Egipto nacion castigasqa kananmanta
30
Tayta Diosmi rimapayawaspan niwarqataq kaynata:
2 —Niyá ñoqa Señor Diospa kayna rimapayasqayta:
“¡Achachalláw!
nispayá waqaychik.
¡Imaraq chay punchawpi kanqa!
nispayá waqaychik.
3 Chay punchawqariki chayamuchkanñam.
Tayta Diospa castiganan punchawqa hichpamuchkanñam.
Chay punchawqa puyullaña punchawmi kanqa.
Chay punchawqa nacionkuna castigana punchawmi kanqa.
4 Egipto nacionmanmi guerra chayamunqa.
Cus nacionpim llakikuy kanqa.
Egipto nacionpi wañuqkuna
wichiykuptinkum chaynaqa kanqa.
Hinaptinmi qori-qollqenkutapas apakunqaku.
Chaymi llaqtankupa cimientontapas tuñirachinqaku.
5 Wañunqakutaqmi Cus nacionpi yachaqkunapas
chaynataq Lidia hinaspa Libia nacionpi yachaqkunapas.
Wañunqakutaqmi Cub nacionniyoq runakunapas
chaynataq huklaw nacionniyoq nana-nanaq runakunapas.
Chaypimá wañunqaku ñoqawan contrato
ruraqpa allpanpi yachaqkunapas.
6 “Ñoqa Tayta Diosmi kaynata nini:
Egipto nacionniyoqkunata yanapaqkunapas
chay guerrapim wañunqa.
Egiptopa kallpanchakuspa hatunchakuyninpas
humillasqam kanqa.
Migdol llaqtamanta qallaykuspam
Asuan sutiyoq llaqtapi tukunankama chaynaqa kanqa.
Chaynatamá ñoqa Señor Dios nini.
7 “Egipto nacionqa wakin nacionkunamanta
aswan purmasqam kanqa.
Chaypi llaqtakunapas wakin llaqtakunamantapas
aswan purmasqaraqmi kanqa.
8 Egipto nacionta kañaykuptiymi
chayraq yachanqaku Tayta Dios kasqayta.
Egipto nacion yanapaqkunata chinkarachiptiymi
chayraq yachanqaku Tayta Dios kasqayta.
9 “Egipto nacionta castiganay punchaw chayaramuptinmi willakuqkunata kachamusaq buquekunapi,
chaynapim Cus nacionpi hawka yachaqkunata mancharichinqaku,
paykunaqa llumpay llakikuyllapiñam kanqaku.
Arí,
chay punchawqa ñamá hichpaykamuchkanña.
10 “Ñoqa Señor Diosmi nini kaynata:
Babilonia nacionpa reynin Nabucodonosorwanmi
chinkarachisaq.
Egipto nacionpa nana-nanaq runankunatam
chinkarachisaq.
11 Payqa llapallan tropankunawan kuskam rinqa.
Pasaypaq mana llakipayakuqmi chay tropankunaqa.
Paykunaqa chay nacionta
purmachinankupaqmi kachasqa kanqaku.
Paykunaqa espada makintinmi
Egipto nacion runakunata wañuchinqaku.
Llapa wañusqakunawanmi chay naciontaqa
huntaypaq-huntarachinqaku.
12 Ñoqaqa Nilo Mayutapas chakirachispam
mana allin ruraq runakunamanña rantikurusaq.
Chaynapim forastero runakunawan
ñoqaqa chay nacionta purmarachisaq.
Chaypi tukuy ima kaqkunatapas
ñoqam puchukarachisaq.
Ñoqa Tayta Diosmi chaynata nini.
13 “Ñoqa Señor Diosqa ninitaqmi:
Chinkarachisaqmi taytacha-mamachakunatapas.
Ñoqaqa chinkarachisaqtaqmi
Menfis llaqtapi
taytacha-mamachakunatapas.
Kamachikuqpas manañam kanqañachu Egipto nacionpiqa.
Manchakuypa huntasqanñam kanqaku chaypi yachaqkunaqa.
14 Purmarachisaqtaqmi Patros lawtapas.
Kañaykusaqtaqmi Zoan llaqtatapas.
Sentenciaspaymi castigasaq Tebas llaqtatapas.
15 “Egipto nacion harkaq Sin llaqtatapas
piñakuywanmi castigasaq.
Tebas llaqtapi nana-nanaq runakunatapas
ñoqam chinkarachisaq.
16 Egipto naciontaqa ñoqamá kañaykusaq.
Sin llaqtataqa nanaywanmi pitpititichisaq.
Tebas llaqtapa murallankunapas
uchkupasqallañam rikurirunqa.
Menfis llaqtapas sapa punchawmi
guerrawan sasachakuypi kanqa.
17 On llaqtapi mozokunapas
guerrapim wañunqaku.
Pibeset llaqtapi mozokunapas
guerrapim wañunqaku.
Chay llaqtakunapi wakin yachaqkunapas
preso apasqam kanqaku.
18 Yugo pakichkaq hina Egipto nacionpa
atiyninta puchukarachiptiymi
Tafnes llaqtapi punchawpas tutayarunqa.
Egipto nacionpa kallpanchakuspa
hatunchakusqanta puchukarachiptiymi
yana puyuraq paykunata tapaykunqa.
Chay nacionpa taksa llaqtachankunapi yachaqkunapas
preso apasqam kanqa.
19 Sentenciaspay castigaptiymi
chayraq Tayta Dios kasqayta yachanqaku paykunaqa.”
20 Chunka hukniyoq watapa punta kaq killanpi hinaspa chay killapa qanchis kaq punchawninpim,
Tayta Dios rimapayawaspan kaynata niwarqa:
21 —Runapa churin,
Egipto nacionpa reynin Faraonpa makinta pakiruchkaq hinam paypataqa atiyninta pakiruni.
Hinaptinmi huktawan kallpata hapinanpaq mana pipas hampiykuqnin kanchu nitaq wankuykuqninpas.
Chaynapimá espadallanpas mana hapiy atiqña kachkan.
22 Chayraykum ñoqa Señor Dios nini kaynata:
“Egipto nacion rey Faraonpa contranpim kachkani,
paypa iskaynin makintam pakirusaq.
Espadata manaña hapinanpaqmi pakirusaq allinraq kaq makintapas chaynataq pakisqaña makintapas.
23 Ñoqaqa tukuy hinastinmanmi cheqerachisaq Egipto nacionpi runakunataqa,
paykunataqa huklaw nacionkunamanñamá qarqorusaq.
24 Babilonia nacionpa reyninta kallpanchaykuspaymi qoykusaq huk espadata.
Chaywanmi pakirachisaq Egipto nacionpa reynin Faraonpa makinkunata,
payqa wañuywan ñakaristinmi waqanqa enemigonpa ñawpaqninpi.
25 Babilonia nacionpa reyninta kallpanchaptiymi Rey Faraonpa kallpanñataq chinkarunqa.
Babilonia nacion reypa makinman espadayta churaptiymi payqa Egipto nacionpa contranpi hatarinqa,
chayraqmi yachanqaku Tayta Dios kasqayta.
26 Ñoqaqa tukuy hinastinmanmi cheqerachisaq Egipto nacionpi runakunata.
Paykunataqa huklaw nacionkunamanñamá qarqorusaq,
chayraqmi yachanqaku Tayta Dios kasqayta.”