Diosta confianzawan mañakusqan
Takiqkunapa maestronpaq, “Karuneqpi kaq encina sachakunapi paloma” sutiyoq tonopi Davidpa takisqan Mictam. Filistea runakuna Gat llaqtapi hapiruptinmi kaynata takirqa.
56
Diosnilláy,
ñoqallaytayá llakipayariykullaway.
Runakunamá saruparullawanku.
Tukuy punchawmi atacaruwanku.
Tukuy punchawmi ñakarichiwanku.
2 Tukuy punchawmi
wateqaqniykuna sarupallawanku.
Nana-nanaqmi hatunchakuspa
peleowan hapirullawanku.
3 Manchakuypi tarikuspayqa
qamllapim confiakullaniqa.
4 Palabrallanpi confiakuspam
Diosta alaballani.
Mana manchakuspam
Diospi confiakullani.
Runaqa mana imanawananmantam
ñoqallayqa confiakullani.
5 Tukuy tiempom paykunaqa
imam rimasqayta qewiykunku.
Daño ruraruwayllapim
paykunaqa piensachkanku.
6 Ñoqawan piñanakuyllatam
paykunaqa maskanku.
Pakan-pakanmi
paykunaqa wateqawanku.
Ñoqapa imam rurasqaytam
paykunaqa qawanku.
Ñoqallay wañurachiyllatam
paykunaqa suyachkanku.
7 Diosnilláy,
mana allin rurasqankumantaqa
amayá lluptichunchu paykunaqa.
Piñakuynikiwanyá
humillaruy llapa runakunataqa.
8 Yanqa purisqaytam yuparqanki.
Qamqa weqeykunatam huñurqanki.
Chaykunataqa libroykipim qellqarunki.
9 Qamta mañakuptiymi qepaman kutirichinki
enemigoykunata.
Ñoqaqa yachanipunim qam Diosniyqa
ñoqaman sayawasqaykita.
10 Imam prometewasqanraykum
Diostaqa alaballani.
Imam prometewasqanraykum
Tayta Diostaqa alaballani.
11 Mana manchakuspam
Diospi confiakullani.
Runa mana imanawananpaqmi
ñoqallayqa confiakullani.
12 Diosnilláy,
ñoqallayqa rurasaqpunim
qanman prometekusqaykunataqa.
Ñoqallayqa qanmanmi qosqayki
gracias qonay ofrendakunataqa.
13 Diosnilláy,
qamqa wañuymantam libraykuwarqanki.
Urmarunaymantam libraykuwarqanki
qampa ñawpaqnikipiña purinaypaq,
kawsay achkiynikipiña purinaypaq.