Pampachaykunanpaq Diosta mañakusqanmanta
Takiqkunapa maestronpaq, Diospaq Davidpa takisqan. Davidmi kayta takirqa Betsabeywan huchallikurusqanrayku Diosmanta willakuq Natan qaqchaptin.
51
Diosnilláy,
qampa kuyapayakuynikiman hinayá
ñoqallayta llakipayariykullaway.
Diosnilláy,
sinchi llakipayakuynikiman hinayá
mana kasukusqayta limpiaykapullaway.
2 Mana allin rurasqaymantayá
aswan-aswan mayllaykullaway.
Llapachallan huchallaymantayá
ñoqallayta chuyanchallaway.
3 Ñoqallayqa reqsikuykullanim
mana kasukusqaykunata.
Ñoqallayqa manam atinichu
huchallaykunapas qonqayta.
4 Qampa contraykipipunim
ñoqallayqa huchallikuruni.
Qamqa qawawachkaptikim
mana allintaraq rurarullani.
Kaytaqa willakuchkani
mana huchayoq kasqaykita
reqsichinaypaqmi.
Chaynataq sentenciawasqaykipas
mana pantayniyoq kasqanta
reqsichinaypaqmi.
5 Huchallikuqpaqmi
mamallayqa wiksayakuwarqa.
Mana allin ruraqpaqmi
mamallayqa wachakullawarqa.
6 Qamqa kuyankim
runapa sonqonpi cheqap kaqta.
Qamqa sonqoypim
qoykuwanki yachayniyoq kayta.
7 Hisopo plantawan challaykuwaptikiqa
limpioñam kallasaq.
Mayllaykuwaptikiqa ritimantapas
aswanraqmi yuraqyallasaq.
8 Kusikuy takikunatayá
uyariykachillaway.
Kusikuy qapariytayá
uyariykachillaway.
Ñakarichiwasqaykimantayá
kunanqa kusiriykachillaway.
9 Amañayá yuyayñachu
ñoqallaypa huchallaykunataqa.
Qampuniyá limpiaykuway
llapa mana allin rurasqaymantaqa.
10 Diosnilláy,
chuyanchasqa sonqotañayá
ruraykapullaway.
Diosnilláy,
mana hukmanyaq sonqotañayá
mosoqyaykachipuway.
11 Amayá wischurullawaychu
qampa qayllaykimantaqa.
Amayá qechurullawaychu
Chuya Espirituykitaqa.
12 Salvawasqaykirayku kusikusqaytayá
kutichipuway.
Kasukuq sonqoyoqtañayá
ñoqallaytaqa uywakullaway.
13 Chayna kaptinqa
mana kasukuqkunatam yachachisaq.
Allintaña
kawsanankupaqmi yachachisaq.
Chaynapim huchasapakunata qanman kutichimusaq.
14 Salvawaqniy Diosnilláy,
libraykullawayá runataqa
amaña wañuchinaypaq.
Chaynapim ñoqallayqa
allin ruraq kasqaykimanta takillasaq.
15 Señorlláy,
qampuniyá simillayta kichariykuway.
Alabanaypaqyá simillayta kichariykuway.
16 Qamqariki manam munankichu
animalkuna wañuchipunaytaqa.
Chayta munaptikiqa
ñoqaqa qoykuykimanmi.
Qamqariki manam munankichu
animalkuna lliw kañapunaytaqa.
Chayta munaptikiqa
ñoqaqa qoykuykimanmi.
17 Diosnilláy,
llakisqa sonqoyoq runatam
munanki mastaqa.
Qamqa manam despreciankichu
wanakusqa sonqoyoq runataqa.
18 Allin munasqaykiman hinayá
Sion Moqopi llaqtata allichaykuy.
Allin rurasqaykiman hinayá
Jerusalen llaqtapa murallanta perqaykuy.
19 Chayraqmi qampaq hina
animal ofrendakunapas agradasunki.
Chayraqmi lliw kañasqanku
animalkunapas agradasunki.
Chayraqmi malta torokunatapas
altarnikipi ofrecesunki.