Manam qollqellapichu kusikuyqa
Takiqkunapa maestronpaq, Coreypa mirayninkunapa Diosman takisqan.
49
Kaytayá uyariychik,
llapallan runakuna.
Uyariychikyá,
kay pachapi llapallan yachaqkuna.
2 Uyariychikyá humildekunawan
reqsisqa runakunapas.
Uyariychikyá apukunawan
wakcha runakunapas.
3 Yachaywanmi ñoqaqa rimasaq.
Entiendena kaqtam yuyaymanasaq.
4 Rikchanachiykunatam uyarisaq.
Watuchikunatam arpawan willasaq.
5 Manam ñoqaqa manchakusaqchu
sasachakuy punchawkunapiqa.
Manam manchakusaqchu
engañawaqniykuna muyuriykuwaptinqa.
6 Paykunaqa qori-qollqenkupim
confiakunku.
Paykunaqa achka kapuqninmantam
alabakunku.
7 Manam wawqentaqa
qollqellawanqa libranmanchu.
Manataqmi librakunanpaqqa
Diosmanqa paganmanchu.
8 Achka-achka qollqepaqmi
pipas librakunanpaqqa.
Haykapipas manam qollqellaqa
haypanmanchu pipas librakunanpaqqa.
9 Wiña-wiñaypaq kawsananpaqqa
qollqellaqa manam haypanmanchu.
Sepulturamanta librakunanpaqqa
qollqellaqa manam haypanmanchu.
10 Yachanchikmiki yachayniyoq runakunapas
igualpaq wañunankutaqa
chaynataq pisi yuyayniyoqkunapa
igualpaq wañunankutaqa.
Yachanchiktaqmiki qori-qollqenkupas
hukpaqña kanantaqa.
11 Paykunaqa sutinkuwanmi
chacrankupa sutinta churarqa.
Tanteasqankuman hinaqa
wasinkupas wiña-wiñaypaqmi kanqa.
Sepulturankum ichaqa
wiña-wiñaypaq yachananku kanqa.
12 Runaqa mayna apuña kaspapas
manam unaypaqchu kawsanqa.
Animalkuna wañuruspan
chinkaruchkaq hinam kanqa.
13 Chaynatam tukurunqaku
kikillankupi confiakuqkunaqa.
Chaynatam tukurunqaku
kikillankumanta alabakuqkunaqa.
(Samariy)
14 Wañuymi chayna runakunapa michiqninqa.
Ovejakunata hinam pusan
llapallan wañuqkunapa kasqanmanqa.
Diospa munasqanman hina kawsaqkunaqa
achikyaruptinmi paykunapi munaychakunqa.
Sumaqllaña wasinkumanta karupim
wañuqkunapa kasqanpiña cuerponqa ismunqa.
15 Ichaqa Diosmi librawanqa
wañuqkunapa kasqanmantaqa.
Payqa maymi kasqanpim
chaskiykuwanqa ñoqallaytaqa.
(Samariy)
16 Amayá hukmanyaychu
pipas apuyaptinqa.
Amayá hukmanyaychu
wasinpi kapuqninkuna yapakuptinqa.
17 Chay runa wañukuspanqa
manapunim imantapas apanqachu.
Chaynataqmi kapuqninkunapas
manataq qatinqachu.
18 Manam imananchu kawsakuspanraq
kusisqapaq hapikusqanpas.
Manam imananchu apuyasqanrayku
alabasqaña kasqanpas.
19 Chayaramunqam
paypa wañukunan punchawqa.
Chayaramunqam
manaña achkiypas qawanan punchawqa.
20 Mayna apuña kaspapas
mana entiendeq runaqa
animalkuna wañuruspan
chinkaruchkaq hinam kanqa.