Mana allin ruraqpa yanqa hatunchakusqanmanta
Takiqkunapa maestronpaq. Edom casta Doeg sutiyoq runam Rey Saulman hamuspan willarqa: “Ahimelec sutiyoq sacerdotepa wasinmanmi Davidqa hamurun” nispa. Chay pasakusqanmantam yuyaymanananpaq David kayta takirqa.
52
Valeroso soldado,
¿imanasqataq alabakunki mana allinmantaqa?
¡Mana tukuruqmi Diospa kuyapayakuyninqa!
2 Daño rurayllapim
qamqa piensachkanki.
Ñawchi puntayoq cuchillo
qalloyoqmi qamqa kanki.
3 Allin kaqmantapas mastaqa
mana allintam qamqa kuyanki.
Cheqap kaqmantapas mastaqa
llullakuytam qamqa kuyanki.
(Samariy)
4 Qamqa nina qallu runam kanki.
Qamqa dañaq palabrakunatam kuyanki.
5 Chaynaqa Diosmi wichirachisunki.
Wiñaypaqmi payqa purmarachisunki.
Qamtaqa wasikimantam qarqorusunki.
Qora pelachkaq hinam chutarusunki.
Kay vidamantam payqa qechurusunki.
(Samariy)
6 Allin ruraq runakunam
chayta qawaspanku manchakunqaku.
Chayna runamantam ichaqa
asikunqaku kaynata nispanku:
7 “Waqaya Diospa kallpanchakuynin
mana maskaq runaqa.
Waqaya kikinpa qori-qollqellanpi
hapipakuq runaqa.
Waqaya aswanraq mana allinta
rurachkan chayna runaqa.”
8 Ñoqam ichaqa Diospa wasinpi kaq
sumaqllaña aceitunas sacha hina kachkani.
Diospa kuyapayakuyninpim ñoqallayqa
wiña-wiñaypaq confiakuchkani.
9 Diosnilláy,
chay rurasqaykimantam
ñoqallayqa wiña-wiñaypaq
graciasta qanman qosaq.
Qanman iñiqkunapa ñawpaqninpi
sutillaykiqa allin kasqantam
ñoqallayqa willakusaq.