Jerusalen llaqta suma-sumaq kasqanmanta
Diosman Coreypa mirayninkunapa takisqan
48
Hatu-hatunmi Tayta Diosqa.
Diosninchikpa llaqtanpiqa
payllam kanan alabasqaqa.
Diosninchikpa sapaqchasqan moqopiqa
payllam kanan alabasqaqa.
2 Diospa yachanan Sion Moqoqa
suma-sumaq hoqarisqam kachkan.
Chay moqoqa
hatu-hatun Reypa llaqtanmi kachkan.
Chay moqoqa
kay pachapi runakunata kusiykachiqmi kachkan.
3 Diosqa palacionkunapim kachkan.
Pakakuykuq kasqanpaqmi reqsichikuchkan.
4 Llapa reykunam huñunakurunku.
Llapallankun chayman asuykurunku.
5 Ichaqa chay llaqtata qawaykuspankum
llumpayllataña admirakurqaku.
Ichaqa chay llaqtata qawaykuspankum
mancharikuymanta ayqekurqaku.
6 Paykunaqa manchakuywanmi
hapirachikurqaku.
Wachakuchkaq warmi hinam
nanaywan ñakarirqaku.
7 Intipa qespimunan lawmanta
pukumuq vientowanmi pakipanki.
Negociantepa buquenkunatam pakipanki.
8 Uyarisqanchikman hinam
kunan rikuykunchik.
Llapallan Kamachiq Tayta Diospa
llaqtanpim rikuykunchik.
Diosninchikpa llaqtanpim
rikuykunchik ñoqanchikqa.
Chay llaqtataqa
Diosmi wiñaypaq takyachinqa.
9 Diosnilláy,
kuyapayakuynikimantam yuyaymananiku.
Temploykipa chawpinpim yuyaymananiku.
10 Diosnilláy,
kay pachapa cantonkamam
allin reqsisqa kanki.
Kay pachapa cantonkamataqmi
alabasqa kanki.
Qamqa atiynikiwanmi
allin kaqkunallata ruranki.
11 Sion Moqopi yachaqkunayá
anchallataña kusikuchunku.
Juda lawpi yachaqkunayá
anchallataña kusikuchunku.
Allin arreglokuna
rurasqaykimantayá kusikuchunku.
12 Purispayá
Sion Moqota muyurimuychik.
Torrenkunatayá
chay llaqtapata yupamuychik.
13 Sumaqtayá qawamuychik
murallapa cimienton hapiq perqankunata.
Sumaqtayá qawamuychik
chaypi tarikuq palaciokunata.
Chaynapim qepa wiñaqkunaman
willankichik chaykunamanta.
14 Kay rimasqanchik Diosmá
wiña-wiñaypaq Diosninchikqa.
Kay rimasqanchik Diosmá
wiña-wiñaypaq pusawaqninchikqa.