Timpuchkaq mankawan rikchanachiymanta
24
Isqon kaq watapa chunka kaq killanpi hinaspa chay killapa chunka kaq punchawninpim Tayta Dios rimapayawaspan niwarqa kaynata:
2 —Runapa churin,
kunan punchaw ima fecham kasqantayá apuntay.
Kunan punchawpunim Babilonia nacionpa reynin Jerusalen llaqtata guerrawan chawpicharun.
3 Ñoqa Señor Diospa nisqaytayá kay mana kasukuq runakunaman rimapayay kaynata rikchanachispa:
“Tullpamanyá mankata churkuykuy.
Chay mankamanyá yakuta talliykuy.
4 Chaymanqa hinaytaqyá allinnin aychatapas.
Hinaytaqyá piernan aychatawan brazontapas.
Huntachiytaqyá allinnin tullukunawanpas.
5 Allinnin ovejakunamantamá hapinkitaq huknin ovejata.
Hinaspam ukunman patananki tullu yanunapaq yantata.
Allintayá timpuchiy chaykunataqa.
Allintayá chayachichun chaypi kaq tullunkunataqa.
6 “Ñoqa Señor Diosmi nini kaynata:
¡Imallapiraq rikukunqa runa wañuchiq llaqtaqa!
Mankapa ukun yanayasqa hinañam
rikurirun chayna llaqtaqa.
Mankapa ukunpi mana lloqsiq qacha hinañam
rikurirun chayna llaqtaqa.
Huk-hukllamantayá horqoy mankapi aychakunataqa.
Lloqsimusqanman hinayá horqoy chay aychakunataqa.
7 Yawarllañam kachkan llaqtapa chawpinqa.
Lluchka rumipa hawanpi hinam kachkan chay yawarqa.
Manam allpapa hawanpichu kachkan chay chaqchusqa yawarqa.
Mana chinkarunanpaqmi mana ñutu allpapichu
kachkan chay yawarqa.
8 Arí,
chay yawartaqa chay lluchka
rumi hawanpim saqerusaq.
Mana imapas taparunanpaqmi chaytaqa
hinallapi saqerusaq.
Chaynapim ñoqaqa piñakuywan
chay yawarmanta vengakusaq.
9 “Ñoqa Señor Diosmi nini kaynata:
¡Imallapiraq rikukunqa runa wañuchiq llaqtaqa!
Kikiypunim ratarachisaq lenguachkaq ninataqa.
10 Qamyá apamuy achka yantakunata.
Hinaspayá chayachiy chay aychata.
Caldonpas chakinankamayá yanuy chay aychata.
11 Chay mana imayoqña mankataqa
huktawanyá sansaman churay.
Chay cobremanta mankataqa
Pukay-pukay kanankamayá chaynata ruray.
Chaynayá kachun ukunpi qacha kayninpas chullunankama.
Chaynayá kachun ukunpi yanayasqanpas manaña kanankama.
12 Ichaqa yanqapaqmi chay rurasqaykiqa.
Rupachisqapas manam lloqsinmanchu chay akasqa mankaqa.
13 “Jerusalen llaqta,
qampa qacha kaynikipim kachkan huchapakuykuna.
Qamtaqa mayllaykuyta munachkaptiymi mana munarqankichu limpio kayta,
piñakuywan castigaruptiyñam qamqa limpio kanki.
14 Ñoqa Tayta Diosmi chaynata rimarini,
hinaptinqa chaynapunim kanqa.
Mana qepaman kutirispam chaynatapuni rurasaq.
Mana llakipayarispam cumplisaqpuni.
Qamqariki imaynam kawsasqaykimantawan imam rurasqaykimantam castigasqa kanki.
Ñoqa Señor Diosmi chaynata nini.”
Ezequielpa warmin wañukusqanmanta
15 Tayta Diosmi rimapayawaspan niwarqataq kaynata:
16 —Runapa churin,
ancha kuyasqayki warmikitam qonqayllamanta qechurusqayki,
paymantaqa amam qaparinkichu nitaq waqankichu,
amataqmi weqellaykipas sutunqachu.
17 Llakispaqa-llakikuy upallallamantayá,
paymantaqa amataqyá lutokuychu.
Uma wataykitapas ama paskakuspayá amataq horqoychu usutaykitapas.
Llakimantaqa amataqyá simikitaqa tapakuychu hinaspapas amataqyá mikuychu chayna punchawkunapi mikuna mikuytaqa.
18 Madrugawninmi runakunawan parlarqani,
tardenmanñataqmi warmiy wañukurqa hinaptinmi paqarinnintinñataq rurarqani Tayta Diospa kamachiwasqanman hina.
19 Llapa runakunam tapuwarqa:
—¿Imatataq niyta munawankiku kay rurasqaykiwanqa?
—nispa.
20 Chaymi Tayta Diospa rimapayawasqanta paykunata nirqani:
21 —Israel castakuna,
qamkunapa anchallaña kuyasqaykichik hinaspa gustollawanña qawasqaykichik santuarioytam millakuypaqta rurarusaq.
Chay santuariopimiki qamkunaqa kallpanchakuspa hatunchakunkichik.
Qamkunapa saqemusqaykichik wawa-churikichikmi guerrawan wañunqaku.
22 Qamkunapas Ezequiel hinamá rurankichik,
llakimantaqa amam simikichiktapas tapakunkichikchu,
amataqmi mikunkichikchu chayna punchawkunapi mikuna mikuytaqa.
23 Uma wataykichiktapas ama paskakuspayá amataq horqokuychikchu usutaykichiktapas.
Amam qaparinkichikchu nitaq waqankichikchu.
Qamkunaqa mana kallpayoqñam karunkichik mana allin rurasqaykichikrayku,
llakispaqa-llakichinakunkichik kikikichikpurallam.
24 Ezequielmi kanqa qamkunapa qawanaykichikqa,
paypa tukuy ima rurasqanman hinam qamkunapas rurankichik.
Kaykuna cumplikuptinmi yachankichik Señor Dios kasqayta.
25 Tayta Diosqa niwarqataqmi:
—Runapa churin,
Israelpa castankunamantam qechurusaq santuarioyta,
paykunaqariki chaypim kallpanchakunku,
chaypa sumaqllaña kayninwan anchallataña kusikuspam chaytaqa gustollawanña qawanku.
Chaymantapas paykunamantaqa qechurusaqtaqmi wawa-churinkutapas.
26 Hinaptinmi chay punchawpi pipas guerramanta ayqekuq qanman noticiata apamusunki.
27 Chay punchawpim mana upallakuykuspa rimanki chay ayqekamuq runawan.
Chaynapimá qamqa paykunapaq ejemplo kanki,
chaynapim yachanqaku Tayta Dios kasqayta.