- 19 -
24
Mana allin runakunamantaqa
amayá envidiakuychu.
Amataqyá paykunawan
hukllawakuytaqa munapayaychu.
2 Paykunaqa daño rurayllamantam piensanku.
Runamasinku ñakarichiyllamantam rimanku.
- 20 -
3 Yachaywanmi wasitaqa hatarichina.
Yuyaywanmi wasitaqa cimientana.
4 Yachaywanmi wasipa cuartonkunataqa huntachina.
Kuyayllapaq kaqkunawanmi wasitaqa huntachina.
Kusichikuq riquezawanmi wasitaqa huntachina.
- 21 -
5 Yachayniyoq runaqa
kallpasapa kasqantam qawachikun.
Yachayniyoq runaqa
kallpanmanmi astawanraq yapaykun.
6 Consejachikuspaykim guerrataqa ruranki.
Achkaqwan consejachikuspam vencenki.
- 22 -
7 Yachayqa mana haypay atinam
mana tanteoyoq runapaqqa.
Juzgadopiqa manam imayna rimayta
atinchu payqa.
- 23 -
8 Mana allinllata rurananpaq piensaqtam
Sacre runawan sutichanku.
9 Mana tanteoyoq runakunaqa huchallapim piensanku.
Burlakuq runataqa runakunam cheqninku.
- 24 -
10 Sasachakusqayki punchawpi hukmanyaruspaqa
pisi kallpayoqñam rikurirunki qamqa.
- 25 -
11 Libray wañuyman pusasqakunata.
wañunayaqkunatayá harkay wañunanmanta.
12 “Cheqappunipas manam yacharqanichu” niptikipas
¿manachum cuentata qokuchkan
sonqokuna qawaqqa?
¿Manachum chaytaqa yachachkan
vidakuna waqaychaqqa?
Runakunapa rurasqanman hinataqmi payqa paganqa.
- 26 -
13 Churilláy,
allin kasqanraykuyá
mikuykuy avejapa miskinta.
Miskillaña kasqanraykuyá malliykuy
panalpi miskita.
14 Chaynapim yachanki
yachayniyoq kayqa miski hina kasqanta.
Chayta tariruptikiqa hamuq tiempopim
allinnikipaq kanqa.
Chayta tariruptikiqa
suyasqaykipas manam yanqachu kanqa.
- 27 -
15 Mana allin ruraq runa hinaqa amayá wateqaychu
allin ruraq runapa wasintaqa.
Mana allin ruraq runa hinaqa amayá saqueaychu
paypa yachasqan wasintaqa.
16 Allin ruraq runaqa qanchis
kutita urmaspanpas yapatawanmi sayarinqa.
Mana allin ruraq runakunam
ichaqa desgraciaman urmaykarinqa.
- 28 -
17 Enemigoyki desgraciaman urmaykuptinqa
ama kusikuychu.
Imapipas pantaruptinqa amataq sonqoykipi
kusipayaychu.
18 Kusipayaptikiqa Tayta Dios
yacharuspanmi mana gustarunmanchu chayta.
Chaynapim Tayta Dios piñakuyninta
asurirachinman pantaq enemigoykimanta.
- 29 -
19 Ama piñakuychu mana allin ruraqkunarayku.
Ama envidiakuychu mana allin ruraqkunarayku.
20 Mana allin runapaqqa hamuq punchawkunam
mana allinlla kanqa.
Mana allin ruraq runakunapa vidanqa
wañuruq mechero hinallam kanqa.
- 30 -
21 Tayta Diostawan reyta respetay,
churilláy.
Ama juntanakuychu traicionaq runakunawan,
churilláy.
22 Qonqaymantam castigasqa kanqaku
chay traicionaq runakunaqa.
Manam pipas yachanchu Tayta Diospa
nitaq reypa castiganantaqa.
Yachayniyoq runakunapa wakin rimasqankuna
23 Yachayniyoq runakunam kaykunatapas nirqa:
Manam allinchu juezkuna arreglaspanku
hukkaqnin runallaman sayapakuyninku.
24 Mana allin ruraq runatam ninmanku:
“Qamqa kanki allin ruraqmi” nispanku.
Chayna niq runataqa runakunam ñakanqaku.
Chayna niq runataqa nacionkunam desprecianqaku.
25 Mana allin ruraqkunata qaqchaqqa
allinmi kanqaku.
Chayna ruraq runakunaqa hatunmanta
bendecisqam kanqaku.
26 Diospa munasqanman hina rimaq runaqa
uyariqninpa siminta muchachkaq hinam kanqa.
27 Wasikimanta hawapi arreglay ruranaykikunata.
Tukupay chakraykipi llamkaynikikunata.
Chaymantañam rurakunki wasikita.
28 Runamasikipa contranpiqa
amam yanqamanta testigakunkichu.
Amataqmi llullakunataqa paypa
contranpi rimankichu.
29 Ama niychu:
“Rurawasqanta hinallam paytapas
rurasaq” nispaqa.
Ama niychu:
“Rurawasqanta hinallam ñoqapas
kutichisaq” nispaqa.
30 Pasarqanim qella runapa
chakranpa patanta.
Pasarqanim mana yuyayniyoqpa
uvas huertanpa patanta.
31 Qawariptiymi chay chakranpiqa
kichkakunallaña wiñarusqa.
Qawariptiymi chay chakrantaqa
itanakunallaña huntarusqa.
Rumi perqankunapas lliwmi tuñirusqa.
32 Chaykunata qawaspaymi
chaykunamanta yuyaymanarqani.
Chaykunata qawaspaymi kay
yachachikuyta entienderqani:
33 “Asllatapas puñuykusaqraq” niptikiqa,
“Puñunayawachkanraqmi” niptikiqa,
“Makiykunatapas chupqaykuspaymi waqtapakusaq”
niptikiqa
34 wakchayaymi chayaramusunki.
Yanqa purikuq hinam chayaramusunki.
Armasqa salteaq hinam chayaramusunki.