27
Hamuq punchawkunapi ruranaykimantaqa
amayá alabakuychu.
Paqarin punchaw imapas
sucedenanmantaqa manam yachankichu.
2 Amayá alabakuychu kikillaykiqa.
Hukkaqninyá alabasunki qamtaqa.
3 Rumipas llasaqmi.
Aqopas llasaqtaqmi.
Mana tanteoyoqpa piñakuyninqa aswan llasaqmi.
4 Mana llakipayakuqmi piñakuruq runaqa.
Hamuq lloqlla hinataqmi rabiakuruq runaqa.
¿Pitaqsi defiendekuyta atinman
sientikuruqmantaqa?
5 Runamasikita uyanpi qaqchaymi aswan allinqa
runamasikita pakasqallapi kuyanaykimantaqa.
6 Corregisunaykipaq maqasuqniki
amistadnikiqa confiakunapaqmi.
Achka kutikama muchapayasuqniki enemigoykiqa
mana confiakunapaqmi.
7 Avejapa miskintapas manañam
munanñachu saksasqa runaqa.
Qatqe mikuypas miskillañam
yarqaymanta kaq runapaqqa.
8 Urpituqa pasakuspanmi saqerun qesanta.
Chaynam ripukuq runapas saqerun llaqtanta.
9 Miski asnaq aceitewan inciensom runapa
sonqonta kusirichin.
Kuyaqnin amistadninpa consejasqanmi
runataqa kusirichin.
10 Amistadnikitaqa amayá qonqaychu.
Taytaykipa amistadnintapas amayá qonqaychu.
Sasachakuypipas
wawqekipa wasintaqa amayá yaykuychu.
Karu llaqtapi yachaq wawqekimantaqa
hichpaykipi yachaq vecinoykim aswan allinqa.
11 Churilláy,
yachayniyoq kaspayá
kusiriykachiy sonqoyta.
Chayna kaptikiqa contestasaqmi
insultaqniy runata.
12 Allin yuyayniyoq runaqa desgracia sucedenanta
qawarispanmi asurikun.
Pisi experienciayoqñataqmi
chayninta pasaykuspan ñakarikun.
13 Mana reqsisqa runata pipas garantizaptinqa
chay runapa pachantayá prendapaq hapiy.
Chuchumika warmita pipas garantizaptinqa
chay runapa pachantayá prendapaq hapiy.
14 Tutapaytaraq qaparispa
amistadninta rimaykuq runaqa,
amistadnin insultaqpaq
hapisqam kanqa.
15 Atipanakuq warmiqa
sutupayamuq para hinam.
16 Chay warmita upallachiyqa
wayra harkay hinam
otaq alleq makipi
aceiteta hatalliy hinam.
17 Imaynam fierro limawan
fierrota afilanku.
Chaynam amigopurapas
entiendenachikunku.
18 Higos sachata cuidaq runaqa
ruruntam mikunqa.
Patronninpa imankunatapas
nanachikuqqa alabasqam kanqa.
19 Yakupi runa qawakuptinmi
uyanta rikurichin.
Chaynam runapa sonqonpas
imaynam runa kasqanta qawachin.
20 Sepulturawan uku pachaqa
manam huntanchu.
Chaynam munapayaq runapas
munapayasqanwanqa mana contentakunchu.
21 Qollqetawan qoritaqa ninawan chulluchispam
allin kasqanta yachanku.
Chaynataqmi runamantapas alabasqa kasqanwan
allin otaq mana allin kasqanta yachanku.
22 Kawsaytawan kuskata maraypi kutapayaptikipas
mana tanteoyoq runaqa
manam qonqanqachu
mana tanteoyoq kayninmantaqa.
23 Qawariy ovejaykikunapa imaynam kasqanmanta.
Nanachikuytaq chaykunapa imaynam kasqanmanta.
24 Qori-qollqeqa manam
tukuy tiempo duraqchu.
Reypa gobiernonqa takyanqa
manam wiñaypaqchu.
25 Lliwakunam ikllirimunqa.
Qorakunam rikurimunqa.
Orqokunapi pastokunaqa
rutusqam kanqa.
26 Hinaptinqa ovejaykikunapa
millwanwanmi pachakunki.
Chivatoykikunata rantikuspam
qamqa allpata rantinki.
27 Cabraykikunapa lechenpas
manam pisipusunkichu.
Familiaykikuna tomananpaqmi
mana-pisinqachu.
sirvientaykikuna tomananpaqmi
mana pisinqachu.