Tiro llaqta tuñichisqa kasqanmanta aya taki
27
Tayta Diosmi rimapayawaspan niwarqataq kaynata:
2 —Runapa churin,
qamyá Tiro llaqtamanta takiy aya takita.
3 Tiro llaqtaqariki lamar qochaman yaykunapa punkunpim kachkan,
chay llaqtaqa kachkan lamar qochapa patanpi llapa yachaqkunapa negocio ruranankum.
Ñoqa Señor Diospa nisqaytayá kaynata niy:
“Tiro llaqta,
qamqa sumaqllaña viajero
buquepaqmi hapikunki.
4 Linderoykiqa chayan
lamar qochapa sonqonkamaraqmiki.
Qamtaqariki buque ruraqkunam
sumaqllataña rurarusunki.
5 Llapallan tablaykikunatapas rurarqaku
Senir Orqomanta apamusqanku cipres sachamantam.
Wayra apananpaq tela takyachiq qerutapas rurarqaku
Libano Montepi cedromantam.
6 Yaku qachina palaykikunatapas rurarqaku
Basan lawpi encina sachamantam.
Tapaqniki tablakunatapas rurarqaku
Chipre law lamar qochapa patanpi boj sachamantam.
Chaynataqa rurasurqanki
elefantepa waqonwan adornasqatam.
7 Wayrapa apanan telaykipas
Egipto nacion fino linomantam bordasqa karqa.
Bandera hinaraqmiki
chay telaykiqa servikurqa.
Tapaq toldoykipas moradomantawan
grosellamantam karqa.
Elisa law lamar qochapa
patanmanta apamusqam karqa.
8 Sidon llaqtayoqkunapiwan
Arvad llaqtayoqkunam
yaku qachipuqniki karqa.
Yachayniyoqkuna chawpikipi kaspam
paykunaqa buque manejaq karqa.
9 Gebal llaqtayoq allin yachaq hichu runakunam
tablaykikuna uchkukuruptinpas sumaqllataña allicharuqku.
Lamar qochapi llapallan buquekunapi llamkaqkunam
imaykikunatapas negociaqku.
10 Persia,
Lidia hinaspa Libia nacionniyoq runakunam
guerrapaq tropaykipas karqaku.
Paykunaqa harkachikunankutapas,
casconkutapas
qampa waqtaykipim warkuqku.
Sumaq qawapasllaña kanaykipaqmi
chaynataqa warkuqku.
11 “Qampa tropaykipiwan Arvad llaqtayoqkunam muyuriqnin murallaykipi karqaku,
torrekikunapim sayarqaku Gamad llaqtayoq runakuna,
aswanraq sumaqyachisunaykipaqmi paykunapa harkachikunanpas qampa murallaykikunapi warkurayarqa.
12 Llumpay qori-qollqeyoq kasqaykiraykum Tarsis law runakunapas qanwan negociota rurarqa,
negociota qoptikim paykunañataq qosurqanki qollqeta,
fierrota hinaspa estañotawan titita.
13 Qanwantaqmiki negociota rurarqa Grecia nacionniyoq runakunapas chaynataq Tubal hinaspa Mesec lawpi yachaqkunapas,
paykunaqariki pagasurqanki sirviente runakunata qosuspaykim,
qosurqankitaqmi broncemanta kaqkunatapas.
14 Togarma castakunañataqmi pagasurqanki llamkaq caballokunawan sillakuna caballokunawan hinaspa mulakunawan.
15 Rodas lawpi runakunapas qanwanmiki negociota rurarqa,
arí,
qamqariki lamar qochapa patanpi achkallaña nacionkunawanmi negociota rurarqanki,
paykunam pagasurqanki elefantepa waqonwan hinaspa ebano qerukunawan.
16 Qampaqa imaykikunapas nana-nanaq kaptinmi Edom nacionniyoq runakunapas qanwan negociota rurarqa,
chay imaykikunapas rantinanpaqmi apamuqku esmeralda alhaja rumikunata,
grosella telakunata,
sumaq bordasqa telakunata,
lino telakunata,
coral alhaja rumikunata hinaspa rubi alhaja rumikunata.
17 Juda nacionpi hinaspa Israel nacionpi yachaqkunapas qanwan negociota ruraspankum pagasurqanki Minit lawpi trigokunawan,
panag sutiyoq mikuykunawan,
mielwan,
aceitewan hinaspa balsamowan.
18 Damasco llaqtayoqkunapas imapas rurasqaykitawan qori-qollqekitam achkanpi rantisurqanki,
paykunaqa qanmanmi pagasurqanki Helbon lawmanta kaq vinowan chaynataq Sahar lawmanta kaq millwawanpas.
