Kay pachata Dios juzgananmanta
Diosman Asaf sutiyoq runapa takisqan
50
Llumpa-llumpay atiyniyoq
Tayta Diosmi rimarirqa.
Huñunakunankupaqmi
kay pachapi yachaqkunata
qayarirqa.
Intipa qespimunan lawmantam
qayarirqa.
Intipa seqaykunan lawmantam
qayarirqa.
2 Sion llaqtamantam
kancharimun Diosqa.
Sumaqllaña llaqtamantam
kancharimun Diosqa.
3 Mana upallaykuspam
Diosninchikqa hamuchkan.
Paypa ñawpaqninpiqa
ninam rupakuchkan.
Paypa muyuriqninpiqa
wayra-param chayakuchkan.
4 Hanaq pachapi kaqkunatam qayanqa.
Kay pachapi kaqkunatam qayanqa.
Runankunata juzgananpaqmi qayanqa:
5 “Huñuychikyá ñoqaman iñiqkunata.
Huñuychikyá ñoqawan contrato ruraqkunata.
Animalkunata wañuchipuwaspam
rurarqaku chay contratota.”
6 Cielokunam willakunqaku
Diosqa allinkuna ruraq kasqanmanta.
Cielokunam willakunqaku
Diosqa allin arreglo ruraq kasqanmanta.
(Samariy)
7 Tayta Diosmi nin kaynata:
“Ñoqapa runaykuna,
uyariychikyá kay rimasqayta.
Israel castakuna,
uyariychikyá kay willakusqayta.
Ñoqam Diosqa kani.
Ñoqam Diosnikiqa kani.
8 Manam qaqchaykichu
animalkuna ofrecewasqaykimantaqa.
Manam qaqchaykichu
sapa punchaw kañapuwasqaykimantaqa.
9 Manam mañakuchkaykiqa
corralnikipi kaq malta torokunatachu.
Manam mañakuchkaykiqa
kanchaykipi kaq chivatokunatachu.
10 Ñoqallapam
llapallan purun animalkunaqa.
Ñoqallapataqmi
waranqantin-waranqantin
waqtakunapi kaq animalkunaqa.
11 Ñoqallapataqmi orqokunapi kaq
pawaq animalkunapas.
Ñoqallapataqmi chakrakunapi kawsaq
llapallan animalkunapas.
12 Sichu yarqarachikuspayqa
manam qanmanchu willaykimanqa.
Kay pachaqa ñoqapam.
Chaypi tukuy imapas ñoqapam.
13 Ñoqaqa manam mikunichu
torokunapa aychantaqa.
Ñoqaqa manam tomanichu
chivatokunapa yawarnintaqa.
14 Diosman graciasta qonaykipaqyá
kachun animal ofrecesqaykiqa.
Alto-altopi kaq Diosmanyá
pagapuy prometekusqaykitaqa.
15 Sasachakuy punchawpim qayakamuwanki.
Ñoqam qamtaqa libraykusqayki.
Qamñataqmi ñoqata yupaychawanki.
16 Ichaqa mana allin ruraqtam
Dios nin kaynata:
“¿Ima derechoykiwantaq
rimanki decretoykunamanta?
¿Ima derechoykiwantaq
rimanki contratoymanta?”
17 Qamqariki manam munankichu
anyasqa kaytaqa.
Qamqariki qepanchakunkim
ñoqapa palabraytaqa.
18 Suwata rikuspaykiqa
paymanmi kuskanchakuykunki.
Hukwan-hukwan kakuqkunawanmi
qamqa pareschakuykunki.
19 Mana allinllatam rimaq kanki.
Simikiwanmi engañaq kanki.
20 Wawqekipa contranpim
tiyaykuspa rimaq kanki.
Mamaykipa wawanmantam
yanqakunata rimaq kanki.
21 Chaykunata rurachkaptikipas
upallakurqanim imam rurasqaykimanta.
Chaymi qamqa piensarqanki
qam hina huchasapa kasqayta.
Ichaqa chaykunamanta qaqchaspaymi
qawachisqayki huchaykikunata.
22 “Diosta qonqaruqkuna,
qamkunayá kayta entiendeychik.
Mana entiendeptikichikqa
ñoqam tisaparusqaykichik.
Yanqañataqmi mana pipas
kanmanchu librasuqnikichik.
23 Pipas graciasta qowaqniyqa
yupaychawanmi.
Munasqayman hina kawsaqtaqa
salvaykusaqmi.”