Diospa yanapakuyninta mañakusqan
Takiqkunapa maestronpaq, “Amanqay hinam Diospa kamachikuyninqa kachkan” niq tonopi Davidpa takisqan mictam. Davidmi guerrapi pelearqa Aram-naharaim sutiyoq nacionpa contranpi chaynataq Aram-soba sutiyoq nacionpa contranpipas. Chaymanta Joab kutimuspanmi Kachi Qechwapi wañurachirqa chunka iskayniyoq waranqa Edom casta runakunata. Chaymi Davidqa runakunaman yachachinanpaq kay takita takirqa.
60
Diosnilláy,
piñakuruspaykim wischuruwarqankiku.
Piñakuruspaykim castigawarqankiku.
Kallpallaykutayá kutiykachipuwayku.
2 Kay pachatam katkatatachirqanki.
Kay pachatam kichaykachirqanki.
Amaña kuyunanpaqyá hampiykuy.
Chay kichakurusqantayá hampiykuy.
3 Runaykikunatam ñakarichiwarqankiku.
Muspaypi purinaykupaqmi sinkarachiwarqankiku.
4 Qamta respetaqkunamanmi
qorqanki huk banderata.
Flechaqkunapa ñawpaqninpim
sayachinku chay banderata.
(Samariy)
5 Ñoqaykutayá atiynikiwan salvaykuwayku.
Ñoqaykutayá atiynikiwan yanapaykuwayku.
Kuyasqaykikunatayá libraykuwayku.
6 Diosmi santuarionpi nirqa:
“¡Mayna kusikuywanmi rakinasaq
Siquem llaqtapi allpakunata!
¡Mayna kusikuywanmi partipasaq
Sucot Qechwapi allpakunata!
7 Galaadpa allpankunaqa ñoqapam.
Manasespa allpankunaqa ñoqapam.
Efrainqa cascowan hina harkachikunaymi.
Judaqa akllakusqay gobiernaqmi.
8 Moab nacionmi ichaqa
lavatorio hina mayllakunay.
Edom nacionñataqmi
ñoqapa usutay wikapanay.
Filistea nacionñataqmi
venceruspay qaparinay.”
9 ¿Pitaq pusawanqa
murallasqa llaqtamanqa?
¿Pitaq pusawanqa
Edom nacionmanqa?
10 Qamqariki Diosnilláy,
manam sayapakuwankikuñachu.
Qamqariki Diosnilláy,
tropaykuwanpas manam lloqsinkiñachu.
11 Enemigoykupa contranpiyá
yanapaykuwayku.
Runapa yanapakuyninqa
manam imapaqpas valenchu.
12 Diospa yanapakuyninwanmi
vencesun ñoqanchikqa.
Paymi saruparunqa
enemigonchikkunataqa.