Tiro llaqtapa contranpi willakuymanta
26
Killapa punta kaq punchawninpim chunka hukniyoq watapi Tayta Dios rimapayawaspan niwarqa kaynata:
2 —Runapa churin,
Tiro llaqtapi yachaqkunam Jerusalen llaqtamanta kaynata nirqaku:
“Allinta rurachun,
nacionkunapa negocio apaykunanku punkum
ñutupasqanña kachkan kunanqa.
Ñoqamanñam kutirikamun chay negociokunaqa.
Chay llaqta chunninankamam huntay-huntay kasaq ñoqaqa.”
3 Chayraykum ñoqa Señor Dios nini kaynata:
Tiro llaqta,
qampa contraykipim
kachkani ñoqaqa.
Imaynam orqochakuspa-orqochakuspa
hatarin lamar qochaqa,
chaynam achka nacionkunata contraykipi
hatarirachisaq ñoqaqa.
4 Paykunamá taqmanqaku
Tiro llaqtapa murallankunatapas.
Paykunamá tuñichinqaku
Tiro llaqtapa torrenkunatapas.
Chay llaqtamantaqa
picharusaqmi puchuq allpatapas.
Lluchka rumita hinallañam
chay llaqtataqa saqerusaqpas.
5 Chay llaqtaqa mallakunata mastaspa
chakichina hinallañam
lamar qochapa chawpinpi puchurunqapas.
Ñoqa Señor Diosmi chaynata rimarini.
Arí,
chay llaqtaqa
llapa nacionkunapa qechupasqanmi kanqa.
6 Lamar qochapa patan llaqtachakunapi
runakunapas guerrawan wañuchisqamá kanqa.
Chaynapim yachanqaku Tayta Dios kasqayta.
7 Ñoqa Señor Diosmi kaynata nini:
Tiro llaqtapa contranpim pusamuchkani Babilonia
nacionpa reyninta.
Tiro llaqtapa contranpim pusamuchkani ancha reqsisqa
Rey Nabucodonosorta.
Payqa hamuchkan caballokunapiwan
carretakunawanmi.
Payqa hamuchkan silladakunapiwan
achkallaña tropakunawanmi.
8 Lamar qochapa patan llaqtachakunapi
runakunapas guerrawan wañuchisqamá kanqa.
Mana ayqenaykichikpaqmi
llaqtapa muyuriqninta murallarunqa.
Hapirusunaykichikpaqmi murallaykichikpa qepanpi
allpatapas huk hawaqllaman montonarunqa.
Qanmanqa harkachikunayoq soldadokunatam
kachaykamunqa.
9 Paykunaqa machu-machu takaq qerukunawanmi
murallaykichiktapas takanqaku.
Paykunaqa fierrokunawan waqtapachkaspallam
torrekichiktapas tuñirachinqaku.
10 Llaqtaykichikpa zaguanninta
Babilonia nacionpa reynin yaykuptinmi
llapa caballokunapa polvo hatarichisqan
tapaypaq-tapaykusunki qamtaqa.
Llapa caballokuna bullallawanña
zaguanninta yaykumuptinmi,
llapa carretakuna bullallawanña
zaguanninta yaykumuptinmi
murallaykichikpas katkatatanqa.
Purmachisqa llaqtaman hina yaykumuptinmi
chaynaqa kanqa.
11 Paykunapa caballonkunam sarupanqa
llapallan callekichikkunatapas.
Guerrawanmi wañuchisqa kanqa
llaqtaykichikpi runakunapas.
Pampaman wischusqam kanqa
allin takyaq pilarnikichikkunapas.
12 Negocioykichiktapas salteaspam
qori-qollqekichiktapas suwarunqaku.
Murallaykichiktapas tuñichispam
sumaqllaña palacioykichiktapas taqmaparunqaku.
Rumikunatapas qerukunatapas
lamar qochamanmi wischunqaku.
Ñutu allpatapas lamar qochamanmi wischunqaku.
13 Sumaqllaña takisqaykichiktapas
upallarachisaqmi ñoqaqa.
Arpaykichikpas manañam
uyarisqachu kanqa.
14 Mana imayoq lluchka rumita
hinallañam saqerusqayki.
Mallakunata mastaspa chakichina
hinallatañam saqerusqayki.
Manapunim huktawanqa hoqarisqañachu kanki.
Ñoqa Tayta Diosmi chaynata rimarini.
Ñoqa Señor Diosmi chaynata nini.
15 —Ñoqa Señor Diosmi nini kaynata:
Tiro llaqta,
qam wichiykuptikiqa ¿manachum katkatatanqa lamar qochapa patanpi kaqkunaqa?
Llaqtaykichikpa chawpinpi heridokuna waqaptinqa hinaspa runakuna wañuchisqa kaptinqa ¿manachum katkatatanqa chaypi kaqkunaqa?
16 Lamar qochapa patanpi llapallan reykunapas tiyanankumantam uraykunqaku.
Paykunaqa capankutawan sumaqllaña bordasqa pachankutapas horqokunqakuñam,
anchallaña manchakuywanmi pampallapiña tiyanqakupas,
tuñichisqa kasqaykita qawaykuspam paykunaqa sapa kutilla manchakuymanta katkatatanqaku hinaspam muspaypi hina kanqaku.
17 Chayraykum kay aya takita qampaq takipusunki:
“Ancha-ancha alabasqa Tiro llaqta,
lamar qochapi kaqkunapa yachasqan llaqta,
qamqariki lamar qochapi allin takyaqmi karqanki.
Qamqariki muyuriqnikipi yachaqkuna manchachiqmi karqanki.
Hinaspaqa ¿imaynanpitaq kayna tuñichisqaqa rikurirunki?
18 Kunan kay wichiykusqaykiwanqa
lamar qochapa hichpanpi nacionkunam
manchakuymanta katkatatanqaku.
Kunan kay chinkarusqaykiwanqa
lamar qochapa hichpanpi kaqkunam
anchallataña manchakunqaku.”
19 —Ñoqa Señor Diosmi nini kaynata:
“Qamta purmarachispaymi mana pipapas yachanan llaqtataña rurarusqayki,
lamar qochapi uku-uku yaku hamuspanmi qamtaqa tapaykusunki.
20 Chaynapim qamtaqa kachaykusqayki wañusqakunapa maymi wichinanman,
chay runakunaqariki ñawpaq tiempopi kawsakuqraqmi karqaku.
Qamtaqa kachaykusqayki allpapa ukunpi yachanaykipaqñam,
qamqariki rikurirunki ñawpaq tiempopi purmasqa raqaykuna hinañam,
qamqariki yachanki wañusqakunapa maymi yachananpiñam.
Runakunapa kawsanan kay pachapiqa manam hoqarisqañachu kanki.
21 Manchakuypaqmanña tikraruptiymi qamqa mana kaqña rikurirunki.
Maskaspapas manañam haykapipas tarisunkichu.
Ñoqa Señor Diosmi chaynata nini.”