26
Poqoy tiempopi qasaqa manam allinchu.
Cosecha tiempopi parapas manam allinchu.
Chaynam sonsopa reqsisqa
kayninpas mana allinchu.
2 Imaynam pichinchu pawayllapawan,
chaynam yanqamanta ñakaypas
mana imanakunchu.
Imaynam wayanakuypas muyuylla-muyun,
chaynam yanqamanta ñakaypas
mana imanakunchu.
3 Azotewanmi caballotaqa mansana.
Cabestrowanmi asnotaqa manejana.
Azotewantaqmi sonsotapas castigana.
4 Amayá mana tanteaspa rimasqanman hinachu
contestay sonso runataqa.
Sonso kasqaykipaqmi qawachikuwaq
chaynata ruraspaqa.
5 Mana tanteaspa rimasqanman hinayá contestay
sonso runataqa.
Mana chayqa yachayniyoqpaqmi
hapikunman payqa.
6 Chakinta kuchukuchkaq hinam
sonso runawan noticia apachiq runaqa.
Dañolla ruraq hinam
sonso runawan noticia apachiq runaqa.
7 Imaynam suchu runapa chakinkuna
mana valenchu,
chaynam sonsopa rikchanachiy rimasqanpas
mana valenchu.
8 Warakapi watasqa rumiqa
manam valenchu.
Chaynam sonsota alabayqa
mana valenchu.
9 Imaynam machasqa runa
makinta kichka tipaptin mana musyanchu,
chaynam rikchanachiypas
sonsopa siminpiqa mana entiendekunchu.
10 Llapa purikuqta flecharuq runa hinam
sonso runata llamkananpaq contrataq runaqa.
Llapa purikuqta flecharuq runa hinam
yanqa purikuqta llamkananpaq contrataq runaqa.
11 Imaynam allqo mikusqanta kutirachispan
kaqllamanta mikurun,
chaynam sonso runaqa
mana tanteaspa rurasqanta kaqllamanta rurarun.
12 Sonso runam aswan allinqa
kikillan yachaysapapaq hapikuq runamantaqa.
13 Qella runam nin:
“Leonqa ñanpim kachkan” nispa.
Qella runam nin:
“Leonqa callekunapim kachkan” nispa.
14 Imaynam punku kuyun tiyananpi,
chaynam qellapas qochpan camanpi.
15 Qella runaqa platomanmi haywarin makinta
ichaqa qellakunmi siminman apaykuyta.
16 Qella runaqa yachaysapa kasqanpaqmi hapikun.
Yuyaywan contestaq qanchis runamantapas
aswan yachaysapapaqraqmi hapikun.
17 Rinrinkunamanta allqo hapichkaq runaqa
locomanmi rikchakun.
Runapa pleitonman chapukuq runapas
chayna locomanmi rikchakun.
18 Imaynam loco runa wañuchinanpaq
rupachkaq flechakunawan
flechanman pitapas.
19 Chayna runamanmi rikchakun amigonta engañaruspan:
“Burlallapim rurarqani” niq runapas.
20 Mana yanta kaptinqa
ninapas wañurunmi.
Cuento qepi runa mana kaptinqa
atipanakuypas tanirunmi.
21 Carbonmi ninataqa sansayachin.
Yantanmi ninataqa ratachin.
Pleitollapi puriqmi pitapas atipanachin.
22 Cuento qepi runapa rimasqankunataqa
miski mikuyta hinam runaqa millpurun.
Chayna runapa rimasqankunaqa
uyariqnin runapa ukunmanmi pasaykurun.
23 Imaynam allpamanta qachqa manka qollqewan
suma-sumaq llusisqa.
Chaynam mana allin sonqoyoq runapa
miskillaña rimasqanqa.
24 Cheqnikuq runaqa rimasqanwanmi pakan cheqnikuyninta.
Sonqonpim ichaqa yuyaymanachkan
engañananpaq kaqkunallata.
25 Ama creeychu
miski siminwan rimapayasuptikiqa.
Qanchis clase mana allinkunam
kachkan sonqonpiqa.
26 Cheqnikuyninta engañowan pakayta munaptinpas
mana allin kayninqa
sutillataqmi kanqa runakunapa qayllanpipas.
27 Trampapaq pozo uchkuq runaqa
kikillanmi chayman wichiykunqa.
Rumi kuchpaq runaqa
rumi kuchpasqanwanmi hapirachikunqa.
28 Llulla rimaq runaqa cheqninmi
kamisqan runata.
Engañowan alabaq runaqa urmachinmi
alabasqan runata.