Ñakariqpa mañakusqanmanta
Takiqkunapa maestronpaq, cuerdayoq tocanakunawan yuyaymananapaq Davidpa takisqan
55
Diosnilláy,
uyariykullawayá mañakusqaytaqa.
Amapuniyá qepanchakuychu
ruegakusqaytaqa.
2 Ñoqallaytayá uyariykullaway.
Ñoqallaytayá contestaykullaway.
Mañakamuspaymi
pantaypi hina tarikuni.
Mañakamuspaymi
hukmanyasqa tarikuni.
3 Chaynaqa kachkani
enemigoy qaparisqanraykum.
Chaynaqa kachkani
mana allin ruraq ñakarichiwasqanraykum.
Mana allinkunatam churkuruwanku.
Paykunaqa piñakuspam chiqniruwanku.
4 Ñoqallaypa sonqollaymi
ukullaypi pawatyachkan.
Wañuy manchakuymi
ñoqallayta intuwachkan.
5 Manchakuymi yaykurullawan.
Katkatataymi hapirullawan.
Sustochakuymi inturullawan.
6 Chaymi ñoqallayqa nirqani:
“Amalaya paloma hina
raprayoq rikuriruyman.
Chayna kaptinqa
pawarikuspach samakuyman.
7 Chayna kaptinqa
karumanchá lluptikuyman.
Chayna kaptinqa
purunpichá samakuyman.
(Samariy)
8 Sinchi wayramantachá
apurawman ayqekuyman.
Wayra-paramantachá
apurawman lluptikuyman.
9 Señorlláy,
paykunataqa millpuruyá.
Señorlláy,
paykunataqa pantachiyá.
Llaqtapiqa qawani
daño rurayllatam.
Llaqtapiqa qawani
llumpay piñanakuyllatam.
10 Tuta-punchawmi purikunku
llaqtapa murallanpiqa.
Mana allin rurayllam kachkan
chay llaqtapa chawpinpiqa.
Ñakariyllam kachkan
chay llaqtapa chawpinpiqa.
11 Chaypa chawpinpiqa kachkan
daño rurayllam.
Plazankunapipas kachkan
suwanakuyllam.
Plazankunapipas kachkan
engañollam.
12 Manam enemigoychu
ñoqataqa piñarachiwarqa.
Chaynalla kaptinqa
aguantaymancha karqa.
Manam cheqniwaqniychu
contraypiqa hatarirurqa.
Paylla kaptinqa
pakakuruymancha karqa.
13 Chay contraypi hatariqqa
qanmi kanki.
Chay runaqariki
qam puriqmasiymi kanki.
Chay runaqariki
qam kuyanakuqmasiymi kanki.
14 Ñoqanchikqa kuskanchikmi
imatañapas willanakuq kanchik.
Diospa templonpipas
runakunapa chawpinpim
puriq kanchik.
15 Enemigoykunaqa qonqaytayá
pasaypaq wañuruchunku.
Wañusqakunapa kasqanmanyá
kawsachkaqraq wichiykuchunku.
Paykunapa wasinpiqa
mana allinkunallam kachkan.
Paykunapa sonqonpiqa
mana allinkunallam tarikuchkan.
16 Ñoqam ichaqa
qayakullasaq Diosta.
Tayta Diosmi
salvakuwanqa ñoqallayta.
17 Tardeykuqtawan achikyaqtam
qayakullasaq payta.
Chawpi punchawtam
nisaq willakuyllayta.
Payqa uyariykuwanqam
ñoqapa voznillayta.
18 Hawkalla kanaypaqmi librawanqa
contraypi kaq guerrapa chawpinmanta.
Librawanqam nana-nanaq
contraypi kaq enemigoymanta.
19 Paykunaqa wiñaypaq gobiernaqpa
humillachisqanmi kanqaku.
(Samariy)
Paykunaqa mana wanakuspam
hina kaqlla kawsanqaku.
Paykunaqa Diostapas
mana respetaqmi kachkanku.
20 Chayna runaqa maqaparunmi
amistadninkunatapas.
Chayna runaqa pakiparunmi
contrato rurasqantapas.
21 Rimankupas mantequillamantapas
aswan-aswan llamputaraqmi.
Guerrallamantam piensankupas.
Rimankupas aceitemantapas
aswan-aswan llamputaraqmi.
Ñawchi espadamanmi rikchakun
rimayninkupas.
22 Tayta Diosmanyá qoykuy
preocupasqa kasqaykitaqa.
Payñam cuentallikunqa
qanmantaqa.
Allin runataqa manam wiñaypaqchu
saqenqa urmasqataqa.
23 Diosnilláy,
runa wañuchiqkunaqa
kawsananku watakunapa chawpinkamallapas
manam kawsanqakuchu.
Engañakuq runakunaqa
kawsananku watakunapa chawpinkamallapas
manam kawsanqakuchu.
Paykunataqa chinkarunanpaqmi
tanqaykunki sepulturaman.
Ñoqam ichaqa confianzawan
hapipakuni qamllaman.