Allin arreglota rurananpaq Diosta mañakusqan
Takiqkunapa maestronpaq, “Ama purmachiychu” sutiyoq tonopi Davidpa takisqan Mictam.
58
Atiyniyoqkuna
¿cheqaptachum qamkunaqa
allin kaqta rimankichik?
Atiyniyoqkuna
¿cheqaptachum runakunapaq
allin arreglota rurankichik?
2 Qamkunaqa mana allin
sonqowanmi rurankichik.
Daño rurayllatam cheqechinkichik.
Rantikuchkaq hinam
cheqechinkichik.
3 Mana allin ruraq runakunaqa
mamanpa wiksanmantapunim
lliw pantarunku.
Llullallata rimaspam
nacesqankumantapuni
lliw pantarunku.
4 Venenoyoq culebra hinam
paykunaqa kachkanku.
Mana uyariq upa culebra hinam
paykunaqa kachkanku.
5 Chayna culebraqa qena tocasqatapas
manam uyarinchu.
Mayna sumaqña tocasqatapas
manam uyarinchu.
6 Diosnilláy,
paykunapa kirunkunatayá
pakiparuy.
Dios Taytalláy,
malta leonkunapa waqonkunatayá
chamchaparuy.
7 Maqchisqa yaku hinayá
paykunaqa chinkaruchun.
Flechaptinkupas flechankuqa
mana kallpayoqyá kachun.
8 Paykunaqa purichkaspayá
qallu-qallu hina chulluruchunku.
Mana achkiy rikuq
sullusqa wawa hinayá kachunku.
9 Mana chakisqa kichkapa rupayninwan
mankaykichik manaraq timpuruchkaptinmi
mana allin runaqa qechusqa kanqa.
Chakisqa kichkapa rupayninwan
mankaykichik manaraq timpuruchkaptinmi
mana allin runaqa qechusqa kanqa.
10 Allin ruraq runaqa Diospa vengakusqanta
qawaspam kusikunqa.
Payqa mana allin runapa yawar chaqchusqanpim
chakinta nuyuchinqa.
11 Hinaptinmi runakuna ninqa:
“Cheqaptapunim allin kawsaq runapaqa
premionkuna kachkan.
Cheqaptapunim kay pachapiqa
Diospuni juzgachkan.”