Tiro llaqta reypa contranpi willakuymanta
28
Tayta Diosmi rimapayawaspan niwarqataq kaynata:
2 —Runapa churin,
ñoqa Señor Diospa nisqayman hinayá Tiro llaqtapa reyninta niy kaynata:
“Sonqoykipi hatunchakuspam kaynata nirqanki:
‘Ñoqaqariki Diosmi kani.
Ñoqaqariki Diospa tiyananpim
lamar qochapa chawpinpi tiyakuchkani’
Qamqariki manam Dioschu kanki
aswanqa runallamiki.
Qamqa Diospa piensasqanman hinaraqmi
piensaq tukurqanki.
3 ¿Danielmantapas aswan yachayniyoqchum
qamqa kanki?
¿Tukuy pakasqakuna kaqkunapas reqsiqchum
qamqa kanki?
4 Qamqa yachayniyoq kaspaykim
tukuy imata huñukuykunki.
Qamqa entiendeq kaspaykim
qori-qollqeta waqaychanaykiman huñukuykunki.
5 Negociopaq yachayniyoq kaspaykim
tukuy imaykita llumpayllataña mirarachinki.
Ichaqa tukuy imaykikunam
qamtaqa hatunchakuqtaña rurarusunki.
6 Chayraykum ñoqa Señor Dios nini kaynata:
Qamqa Diospa piensasqanman hinaraqmi
piensaq tukurqanki.
7 Chayraykum ñoqaqa huklaw nacion runakunata
contraykipi pusamuchkani.
Mana llakipayakuq runakunatam ñoqaqa
contraykipi pusamuchkani.
Paykunamá sumaqllaña yachayniyoq kachkaptikipas
espadankuta horqonqaku.
Hinaspamá paykunaqa qampa sumaqllaña kaynikita
millakuyllapaqtaña rurarunqaku.
8 Qamtaqa wañusqakunapa kasqanmanmi kachaykusunki.
Qamqa lamar qochapa chawpinpim qonqayllata wañukunki.
9 ¿Hinaraqchum qamqa Diospaq hapikunki
wañuchiqnikikunapa makinpi kaspayki?
Wañuchiqnikikunapa makinpiqa
manamiki kanki Dioschu aswanqa runallamiki.
10 Diosta mana yupaychaq runakuna hinam
qamqa wañunki.
Huklaw nacionniyoq runakunapa makinpim
qamqa wañunki.
Ñoqa Tayta Diosmi chaynata rimarini.
Ñoqa Señor Diosmi chaynata nini.”
Tiro llaqtapi reymanta aya taki
11 Tayta Diosmi rimapayawaspan niwarqataq kaynata:
12 —Runapa churin,
qamyá ñoqa Señor Diospa nisqayman hina kay aya takita Tiro llaqtapi reyman niy kaynata:
“Qamqa suma-sumaq sello hinam karqanki.
Qamqa mayna-mayna yachayniyoqmi karqanki.
Qamqa mayna kuyayllapaq suma-sumaqmi karqanki.
13 Qamqa Diospa huertan Edenpim karqanki.
Qamqa imaymana alhaja rumikunawanmi
adornasqa karqanki.
Qamqa sardio,
topacio,
diamante alhaja rumikunawan
adornasqam karqanki.
Qamqa berilo,
onice,
jaspe alhaja rumikunawan
adornasqam karqanki.
Qamqa zafiro,
esmeralda,
carbunclo alhaja rumikunawan
adornasqam karqanki.
Qampaqqa chay alhajakuna hapiqninpas karqa
fino qorimantamiki.
Chaykunaqa unanchasqa kasqayki punchawmiki
qampaq alistasqa kapusurqanki.
14 Qamqa querubin sutiyoq angelmi karqanki.
Harkanaykipaq angel hinam sapaqchasqa karqanki.
Chaynataqa ñoqamiki qamtaqa churaykurqayki.