19 Qanmanqa Uzal lawmantam apamusurqanki vinota,
martillasqa fierrota,
casia especeriata hinaspa calamo especeriata.
Chaykunawanmá paykunaqa tukuy imaykitapas rantisurqanki.
20 Dedán lawpi runakunapas qanwanmi negociota rurarqa sillakunapaq sobrepelota rantikususpayki.
21 Arabia lawpi yachaqkunawan Cedar lawpi kamachikuqkunapas qanwanmi negociota rurarqaku,
paykunamá pagasurqanki maltapas-hatunpas carnerokunawan hinaspa chivatokunawan.
22 Saba lawmanta kaqkunapiwan Raama castakunam qanwan negociota rurarqaku hinaspam paykunaqa pagasurqanki balsamo sutiyoq aceitewan,
alhaja rumikunawan hinaspa qoriwanpas.
23 Qanwantaqmi negociarqaku Haran llaqtayoq runakunapas,
Cane llaqtayoq runakunapas,
Eden lawpi yachaqkunapas,
Saba lawpi yachaqkunapas,
Asiria nacionniyoq runakunapas hinaspa Quilmad lawpi yachaqkunapas.
24 Paykunamá rantikusurqanki fino telakunata,
morado telamanta capakunata,
sumaq bordasqa telakunata,
sumaqllaña colorniyoq alfombrakunata hinaspa sumaq qewisqa cablekunata,
chaykunataqa rantikurqaku qamkunapa plazaykichikpim.
25 “Tarsis lawmantam buquekuna
qatiylla-qatinakamurqa imakunatapas apamususpayki.
Huntay-huntay llasaqllataña cargaykachikuspam
lamar qochapa chawpinkunapi tarikurqanki.
26 Qamtaqa yaku qachipusuqnikikunam
ukullay-uku yakunkunata pusasurqanki.
Ichaqa intipa qespimunan lawmanta hamuq vientom
lamar qochapa chawpinpi pakiparusurqanki.
27 Llapallan qori-qollqekikunapas,
tukuy negociopaq imaykipas
lamar qochapa chawpinmanmi wichiykunqa.
Qampi llamkaqkunawan manejaqkunapas
hinaspa tablayki allichaqkunapas
chaynataq lliw negocio ruraqkunapas
lamar qochapa chawpinmanmi wichiykunqa.
Guerrapi peleaq llapallan tropakunapas.
Chaypi riq llapachallan runakunapas
chay wichiykusqayki punchawmi
lamar qochapa chawpinman wichiykunqa.
28 Qampi llamkaqkuna qaparkachaptinmi
lamar qochapa patanpi pastollaña
chakrakunapas katkatatanqa.
29 Buquepi yaku qachiq runakunapas
buquenkuta saqeruspam ayqekunqaku.
Buquepi llamkaqkunawan lliw manejaqkunapas
pampapim sayarinqaku.
30 Qanmantam llakikuyllawanña
hinaspa qapariyllawanña waqanqaku.
Umankumanpas ñutu allpata hinakuspam
uchpa pampapi pitpititinqaku.
31 Qanmanta llakiwanmi umankutapas
kachiy-kachiyta rutukunqaku.
Qanmanta lutokuspankum
llakikuyllawanña waqanqaku.
Qamraykum sonqonkupas nanarisqa
llakikuyllawanña waqanqaku.
32 Qamraykum aya takita takispanku
llakillawanña kaynata ninqaku:
‘¡Pitaq tupachikunman Tiro llaqtamanqa!
Lamar qochapa chawpinpimiki karqa chay llaqtaqa.’
33 Qamqariki achkallaña runakunatam saksaykachirqanki
negociowan lamar qochanta imakunatapas apaspayki.
Kay pachapi reykunatam apuyachirqanki
qori-qollqetawan tukuy imata apaspayki.
34 Kunanmi ichaqa lamar qochapa pakipasqan kachkanki.
Kunanmi ichaqa ukullay-uku yakukunamanña wichiykunki.
Tukuy imaykipas qanwan kuskam wichikuykun.
Llapallan qanwan riqkunapas
qanwan kuskam chinkakuykun.
35 Lamar qochapa patanpi llapallan yachaqkunam
mancharisqallaña kachkan.
Reyninkupa uyanpas sutillam hukmanyasqa
hinaspa mancharisqallaña kachkan.
36 Huklaw nacionpi negociantekunapas
qamta qawaykuspam admirakuchkan.
Qamqariki manchakuypaq kaqmanñam tikrakurunki.
Qamqariki wiña-wiñaypaqñam puchukarunki. ”