Enemigonkunamanta librasqa kananpaq Diosta mañakusqan
Takiqkunapa maestronpaq, “Ama purmachiychu” sutiyoq tonopi Davidpa takisqan Mictam. Kaytaqa takirqa wañurachiyta munaspan Davidpa wasinta Saul wateqachiptinmi.
59
Diosnilláy,
ñoqapa enemigoykunamantayá
libraykullaway.
Diosnilláy,
contraypi hatariqkunamantayá
defiendeykullaway.
2 Mana allin ruraqkunamantayá
libraykullaway.
Runa wañuchiqkunamantayá
salvaykullaway.
3 Dios Taytalláy,
paykunaqa wañurachiwananpaqmi
wateqawachkanku.
Kallpasapa runakunam
contraypi huñunakuchkanku.
Chaytaqa rurachkanku
manamá mana kasukuq kasqayraykuchu.
Chaytaqa rurawachkanku
manamá imapas huchallikusqayraykuchu.
4 Manam ñoqaqa
ima mana allintapas rurarqanichu.
Ichaqa paykunam
kallpasparaq contraypi preparakunku.
Hatariyá yanapawanaykipaq.
Pasamuyá qawaykuwanaykipaq.
5 Llapallan Kamachiq
yupaychasqay Tayta Dios,
Israelpa yupaychasqan
Llapallan Kamachiq Dios,
rikcharispayá castigay
llapallan nacionkunataqa.
Amayá llakipayaychu
traycionakuq mana allin runakunataqa.
(Samariy)
6 Allqo hina anyakustinmi
tardeykuqta kutimunku.
Allqo hina anyakustinmi
llaqtata muyurinku.
7 Siminkuwanmi insultakunku.
Espada hina tuksikuqtam
paykunaqa kamikunku.
“Manam pipas uyarinchu” nispam
paykunaqa tanteanku.
8 Dios Taytalláy,
qanmi paykunamantaqa asikunki.
Llapallan chay nacionkunamantaqa
qanmi burlakunki.
9 Kallpanchaqniy Diosnilláy,
qamtam suyachkayki ñoqallayqa.
Qamllam kanki defiendewaqniyqa.
10 Kuyapayawaqniy Diosmi taripamuwanqa.
wateqaqniykuna castigasqantam qawachiwanqa.
11 Harkaykuwaqniyku Señorlláy,
paykunataqa amayá wañuchiychu.
Chaynapim runaykunapas
paykunataqa mana qonqanqakuchu.
Harkaykuwaqniyku Señorlláy,
atiynikiwanyá cheqerachiy.
Atiynikiwanyá humillarachiy.
12 Siminkuwan huchallikusqankuraykuyá
paytukuq kasqankumanta
presochasqa kachunku.
Siminkuwan mana allin rimasqankuraykuyá
paytukuq kasqankumanta
presochasqa kachunku.
Llullakuspa jurasqankuraykuyá
13 piñakuynikiwan chinkarachiy.
Llullakuspa willakusqankuraykuyá
tukunankukama chinkarachiy.
Kay pachapa cantonkamam yachakunqa.
Jacobpa mirayninpiqa
Diospuni gobiernasqanmi yachakunqa.
(Samariy)
14 Allqo hina anyakustinmi
tardeykuqta kutimunku.
Allqo hina anyakustinmi
llaqtata muyurunku.
15 Mikuyta maskastinmi
kaypi-chaypi purinku.
Mana saksaspankum
tutanñataq qaparkachanku.
16 Ñoqam ichaqa achikyaruptin
atiynikimanta takillasaq.
Ñoqam ichaqa achikyaruptin
qampa kuyapayakuynikimanta
nisyuneqta takillasaq.
Qamllapunim defiendeykuwanki.
Sasachakuyniypim amparaykuwanki.
17 Kallpanchaqniy Diosnilláy,
qanmanmi takillasaq ñoqallayqa.
Qamllam kanki defiendeqniyqa.
Qamllam kanki kuyapayaqniyqa.