2 —Runapa churin,

qamyá qawariy Amon runapa mirayninkunata hinaspayá paykunapa contranpi ñoqamanta willakuy.

3 Niyá ñoqa Señor Diospa kayna rimapayasqayta:

“ ‘ Qamkunam allinta rurachun’ nispa nirqankichik santuarioy millakuypaq rurasqa kaptin,

chaynataqa nirqankichik Israel nacionpas purmachisqa karuptinmi chaynataq Juda lawpi yachaqkunapas preso apasqa karuptinkum.

4 Chaynaqa qamkunatam intipa qespimunan lawpi yachaq runakunaman qoykusqaykichik,

chakraykichiktapas hapikuykuspam chaypi campamentonkuta sayarachinqa chaypiña yachakunankupaq.

Chakraykichikpi ruruqtapas paykunañam mikukunqaku hinaspam tomanaykichik lechetapas paykunaña tomakunqaku.

5 Raba llaqtatapas tikrarusaq camellokunapa mikunan chakrakunamanmi,

ovejakuna michina pampakunamanñam tikrarusaq Amon naciontapas,

chaynapim yachankichik Tayta Dios kasqayta.

6 “Ñoqa Señor Diosmá nikichik:

Amonpa mirayninkuna,

qamkunaqariki taqllakusparaqmi kusikuymanta pawaykacharqankichik,

anchallataña despreciaspam anchallataña kusikurqankichik Israel nacionpa contranpi.

7 Chayraykum atiyniywan castigaspa huklaw nacionkunaman qosqaykichik,

paykunam tukuy imaykichikta qechusunkichik.

Qamkunataqa sacha kuchuchkaq hinam nacionkunapa chawpinmanta qoruruspa chinkarachisqaykichik.

Pasaypaqta purmarachiptiymi yachankichik Tayta Dios kasqayta.”

8 Señor Diosmi nin kaynata:

—Moab nacionpi hinaspa Seir lawpi kaqkuna,

qamkunam ninkichik Juda nacionqa wakin nacion hinalla kasqanta.

9 Chayraykum ñoqaqa Moab nacionpa waqtanta kicharusaq,

huknin waqtanmanta qallaykuspam huknin waqtankama llapa llaqtakunata purmarachisaq.

Chay llaqtakunaqariki paykunapa anchallaña kuyasqanku Bet-jesimotmi,

Baal-meonmi hinaspa Quiriatainmi.

10 Intipa qespimunan lawpi yachaq runakunamanñam dueñochakunankupaq qoykusaq paykunapa chakrankunatapas.

Amon nacionwan imam rurasqayta hinam paykunawanpas rurasaq,

chaynapim Amon nacionqa wakin nacionkunapipas manaña yuyasqachu kanqa.

11 Moab nacionta castigaptiymi yachanqaku Tayta Dios kasqayta.

12 Señor Diosmi nin kaynata:

—Edom nacionpi yachaqkunam vengakurun Juda nacionpi yachaqkunamanta,

chayraykum paykunaqa culpayoq kachkanku.

13 Chayraykum ñoqa Señor Dios nini kaynata:

Edom naciontam atiyniywan castigasaq,

runakunatapas animalkunatawan kuskatam wañurachisaq,

chay naciontaqa purmachisaqpunimá.

Teman llaqtamanta qallaykuspam Dedan lawpi tukunankama llapa runakuna guerrawan wañunqaku.

14 Israel runaykunawanmi vengakusaq Edom nacionpi yachaqkunamanta,

runaykunamá paykunataqa piñakuyniyman hina allinneqta castiganqa,

chaynapim yachanqaku vengakusqayta.

Chaynatamá ñoqa Señor Dios nini.

15 Señor Diosmi nin kaynata:

—Israelpa mirayninkunamantam Filistea runakuna vengakurun,

cheqnikuyllawanñam ñawpaqmantaraq enemigo kasqankurayku runaykunata chinkarachiypi rirqaku.

16 Chayraykum ñoqa Señor Dios nini kaynata:

Atiyniywanmi Filistea runakunata ñoqaqa castigasaq,

Ceret runakunatapas tukuruspaymi lamar qochapa patanpi puchuq llapallan runakunatapas chinkarachisaq.

17 Ancha-anchatam paykunamanta vengakurusaq,

piñakuywanmi paykunataqa castigarusaq,

chaynata vengakuruptiymi yachanqaku Tayta Dios kasqayta.