Enemigonkunamanta waqaychananpaq Diosta mañakusqan
Takiqkunapa maestronpaq, cuerdayoq tocanakunawan yuyaymananapaq Davidpa takisqan. Kaytam takirqa Zif llaqtayoq runakuna Saulman hamuruspan: “Davidqa allpaykupim pakakuchkan” nispa niptin.
54
Diosnilláy,
sutillaykiraykuyá salvaykullaway.
Diosnilláy,
allin arreglotayá ruraykapullaway.
2 Diosnilláy,
mañakusqaytayá uyariykullaway.
Rimapayasqaytayá uyariykullaway.
3 Forastero runakunam
contraypi hatarirunku.
Mana llakipayakuqkunam
wañuchiyta munawachkanku.
Diostaqa manapunim
kaqpaqpas hapinkuchu.
(Samariy)
4 Chaywanpas Diosmi
ñoqallaytaqa yanapawan.
Chaywanpas Señormi
ñoqallaytaqa uywakuwan.
5 Mana allinninkutam kutichipunki
wateqaqniykunamanqa.
Confiakunapaq
kasqaykiman hinayá
chinkachiy paykunataqa.
6 Dios Taytalláy,
tukuy sonqoywanmi
animalkunata wañuchipusqayki.
Allin kasqaykiraykum
graciasta qollasqayki.
7 Tukuy sasachakuyniymantam
libraykuwarqanki.
Enemigoykuna vencechikusqantam
rikuykachiwarqanki.