,

qamqariki Egipto nacionpi sipas kaspa ñuñuyki hapichikusqaykitam yuyarayachkanki.

22 Chayraykum ñoqa Señor Dios nini kaynata:

Kunanqa amirusqayki kuyaqnikikunatam enemigoykimanña tikrarusaq,

tukuy hinastinmanta paykunata pusamuspam qampa muyuriqnikipi churarusaq.

23 Paykunaqariki hamunqaku Babilonia nacionmantam,

Caldea lawmantam,

Pecod lawmantam,

Soa lawmantam hinaspa Coa lawmantam,

paykunawantaqmi hamunqa Asiria nacionpi llapallan tropakunapas.

Paykunaqariki kanku allin qawapasllaña mozokunam.

Llapallankum kanku kamachikuq jefekuna,

carretakunapi capitankuna hinaspa allin reqsisqa runakuna,

paykunaqa llapallankum caballollapi purikuqkupas.

24 Paykunaqa contraykipim hamunqaku caballopa chutasqan guerrapaq carretayoqkuna chaynataq asnopa chutasqan llasaq carretayoqkuna.

Paykunaqa nana-nanaq tropayoq hamuspam tukuy hinastinmanta muyuykusunki,

wakinkum hamunqaku hatun harkachikunayoq,

wakinñataq taksa harkachikunayoq,

paykunaqa hamunqa cascoyoqkamam.

Chaynapim castigonkuman hina qamta castigasunki.

25 Chayraykum sientichiwasqaykimanta piñakuyniyta qampa hawaykiman kachaykamusaq hinaptinmi paykunaqa piñakuyllawanña tukuy imaymanata rurasunki.

Paykunaqa senqaykitapas rinrikitapas qoruruspam puchuqkunatapas llapallanta espadawan wañurachinqa.

Paykunaqa wawaykikunatapas qechurususpaykim puchuqkunatapas kañarunqaku.

26 Paykunaqa pachaykitapas chusturususpaykim sumaq alhajaykikunatapas hapikuykunqaku.

27 Puchukarachisaqmá Egipto nacionpi kaspayki llapa huchapakusqaykitapas chaynataq hukwan-hukwan kakusqaykitapas,

chaynapim manaña rikunkiñachu chaykunataqa nitaqmi yuyarinkiñachu Egipto naciontapas.

28 “Ñoqa Señor Diosmi nini kaynata:

Ñoqam qamtaqa kachaykusqayki cheqnisqayki hinaspa amisqayki runakunapa makinman.

29 Paykunaqa cheqnikuyllawanñam tukuy imaymanata rurasunki,

llamkaspayki ganakusqaykitapas paykunam hapikuykunqaku,

paykunaqa qalallatañam saqerusunki,

hukwan-hukwan kakusqayki cuerpoykitam llapallanman qawachinqaku.

Huchapakuspa hukwan-hukwan kakusqaykim

30 chaynataqa rurarusunki.

Arí,

qamqariki huklaw nacionniyoq runakunawanmi huchapakurqanki,

taytacha-mamachankuwanmi millakuypaqña rikurirurqanki.

31 Qamqariki ñañaykipa imaynam kawsakusqanman hinam kawsarqanki,

chayraykum pay castigasqayta hina qamtapas castigasqayki.

32 Ñoqa Señor Diosmi nini kaynata:

35 “Chaynaqa ñoqa Señor Diosmi nini kaynata:

Qonqaruspa qepanchakuruwasqaykiraykum kikillayki ñakarinki huchapakusqaykimanta chaynataq hukwan-hukwan tupakurusqaykimanta,

nispa.”

36 Chaymantam ñoqa Ezequielta Tayta Dios kaynata niwarqa:

—Runapa churin ¿yaqachum upallakuykuwaq Ahola hinaspa Aholiba warmikunapa contranpi sentenciayta?

Chaynaqa millakuyllapaqña rurasqankumantayá rimapayay.

37 Paykunaqa pierdekuq hinam huchallikurqaku,

paykunaqa runa wañuchisqankumantam yawar makintin kachkanku.

Paykunaqa traicionawaspankum taytacha-mamachakunataña yupaychachkanku.

Paykunaqa ñoqapaq wachakusqanku wawankutapas taytacha-mamachakunamanñam mikunankupaq hina kañapuchkanku.

38 Chaywanpas kaytawanmiki paykunaqa rurarqaku,

paykunaqa hina chay punchawllapim santuarioytapas millakuypaqtaña rurarurqaku,

qosqay samana punchawpipas manam samarqakuchu.

39 Taytacha-mamachakunaman wawankutapas wañuchisqanku punchawllapitaqmi hamuruspanku santuarioytapas millakuypaqtaña rurarurqaku.

¡Chaytaqa rurarqaku kikiypa temploypipunim!

40 —Willakuqkunata kacharuspankum karumantaraq runakunata qayachimurqaku.

Paykuna hamuruptinmi qam Aholibaqa bañapakuyta qallaykurqanki hinaspam qechipraykitapas pintapakuspa alhajakunawan churapakurqanki.

41 Qamqariki mesata prepararuspam sumaqllaña camaykipi tiyaykurqanki,

chay mesapa hawanmantaqmi churaykurqanki ñoqapaq sapaqchasqanku inciensotawan miski asnaq aceitetapas.

42 Chaymantam chaypi uyarikurqa llapa runakunapa fiestapi qayaykachakusqan,

paykunaqariki karqa chunniq lawmanta hamuq achka-achka runakunam.

Warmikunatapas sumaqllataña adornaspankum makinkumanpas brazaletekunataraq churarqaku,

hinachirqakutaqmi coronakunatapas.

43 Chaymi chay payayasqaña hukwan-hukwan kakuq warmimanta kaynata nirqani:

“Chay warmiqariki hukwan-hukwan kakuqmi,

hinañayá paywan kakuchunku” nispa.

44 Chaynapim paywan puñukurqaku imaynam huchapakuq warmiwan runakuna puñukuchkaq hina.

Ahola hinaspa Aholiba huchapakuq warmikunaman yaykuruspam paykunawan kakurqaku.

45 Ichaqa huchapakuqwan hinaspa runa wañuchiqkunawan imam ruranankuman hinam allin ruraq runakuna chay warmikunata sentencianqaku,

paykunaqariki kanku hukwan-hukwan kakuqmi,

runa wañuchiq kaspankum yawar makintin kachkanku.

46 Kaynatam Señor Dios nin:

—Llapa runakunayá huñunakuruchun paykunapa contranpiqa,

paykunata mancharichispayá tukuy imanta suwaruchunku.

47 Llapallan runakunayá rumiwan choqapaspa wañurachichunku,

espadankuwanyá kuchuparuchunku.

Wawankutapas wañuchispayá wasinkutapas kañaruchunku.

48 Kay millakuypaq huchapakuytaqa ñoqam kay nacionmanta chinkarachisaq,

chaynapim llapallan warmikuna yachanqaku amaña qamkuna hina huchapakunankupaq.

49 Ahola hinaspa Aholiba,

chay huchapakusqaykichikmantaqa qamkunamanmi wischupaykusunkichik,

taytacha-mamachakunawan huchallikusqaykichikmantam castigasqa kankichik chaynapim yachankichik Señor Dios kasqayta.