Egipto nacionpa contranpi willakuymanta
29
Chunka kaq watapa chunka kaq killanpi hinaspa chay killapa chunka iskayniyoq kaq punchawninpim Tayta Dios rimapayawaspan kaynata niwarqa:
2 —Runapa churin,
qamyá qawariy Egipto nacionpa reynin Faraonta hinaspayá paypa contranpi chaynataq tukuy nacionninpa contranpipas ñoqamanta willakuy.
3 Niyá ñoqa Señor Diospa kayna rimapayasqayta:
“Egipto nacionpa reynin Faraon,
contraykipiñam kachkani ñoqaqa.
Mayuykikunapi waqtapakuq
hatu-hatun lagarto hinam kanki qamqa.
‘Nilo Mayuqa ñoqapam’ nisparaqmi qamqa ninki.
‘Kay mayutaqa ñoqapaqmi rikurichirqani’ nisparaqmi qamqa ninki.
4 Ñoqam qamtaqa challwata hina ganchokunawan
kakichuykimanta hapirusqayki.
Mayuykipi kaq challwakunapas
escamaykimanmi ratakurusunki.
Chayna ratakusqa kachkaptinmi
mayuykimanta horqorusqayki.
5 Qamtaqa chay waqtaykikunapi challwakunatawanmi
chunniqpi saqerusqayki.
Qamtaqa manam pipas hoqarisunkichu
pampaman wichiykuptiki.
Qamtaqa qoykuyki purun animalkunapa
mikunan kanaykipaqñam.
Qamtaqa qoykuyki alton pawaq animalkunapa
mikunan kanaykipaqñam.
6 Chaynapim Egipto nacionpi llapallan kaqkuna
ñoqa Señor Dios kasqayta yachankichik.
“Israel castakuna yanapakuyta maskaptinkupas
soqos kaspi hinallam karqankichik.
7 Qanman hapipakuykusuptikim pakikururqanki.
Chaynapim wasallantapas ikirurqanki.
Qanman tawnapakuykuptinkum ñutupakururqanki.
Chaynapim wasallankutapas qewi-qewita rurarurqanki.
8 “Chayraykum ñoqa Señor Dios nini kaynata:
Egipto nacion,
ñoqaqa qampa contraykipim guerrata hatarichimuchkani runakunatapas chaynataq animalkunatapas wañuchinankupaq.
9 Qamqa chunnichkaq purmasqaña karuspam yachanki Tayta Dios kasqayta.
Qanmi nirqanki:
‘Nilo Mayuqa ñoqapamiki,
kay mayutaqa ñoqam rikurichirqani’ nispa.
10 Chayraykumá ñoqaqa qampa contraykipi hinaspa Nilo Mayuykipa contranpiña kachkani.
Egipto nacionta purmarachiptiymi chayna purmasqa chunnisqaña kanqa Migdol llaqtamanta qallaykuspa Asuan sutiyoq llaqtapi tukunankama,
chayqariki kachkan Cus nacionpa qallariyninpiñam.
11 Runapas animalpas manañam chaynintaqa purinqachu,
tawa chunka watapunim chaypiqa manaña pipas yachanqachu.
12 Yaw Egipto nacion,
wakin nacionkunamantapas purmasqa nacionmanñam tikrarusqayki,
tawa chunka watapunim qampi kaq llaqtakunapas wakin llaqtakunamanta purmasqaña kanqa,
qampi yachaqkunatapas tukuy hinastinmanmi cheqerachisaq,
qamtaqa huklaw nacionkunamanmá qarqorusqayki.
13 “Chaynaqa ñoqa Señor Diosmá nini kaynata:
Tawa chunka wata cumplikuruptinmi Egipto nacionniyoqkunata huñusaq cheqechisqay nacionkunamanta.
14 Preso pusasqa kaqkunatam kutichimusaq Patros sutiyoq lawman,
chay lawmanta kaqkunamiki paykunaqa karqaku,
chaypim paykunaqa mana ancha reqsisqa nacionllaña kanqaku.
15 Wakin nacionkunamantapas pisi atiyniyoqllaña kaspanmi wakin nacionkunapa contranpiqa manaña sayarinqachu,
paykunataqa mana kallpayoqtaña ruraruptiymi wakin nacionkunatapas manaña gobiernanqachu.
16 Chaynapim Israel castakunapas manaña hapipakunqachu Egipto nacionmanqa,
chayraqmi musyakurunqaku Egipto nacionpa yanapakuynin maskasqankuqa huk pantay kasqanta,
chayraqmi yachanqaku ñoqaqa Señor Dios kasqayta.”
17 Iskay chunka watapa punta kaq killanpi hinaspa chay killapa punta kaq punchawninpim Tayta Dios rimapayawaspan niwarqa kaynata:
18 —Runapa churin,
Babiloniapa reynin Nabucodonosormi ñakariyllawanña servichikuspan tropankunata kachaykun Tiro llaqtapa contranpi,
chayraykum tropankunaqa paqla umaña kallachkankupas,
hombrollankupas kachkan mata-matañam,
ichaqa manam kikin reypas nitaq tropankunapas imallatapas allintaqa horqonkuchu chay sasallaña llamkasqankumantaqa.
19 Chayraykum ñoqa Tayta Dios nini kaynata:
Babilonia nacionpi Rey Nabucodonosormanqa Egipto naciontañam qochkani,
chaynapim qori-qollqentapas hinaspa tukuy imantapas qechurunqa,
chaykunawanñam chay reyqa tropankunaman paganqa.
20 Chaynaqa Tiro llaqtapa contranpi Rey Nabucodonosor ñoqapaq llamkasqanmantamá Egipto naciontaña pagonpaq qochkani,
chaynatam ñoqa Señor Dios nini.
21 —Chay tiempopim Israel castakunataqa kallpasapallataña rurarusaq hinaptinmi qamñataq Ezequiel mana upallakuykuspaña paykunapa chawpinpi rimanki,
chaynapim yachanqaku Tayta Dios kasqayta.