Salomonpa wakin rimasqankuna
25
Juda nacionpa reynin Ezequiasmi serviqnin runakunawan qellqachirqa Rey Salomonpa rikchanachiyninkunata:
2 Imatapas pakasqanmantam Diostaqa yupaychana.
Imatapas entiendesqankumantam reykunataqa hatunchana.
3 Manam pipas entiendenmanchu cielokunapa
alto-alto kayninta.
Manam pipas entiendenmanchu kay pachapa
uku-uku kayninta.
Manam pipas entiendenmanchu reykunapa
piensayninta.
4 Qollqeta chullurachiptikim
qollqe chuyayarun.
Plateroñataqmi kuyayllapaq
alhajata rurarun.
5 Mana allin runata reypa servicionmanta qarqoruptikiqa
allin rurasqanwanmi hawkalla gobiernanqa.
6 Ama alabakuychu reypa qayllanpiqa.
Amataq sayaychu reqsisqa
runakunapa kasqanpiqa.
7 “Kay ñawpaq sitioman hamuy” nispa
reypa nisusqaykim aswan allinqa,
ancha reqsisqa runapa qayllanpi
humillachisunaykimantaqa.
Imapas rikusqaykimantaqa ama
8 chaylla juezkunaman willaramuychu.
Yanqañataqmi nisqaykipa contranpi huk kaqnin rimaruptin
manaña ima rurayta atiwaqchu.
9 Defiendekuy acusasuqniki runamasikimanta.
Ichaqa amam willakunkichu huk kaqninpa secretonta.
10 Yanqañataqmi pipas uyariruspan
penqayman churasunkiman.
Mala famayoq runa rikuriruptikiqa
mana chinkaqmi kanman.
11 Qollqewan hapichisqa qorimanta
manzanam sumaqllaña,
chaynam terminonpi rimarisqa palabrapas sumaqllaña.
12 Qorimanta anillo hinaraqmi
kasukuq runata yachayniyoqpa anyaykusqanqa.
Qori-puromanta alhaja hinaraqmi
kasukuq runata yachayniyoqpa anyaykusqanqa.
13 Imaynam rupay tiempopi runata
riti frescaykachin,
chaynam confianapaq kaq runaqa
kachaqninpa sonqonta kawsarichin.
14 Mana parayoq puyukuna hinam
mana imallantapas qokuykuchkaspa
yanqa alabakuq runaqa.
Mana parayoq wayra hinam
mana imallatapas qokuykuchkaspa
yanqa alabakuq runaqa.
15 Pacienciawanmi
munaychakuq runataqa convencechina.
Llampu simiwanmi
contrakuqtaqqa upallachina.
16 Saksanaykikamalla mikuy avejapa miskinta
tarispaykiqa.
Yanqañataqmi aqturuwaq aminaykikama
mikuruspaykiqa.
17 Ama ancha kutinyaychu
amistadnikipa wasinman.
Yanqañataqmi amirususpayki
cheqnipakurusunkiman.
18 Maqanapas otaq espadapas hinam
runamasinpa contranpi llullakuq runaqa.
Ñawchi flecha hinam runamasinpa
contranpi llullakuq runaqa.
19 Sasachakuy punchawpi kachkaspa
traicionero runapi confiakuq runaqa
utusqa kirunwan kachuchkaq hinam.
Sasachakuy punchawpi kachkaspa
traicionero runapi confiakuq runaqa
weqrustin puriq runa hinam.
20 Llakisqa runata takipayaq runaqa
chiri punchawpi pachanta llatanaq hinam.
Llakisqa runata takipayaq runaqa
vinagrewan jabonta tupachichkaq hinam.
21 Cheqnisuqniki runata yarqaptinqa
mikuykachiy.
Cheqnisuqniki runata yakunayaptinqa
tomaykachiy.
22 Chaynata paywan ruraptikiqa
penqakuymantam uyan pukayarunqa.
Tayta Diosmi kutichipusunki
chaynata paywan ruraptikiqa.
23 Norte lawmanta wayra pukumuspanmi
parata apamun.
Cuento qepi runapa rimasqanwanmi
pitapas piñarachimun.
24 Wasipa qatan cuartochapi
yachakuymi aswan allinqa
atipanakuq warmiwan
hatun wasipi yachaymantaqa.
25 Imaynam chiri yaku ancha yakunayasqa
runata kawsarichin,
chaynataqmi karumanta hamuq noticiapas
runata kawsarichin.
26 Putkachasqa yakuyoq pukyu hinam
allin ruraq runaqa mana allin
ruraq runapa qayllanpi katkatatan.
Qanrachasqa yakuyoq pukyu hinaraqmi
allin ruraq runaqa mana allin ruraq
runapa qayllanpi katkatatan.
27 Avejapa miskin achka mikuyqa
manam allinchu.
Alabasqa kanapaq maskayqa
manam allinchu.
28 Imaynam murallasqa llaqta
tuñiriruspan mana defensayoqña rikurirun,
chaynam mana controlakuq
runapas mana defensayoqña rikurirun.