Runaqa huchallikuylla munaq kasqanmanta
(Sal 14)
Takiqkunapa maestronpaq, “Mahalat” tonopi yuyaymananapaq Davidpa takisqan.
53
Rumi sonqo runakunam piensachkanku:
“Diosqariki manam kanchu” nillaspanku.
Paykunaqa pasaypaqmi pierderunku.
Millakuypaq kaqkunatam rurarunku.
Manam pipas allintaqa ruranñachu.
2 Diosllamiki runataqa
hanaq pachamanta qawamuchkan.
Pillatapas entiendeqta
tariykunanpaqmi qawamuchkan.
Pillatapas maskaqninta
tariykunanpaqmi qawamuchkan.
3 Llapallankum qepamanña kutikunku.
Lliwmi pantaruspa pierdekurullanku.
Manam pipas allintaqa ruranñachu.
Chullallapas manamriki ruranñachu.
4 Mana allin ruraq lliw runaqa
manam entiendellankuchu.
Tantatapas hinam
mikuparullanku runaykunatapas.
Paykunaqa manam
mañakunkutaqchu sumaq Diosniytapas.
5 Mana manchakunanku kachkaptinmi
paykunaqa llumpa-llumpay
mancharisqa karqaku.
Contraykipi hatariq
lliw runakunapa tullunkupas
Diospa wischusqanmi karqaku.
Paykunatam penqayman churarqanki
Diospuniña pasaypaqta wischurullasqanrayku.
6 ¡Ima allinsuraq kanman Sionmanta
Israelpa salvaqnillan hamuptinqa!
¡llapan runakunapapas kawsasqanta
allinninpaq Diosnillayraq cambiaptinqa!
Jacobpapas mirayninmi kusikunqa.
Israelpapas mirayninmi kusikunqa.