Waqaychananpaq Diospi confiakusqan
Takiqkunapa maestronpaq, cuerdayoq tocanakunawan Davidpa takisqan.
61
Diosnilláy,
qayakamusqaytayá uyariykullaway.
Mañakamusqaytayá atiendeykullaway.
2 Kay pachapa cantonmantam
qayakamullayki.
Sonqollay hukmanyaruptinmi
qamta qayakamullayki.
Qamqa ñoqamantapas
alto-alto rumimanmi hoqariykuwanki.
3 Qamllam kanki ñoqallayta
amparaykuwaqniyqa.
Qamllam kanki enemigoymanta
torre hina harkaykuwaqniyqa.
4 Ñoqallayqa munachkani
karpaykipi wiñaypaq kawsakuytam,
mamanpa rapranpi
chiwchicha hina amparakuytam.
(Samariy)
5 Diosnilláy,
prometekusqaykunatam uyariykuwarqanki.
Respetaqnikikunaman
imam qonaykitam ñoqamanpas qoykuwarqanki.
6 Reymanyá yapaykuy
achka watakunata.
Payqa kawsakuchunyá
una-unay watakunata.
7 Payqa gobiernachun
qampa ñawpaqnikipiyá.
Paytaqa waqaychachun
confiakunapaq kasqaykiyá.
8 Chaynapim sutillaykimanta
siemprepuni takillasaq.
Sapa punchawmi
prometekusqaykunata cumplillasaq.