Qamqa Diospaq sapaqchasqa orqopim karqanki.
Llipipipichkaq rumikunapa chawpinpim purirqanki.
15 Qamqa unanchasqa kasqaykimantapunim
mana huchayoqlla kawsakurqanki.
Huk punchaw huchallikurunaykikamam
chaynataqa kawsakurqanki.
16 Qamqa llapa negocio rurasqaykiwanmi
dañollataña rurarqanki.
Chaynapimá qamqa llumpayllataña
huchallikurqanki.
Hinaptinmi millakuypaqña kaptiki
ñoqa Diosqa orqoymanta qarqorurqayki.
Chaynaqa harkaq angel,
ñoqam qamtaqa
llipipipichkaq rumikunapa
chawpinmanta chinkarachirqayki.
17 Qamqariki sumaqllaña kasqaykiraykum
llumpayllataña hatunchakurunki.
Qamqariki qawapasllaña kasqaykiraykum
yachaynikitapas chinkarachinki.
Chayraykum qamtaqa pampamanña wischuykuyki.
Reykunapa ñawpaqninpipas penqaymanñam churaruyki.
18 Qamqariki mana allin negocio rurasqaykiwanmi
llumpa-llumpayta huchallikurunki.
Qamqariki chaynata ruraspam
temploykikunatapas millakuypaqtaña rurarunki.
Chayraykum ñawpaqnikimanta ninata rikurirachispay
qamtaqa ruparachirqayki.
Kunanqariki llapa qawaqnikikunapa ñawpaqninpim
pampapi uchpamanña tikraruyki.
19 Llapallan nacionkunapi reqsisuqnikikunam
qamta qawaykuspa mancharikunqaku.
Qamqariki manchakuypaq kaqmanñam tikrakurunki.
Qamqariki wiña-wiñaypaqñam puchukarunki.”
Sidon llaqtapa contranpi willakuymanta
20 Tayta Diosmi rimapayawaspan niwarqataq kaynata:
21 —Runapa churin,
Sidon llaqtata qawarispayá paypa contranpi ñoqamanta willakuy.
22 Niyá ñoqa Señor Diospa kayna rimapayasqayta:
“Sidon llaqta,
ñoqaqa contraykipiñam kachkani.
Contraykipi sentenciaspay castigaptiymi,
qamrayku mana huchayoq reqsisqa kaptiymi
yachanqaku ñoqaqa Tayta Dios kasqayta.
23 “Qanmanmi kachaykamusqayki peste onqoyta
hinaptinmi callekikunapipas purichisaq yawarta.
Qampi yachaqkunapas chawpikipim
wañusqa wichiykunqaku.
Tukuy hinastinmanta guerra hamuqwanmi
wichiykunqaku.
Chaynapim yachanqaku ñoqaqa Tayta Dios kasqayta.
24 “Israel castakunapaqqa
manam kanqañachu chay kichka hina tuksipayaqninkunaqa
nitaq itana hina tuksipayaspa despreciaqnin nacionkunaqa.
Chaynapim yachanqaku ñoqaqa Señor Dios kasqayta.
25 “Ñoqa Señor Diosmi nini kaynata:
Maymanpas cheqerusqanku nacionkunamantam ñoqaqa Israelpa castankunata huñumusaq hinaspam llapa nacionkunapa qawasqanta paykunaman qawachisaq ñoqaqa mana huchayoq kasqayta.
Israelpa castankunaqa yachanqaku serviqniy Jacobman qosqay allpapim.
26 Chay allpapiñam confianzawan yachakuspanku wasinkutapas rurakunqaku hinaspam uvas huertakunatapas plantakunqaku.
Chaynamá paykunaqa confianzawanña yachakunqaku.
Chaynaqa kanqaku muyuriqninpi despreciaqnin nacionkunata sentenciaspay castigaptiymi,
chaynapim yachanqaku Israel castakunapa yupaychasqan Tayta Dios kasqayta.”