Ñakarichiqninkunamanta librananpaq mañakusqan
Takiqkunapa maestronpaq. “Ama purmachiychu” sutiyoq tonopi Davidpa takisqan mictam. Kaytam takirqa Saulpa qayllanmanta machayman lluptikuspan.
57
Diosnilláy,
ñoqamantayá llakipayarikuy.
Taytalláy,
ñoqamantayá llakipayarikuy.
Qamllapim amparakullani.
Mamanpa rapranpi
chiwchicha pakakuchkaq hinam
qamllapi amparakullani.
2 Favorniypi munasqanman hina
cumpliq Diostam qayakullani.
3 Ñoqallaytaqa salvawananpaqyá
hanaq pachamanta kachamuchun.
Sarutyawaqniykunata qaqchananpaqyá
hanaq pachamanta kachamuchun.
(Samariy)
Confiakunapaq kasqanraykuyá
kuyapayakuyninta kachamuchun.
4 Leonkunapa chawpinpi hinam
ñoqallayqa kawsallachkani.
Runa mikuq animalkunapa chawpinpim
ñoqallayqa kuchparayallachkani.
Chay animalkunapa kirunkunaqa
lanzapa puntankuna hinam.
Chay animalkunapa kirunkunaqa
flechapa puntankuna hinam.
Chay animalkunapa qallunkunaqa
ñawchi puntayoq espada hinam.
5 Diosnilláy,
cielokunapa altonkamayá
hatunchasqa kay.
Diosnilláy,
tukuy kay pachapiyá
allin reqsisqa kay.
6 Enemigoykunam
wichiykachiwananpaq
mallata churarunku.
Chayraykum ñoqallayqa
kallachkani hukmanyasqa.
Enemigoykunam wichiykachiwananpaq
uchkuta toqorunku.
Ichaqa kikinkupunim
wichiykunku chaymanqa.
(Samariy)
7 Diosnilláy,
sonqollayqa listom
kachkan takinaypaq.
Diosnilláy,
sonqollayqa listom
kachkan qanman takinaypaq.
8 Sonqolláy,
rikchariyá.
Qampas hatun arpa,
rikchariyá.
Qampas taksa arpa,
rikchariyá.
Hatarichisaq intitayá.
9 Señorlláy,
runakunapa qayllanpim
graciasta qosqayki.
Nacionkunapim takipusqayki.
10 Alto-alto cielokunaman
haypachkaq hinam
qampa kuyapayakuynikiqa.
Puyukunaman haypachkaq hinam
confiakunapaq kaynikiqa.
11 Diosnilláy,
cielokunapa altonkamayá
hatunchasqa kay.
Diosnilláy,
tukuy kay pachapiyá
allin reqsisqa kay.